Pre Na Timothy Na Sɛ
16
Paul na yiri wa mna sɛ Derbe na Lystra na. Lystra na wa twanfun wa na nyi, a praa u yeeri Timothy, a wra pe Judae chlɔ shɔnlifun wa pɔ, a u lɛ na pe Greek ndro.
2 Wre Timothy ŋmba, shɔnlifɛɛnlɛ mblɛ praa wa Lystra na Iconium na wa pre kro, naa u mɛɛ chichie yeeri.
3 A Paul naa chaa mbe sɛ na u ni, mna tia pra u fɛŋgɛ kun. Ŋgi na hin? Na Judae plɛɛ wa wa, mna chin na Greek ndro wi u lɛ.
4 Ŋga praa tro chiɛ yire na kre, a praa kee nyjɛ bitumblɔ pre, na loplombo mblɛ praa wa Jerusalem na pre na pe ŋga yire yuu, na sumifɛɛnlɛ pre nyina.
5 Ŋga kra pan ma kre, sumifɛɛnlɛ pre na faŋga ta pe shɔnlie nu, mnaa nɛɛi na yaa.
Pra Tro Phrygia Na Galatia Na Mna Sɛ Troas Na
6 Ŋga praa shie kre, pra tro Phrygia, na Galatia tra nu. La, Kpra Ŋumu wre na pe tɔ kolo, na piashia kee kre yo Asia waŋgra nu.
7 Ŋga pra tro wa mna sɛ su Mysia tra nyu na kre, a pra pe jawala pe na pie yɔ mbe sɛ to Bithynia tra nu, a Yesu Ŋumu wre na je pe pan.
8 A pra tro Mysia tra kre nu, mna sɛ chia ka na, pe ki yeeri Troas.
Macedonia Yira Talaa
9 Ŋga pra le wa kre, ki blee, a Paul na nya nyiɛlɛ na, na blɔ wa yiri Macedonia na mu pan mu yire u yiɛ na u tali na yuu mbo, “Kun mu pan Macedonia na, mu pan mu ya o na.”
10 Ŋga Paul na yirɛ yire nya nyiɛlɛ na ma kre, titɛɛ kre nu, a o naa kolo chaa mbe sɛ Macedonia na wa. Ŋgi na hin? O na chin na Nyiɛkpɔɔ wra o yeeri wa, na o sɛ ketaan kre yo mbe pe nyina.
Pra Le Philippi Na
11 A o na krɔ bali mna yili Troas na, mna tro Samothrace tra mbɛɛ na. Ŋga ki nyiŋge na se kre, a o na le Neapolis na mna krɔ kre ti wa.
12 A o na yiri wa mna nyaari tra mna sɛ Philippi na, Macedonia tra kre kakpɔɔ na yi, a kra pe Roman tra. O na mu kre chia kre na chiɛri.
Lydia Jawala Chinɛhaa
13 Ŋga pe Wuuble na to kre, a o na yili chia kre mbookrɔ mna sɛ lɔɔ ka mbɛɛ na, mna o na shɔnli na Judae pre fnii na nyiɛtali. Bawa o na tni mna paara, mnaa chiɛlɛ mblɛ pra pan mu fni wa pre kro nyina.
14 Bawa chlɔ wa praa u yeeri Lydia, a wra yiri Thyatira na, mna na yonyi chichiele prɛ, mnaa Nyiɛkpɔɔ sumi, a o Tafun wre na u jawala nyaa na u kala ŋga Paul yuu kre loo.
15 A kra tia pra wre na u katoo leele kro ndrɛ je. A wra ndru mu o tali mbo, “Na e chin na ni o Tafun wre shɔnli kpra ni waa, kena e pan o sɛ tni ni katoo.” A wra o yii a o na sɛ tni u katoo.
Bichable Wa Tra Haa
16 Ki ble ka, o naa shie lawee ŋga nu praa fni na nyiɛtali kre nu, mna tnu bichable wa fni, na kɔmfoɔrɔ ŋumu wa u nu. Imi wraa chlɛ na nyaa kre na tia u tafɛɛnlɛ naa tnu taa tataara.
The Conversion of the Jailer (Acts 16:16-40)
17 Ŋga wra wre na Paul nya kre, a wra kna mu taa o kro na gblee leni mbo, “Leele mblɛ lɛ nyjeeri Nyiɛkpɔɔ sumifɛɛnlɛ mblɛ pe leele nyina ŋmaashɔmu kolo kre.”
18 Ble nyini ŋga pan wraa kre kee ŋga yuu na taari o kro. A kra kɔ mu Paul krɔkun, a wra kna mna fuu u ŋumufɔɔn kre na mbo, “Ni yo mu pan Yesu Kristo mɛɛ kre nu, yili u nu mu sɛ.” Titɛɛ kre nu wa to, a ŋumu kre na yili u nu.
