Leele Mblɛ Pe N Pe Judae Na Moses Mbra
15
Nyjila ŋga nu Paul na Barnabas naa wa Antioch na kre, bilɛ plɛ na yiri Judea tra nu mna pan wa, mna na shɔnlifɛɛnlɛ pre nyina na, fɔna pe taa Moses paala yire na, mbe pe pe fɛnyi knumu, kre pie chiin ŋmaashɔmu ta.
2 A Paul na Barnabas na pre na ki kakra li, mna peyɛ wie kee bɛɛlɛ tataara mu sɛ yiɛ. Ŋga kra pan ma kre, a pra leele plɛ wɔ mna ya Paul na Barnabas na, na pe sɛ Jerusalem na, mbe sɛ kee kre yiɛ cha chiriri bitumblɔ pre, na loplombo pre pan.
3 Ŋga pra pe tun a praa shie kre, pra tro Phoenicia, na Samaria na, mna yo shɔnlifɛɛnlɛ pre pan, imi na leele mblɛ pe n pe Judae pre kee kre shɔnli, mu pe jawala chinɛ. Kre kee ŋga na pan na yɛshɔɔrɔ ni shɔnlifɛɛnlɛ pre nu titi.
4 Ŋga pra le Jerusalem na kre, shɔnlifɛɛnlɛ pre, na bitumblɔ pre, na sumifɛɛnlɛ loplombo mblɛ praa wa wa pre, na pe ŋga mmaŋge chiriri. A pra pe nyina nyjɛ Nyiɛkpɔɔ na pe tɛɛ mu pe.
5 Bawa Pharisee leele shɔnlifɛɛnlɛ mblɛ praa wa pe nu pre, na yiri mna yo na ki fna mbe pe mblɛ pe shɔnli pre fɛnyi knumu, mbe pe taa mbra nyjɛ Moses na pe ŋga yire na.
Bitumblɔ Pre Na Sɛ Jerusalem Na
6 A bitumblɔ pre, na loplombo pre na sɛ fni mbe kee kre jawa.
7 Ŋga pra kee kre kna na peyɛ ni chiin kre, Peter na yiri mna yo pe pan mbo, “Ni wolo, yire titi chin na jle kre, Nyiɛkpɔɔ na ni wɔ e nu, na ni nyu kayooro na kie yire mbe leele mblɛ pe n pe Judae pre Nyiɛkpɔɔ ketaan kre loo, mbe shɔ mbe li.
8 A Nyiɛkpɔɔ ŋmba u ndro loloŋgo kee chin wre, na pe dansiɛrɛ li na Kpra Ŋumu wre u pe ŋga wre ni, imi na wra o ŋga u wi kre.
9 Nyiɛkpɔɔ nsra nyina na, o yili oyɛ na pe ni. La, wra pe shɔnlie le, mna nɛɛrɛ laa pe na.
10 Kena yira ŋgi ki tia, e na Nyiɛkpɔɔ pini na le, na kee nyjɛ wre na o tolɛɛlɛ pre kuraa n da mu pe tun, wru na twanfɛɛnlɛ pre pini ŋga hin?
11 La, o shɔnli na Yesu Kristo dumiɛ kre ni we o shɔ, imi na u pe shɔ kre chɔɔ.”
James Paarahaa
12 Ŋga kra pan ma kre, lenɛɛrɛ pre na pieri na Paul na Barnabas kawako kee nyjɛ Nyiɛkpɔɔ yire pe na mu pe leele mblɛ pe n pe Judae pre nu yire ndru.
13 Ŋga Paul na Barnabas na paara, a pe nyu na to kre, a James na yiri mna paara mbo, “Ni wolo, e le, e ndie tɛɛ ni pan.
14 Simon Peter paaraa kre nu kre, u nyina imi na Nyiɛkpɔɔ na klu mna uyɛ wɔ mna leele mblɛ pe n pe Judae pre nyina, mna plɛ wɔ pe nu, mu le u mɛɛ nu.
15 Yire kee nyjɛ Nyiɛkpɔɔ kee nyanyofɛɛnlɛ na yo mu tɛɛ kre mbo,
16 ‘Nyjɛ krɛrɛ kɔkro kre,
mbe ndru mbe David ŋunumulie,
ŋga kra to kre yire,
mbe u sele ndro ŋga ki yi na.
17 Imi kie pe mbe leele hamblɛ pre Nyiɛkpɔɔ haa cha.
Hali leele mblɛ pe n pe Judae mblɛ ni yeeri mu pan ni mɛɛ nu kre kro.
18 O Tafun Nyiɛkpɔɔ wra tia pe kee nyjɛ krɛrɛ chin mu yire jle kre,
wre wra kee ŋga yo.’a
19 Kena kee ŋga ni ta mbe yo yi na, yaa shia leele mblɛ pe n pe Judae mblɛ pe chinɛ mu Nyiɛkpɔɔ chin pre tɔɔra.
20 La, ki fna mbe o nyunɔ mbe sɛ pe ŋga, na pia na sɛɛn jaara sro lii, a pia na tiɛri, a pia na yurɔ ŋmba nyimi yi n wo tra kaa, a pia na nyimi kaa.
21 Jle kre, na pe Moses mbra yire tɔɔnri na pe nyina, pe fninyinyi yire nu nyjila kro nu Wuuble.”
Leele Mblɛ Pe N Pe Judah Shɔnlifɛɛnlɛ Pre Hlɛ
22 Ŋga kra pan ma kre, a bitumblɔ pre na loplombo pre, na sumifɛɛnlɛ pre kro, na ki jawa na ki fna pe leele plɛ wɔ, mbe ya Paul na Barnabas na, mbe pe sɛ Antioch na. A pra Judas ŋmba praa yeeri Barsabbas wre, na Silas wɔ mna ya pe na. Pre leele mblɛ shɔnlie na kpɔɔ.
23 A pra hlɛ nyunɔ mna le pe kɛɛ mbo,
“Wre bitumblɔ, na loplombo, na o wolo mblɛ pee wa mna pre kro, o o wolo mblɛ pe n pe Judae mblɛ pee wa Antioch, na Syria, na Cilicia na pre shaari.
24 O loo na leele plɛ na yili o nu mna pan mu e tɔɔra chiin na kaalɛɛ ni, mu tia e jawala n to e nu, a nde o nsra ndro tun.
25 Ki tia ŋga o ki loo kre, a o nyu nunu ta, na ki fna mbe o leele wɔ mbe ya o wolo Paul na Barnabas na.
26 Pre leele mblɛ pe peyɛ wɔ mu tɛɛ, hali na kumu yi, pie ku o Tafun Yesu Kristo wre ndra na, ki tia o pe tun na pe pan wa.
27 Kena Judas na Silas rɛ, pre pie paan o kala ŋga o nyunɔ e pan kre yo e pan na nyu ni.
28 Ki nyu wre na Kpra Ŋumu wre pan na, waa kee kpɔɔ ka taa e na, fɔna mbra nyjɛ yi shian yire.
29 Ki fna mbe e eyɛ wɔ mbe yili sra nyjɛ e woni na sɛɛnlɛ kaan yire nu, na nyimi, na yurɔ ŋmba nyimi ki n wo tra, na tiɛrɛɛ nu. Kena na e ja mu eyɛ wɔ mu yili yire kee nyjɛ nu kre, kena e ka pe titi.
A Nyiɛkpɔɔ we ya e na.”
30 Ŋga pra sɛ pe wa kolo kre, a pra sɛ Antioch na. Ŋga pra le kre, a pra tia sumifɛɛnlɛ pre kro na fni, a pra hlɛ kre wɔ mna pe ŋga.
31 Ŋga pra hlɛ kre tɔɔnri mu loo kre, pe yiɛ na shɔ, imi na pra paara mu pe nyina hlɛ kre nu kre na.
32 Bawa Judas na Silas, mblɛ pra pe Nyiɛkpɔɔ kee nyanyofɛɛnlɛ pre na yiri mna paara, mna pe nyina tataara, mna pe le gbeŋmbaa.
33 Ŋga pra tni wa mna ble chiɛri yɛ li kre, a shɔnlifɛɛnlɛ pre praa wa wa pre na pe wa kolo na wejinyiŋge ni, a pra ndru mna sɛ mblɛ pra pe tun pre jaara.
34 Silas rɛ, wre na yo na ki fna mbe u tni Antioch na wa chiɛri.
35 A na kre nyjila kre, na Paul na Barnabas, na leele tataara wa Antioch na wa, na o Tafun wre ketaan kre yuu na leele nyina.
Silas Na Le Barnabas Titɛɛ
36 Ŋga pra tni wa ble chiɛri yɛ kre, a Paul na yo Barnabas pan mbo, “Ti mbe o ndru mbe tro chiɛ nyjɛ na o na o Tafun wre kee kre yo mu tro yire na, mbe pe le imi na pe nyi.”
37 A Barnabas naa chaa mbra John Mark wru mbe taa pe na.
38 A Paul na kna mbo, “Ki n fna mbe o ndro ŋmba wra o ti Pamphylia na mna ndru o kro wre wru mbe taa oyɛ na na.”
39 Kre kee ŋga na, pe nyu nsra soo, a kra tia pra yɔɔlɛ. A Barnabas na Mark bali mna ya uyɛ na, a pra sɛ krɔ bali mu sɛ Cyprus na.
40 A Paul na Silas bali mna ya uyɛ na, a shɔnlifɛɛnlɛ pre na pe wru mu le Nyiɛkpɔɔ kɛɛ, a pra sɛ.
41 A pra tro Syria na Cilicia tra yire nu, mna sumifɛɛnlɛ pre le gbeŋmbaa.