19 Ŋga chlɔ wre tafɛɛnlɛ pre na nya na pe kaan haa kɔ kre, a pra Paul na Silas tini mna sɛ na pe ni loplombo yiɛ, pe kala lihaa wa.
20 Ŋga pra sɛ pe le loplombo kalalifɛɛnlɛ pre kɛɛ kre, a pra yo mbo, “Leele mblɛ Judae lɛ, a pe pan na o chia kre klai.
21 Pe pan na kolo ka sembremu nyina, ŋga na ki n fna mbe wre Roman leele taa, ndee mbe pe.”
22 Ŋga pra loo ma kre, lenɛɛrɛ mblɛ praa wa wa pre krɔ na kun na Paul na Silas ni, a loplombo kalalifɛɛnlɛ pre na Paul na Silas dodonyi tini mu wla pe na, mna yo na pe pe gbun na fwɛ ni.
23 Ŋga pra pe gbun kama mu kɔ kre, a pra sɛ pe le nyuŋgo, mna yo ki lefun wre pan na u pe le chiriri.
24 Ŋga pra yo ma u pan kre, a wra sɛ pe le nyuŋgo lamwo kre nu, mna pe jeelee yii mu pɔ tuŋmble na.
Shiefun Wre Jawala Chinɛhaa
25 Kie pe ndroo kre, Paul na Silas na yiri na nyiɛtali, na mɛɛ koni na Nyiɛkpɔɔ kaan, a leele mblɛ praa wa nyuŋgo wa na pre na ndie tɛɛ na mɛɛ yire ndru.
26 Titɛɛ kre nu, na tra seeri badaaŋga mu sɛ su nyuŋgo kre nɔɔ na, a krɔɛ yire na nyaala, a pe sɛɛrɛ yire kro na kuari.
27 Ŋga ndro ŋmba wraa pe sri wre na nyi mu da na krɔɛ yire nyaala mu tni kre, a wra u brɔfiɛn tini mbe uyɛ gbo. Ŋgi na hin? Wra jawa na mblɛ pee wa nyuŋgo wa kre fɛ.
28 A Paul na kna mu fuu u na mbo, “Maa shia muyɛ pe sisaa ka, o kroo wa.”
29 A wra tia pra pan na kaniɛ ni, a wra tin mu le pe kro, fiɛrɛ na titom ni, mna sɛ to Paul na Silas yiɛ.
30 Ŋga wra yili na pe ni fimi na kre, a wra kna mu pe wie mbo, “Ni tafɛɛnlɛ, kee ŋgi nunu mbe pe mbe ŋmaa ta hin?”
31 A pra kna mbo, “O Tafun Yesu Kristo wre shɔ mu li. We ŋu na mu katoo leele kro ŋmaa shɔ.”
32 Bawa Paul na Silas na yire mna o Tafun wre kee yo blɔ wre, na u katoo leele kro pan.
33 A wra Paul na Silas wru blee kre, mna pe fwa klɛ yire fɔ pe pan, mna tia pra wre na u katoo kre kro leele ndrɛ je.
34 A wra ndru mna pe wru mna sɛ u katoo mna sɛ pe ŋga sro. A wre na u katoo leele yiɛ na shɔ kpɔɔ, na pe Nyiɛkpɔɔ shɔnli.
Pra Bitumblɔ Pre Wa Kolo
35 Ŋga nyiŋge na se kre, loplombo kalalifɛɛnlɛ pre na prosie tun, na pe paan yo blɔ wre pan, na u leele shiin pre wa mbe pe sɛ.
36 A blɔ wre na ki yo Paul pan, na pe yo ni e wa mbe e sɛ, kena e yili e sɛ wejinyiŋge ni.
37 A Paul na kna mu yo pe pan mbo, “Ŋga pe o yii, pe n o kee li mu yo na o pimi li, mna tia pra o frɔ lete na, mu pan mu o le nyuŋgo, wre Roman waŋgra biile, fuŋga pe chaa mbe o wɔɔ wa, mbe ndro wa chin rɔ? Ɔɔhɔn, e ti mbe pre titi paan o wɔ.”
38 Ŋga prosie pre na sɛ kee ŋga yo ma kalalifɛɛnlɛ pre pan kre, fiɛrɛ na ndru mu pe yii. Ŋgi na hin? Paul na Silas rɛ, Roman waŋgra biile titi na lɛ.
39 A pra pan mna pe ŋga dipim, mna pe wɔ nyuŋgo kre nu, mna pe tali na pe yili chia kre na.
40 Ŋga pra yili nyuŋgo wa kre, a pra sɛ Lydia katoo, mna sɛ pe wolo shɔnlifɛɛnlɛ pre fni wa, mna paara pe pan, mu pe le gbeŋmba, mna yire wa mna to kolo mu sɛ.