Pra Fɛ Mu Sɛ Iconium Na
14
Ŋga pra le Iconium na kre, a Paul na Barnabas na sɛ le Judae pre fninyuŋgo ka nu, mna ketaan kre yo wa na. A Judae pre, na mblɛ pe n pe Judae pre tataara na kee kre shɔnli.
2 A Judae ndikambla mblɛ praa wa wa pre, na kanyaa le leele mblɛ pe n pe Judae pre nu, mna pe ŋga jawala fɔɔn mu tro shɔnlifɛɛnlɛ pre haa.
3 A Paul na Barnabas na tni chia kre na mna mu, mna gbuntitirem tɛɛ na o Tafun kee kre yuu. A o Tafun wre titi na u kee kre praa yuu kre dansiɛrɛ li, mna yire pe na mu kawako kee pe tataara wa.
4 Ŋga kra pan ma kre, chia kre leele pre na peyɛ yɔ shiin, a plɛ na taa Judae pre kro, a plɛ naa wa bitumblɔ pre kro.
5 A kra pan na leele mblɛ pe n pe Judae pre, na Judae pre, na pe loplombo kro na pe jawala pe na, pe shie mbe sɛ Paul na Barnabas fiŋge, mbe pe waari na dnɛ ni.
6 A pra ki chin, mna fɛ mu sɛ Lystra, na Derbe, na seechiɛ nyjɛ yii wa Lycaonia tra nu yire na.
7 A pra tni wa mnaa ketaan kre yuu.
Fna Wa Tra Haa
8 Kre nyjila kre, na fna blɔ waa wa Lystra na wa, mu fuuru mu yire u bimi, ki tia u nsra da mu yiri mu nyaari.
9 Ŋga wra loo na Paul ketaan kre yuu kre, wra ndie tɛɛ na kee kre ndru, a Paul na u le dumm, mna nya na shɔnlie wa u nu na we saanla.
10 A Paul na fuu mna yo mbo, “Le, yiri mu yire sholo!” To, a blɔ wre na taan mu yiri mu yire, na nyaari.
11 Ŋga lenɛɛrɛ pre na kee ŋga Paul na pe kre nya kre, a pra kna na yuu Lycaonia yolo nu mbo, “Wolo, sɛɛnlɛ yi kna leele mu pan mu chaa o nu.”
12 A praa Barnabas yeeri Zeus, pe sɛɛn ka mɛɛ na, mna Paul ŋga Hermes, na Paul rɛ, na wre wi pe paarafun, kena pra wre mɛɛ tɛɛ pe sɛɛn ŋga kraa paara kre na.
13 A Zeus ŋga nyuŋgo kraa wa chia kre nyu na kre kɔmfoɔ na sɛ nablɛm plɛ yii, na toto nyjɛ pe pɔ ni, mna pan na yi ni chia nyu na wa na chaa mbe wre na lenɛɛrɛ pre pe gbo mbe sra wɔ.
14 Ŋga Paul na Barnabas na kee kre loo kre, kra pe yaa kuraa mu tro, a pra pe dodonyi tini mu knumu peyɛ na, mna gble fɔɔri mu le, mna tin mu sɛ le lenɛɛrɛ pre nu, mna kna mu yo pe pan mbo,
15 “Bilɛ, e le, mni a e na pini ma hin? Leele lɛ wre chɔɔ na yire lɛ, a o pan na ketaan kre yuu e pan, na e laa sɛɛnlɛ wɛɛ nyjɛ kro, e pan e taa Nyiɛkpɔɔ ŋmba wa ku wre kro. Wre u nyjeeri na tra gbeele, na epo na yirɛ nyjɛ yii wa yi nu kro ni.
16 Nyjila ŋga ki pan mu tro kre, wre wra waŋgra leele kro ŋga kolo, na pra tro kolo ŋga pre titi chaa na.
17 A nde wra tia pra chin na uu wa na pe pini chichie, mu tia nyiɛ na paan pe pan, na kaan sro yi nyjila nu, mbe sro bɔ pe pan, mbe ki ti mbe pe yɛshɔɔrɔ ta.”
18 Ŋga Paul na Barnabas na yire kee nyjɛ yo leele pre pan, a pra loo kre, bawa pra ja mna leele pre sɔɔnrɔ gbo chiɛri, a pra sra kre wɔɔ ti.
Pra Paul Waari Na Dnɛ Ni
19 A Judae plɛ na kɔ mu yiri Antioch, na Iconium na, mna pan Lystra na, mna pan mu paara mu leele pre gbee, a pra Paul waari na dnɛ ni, praa jawa na u ku, a pra u fulo mu sɛ u wa chia kre mbookrɔ.
20 Ŋga twanfɛɛnlɛ mblɛ praa wa wa pre na sɛ Paul kun mu le lalaa kre, a wra yiri mna le chia lam. Ŋga nyiŋge na se, a wre na Barnabas na sɛ Derbe na.
21 Ŋga pra sɛ ketaan kre yo wa kre, pra twanfɛɛnlɛ tataara ta wa, a pra pe jawala chinɛ. A Paul na Barnabas na ndru mna sɛ Lystra, na Iconium, na Antioch na.
22 Bawa pra sɛ gbeŋmbaa le twanfɛɛnlɛ mblɛ praa wa wa pre nu, na pe tni shɔnlie kre nu, mna pe nyina na oo kala nya tataara mbe chiin sɛ Nyiɛkpɔɔ ŋunumu kre nu.
23 Bawa Paul na Barnabas na loplombo wɔ shɔnlifɛɛnlɛ pre fni ndoe yire nu, a pra blefuun, na nyiɛtalaa wru, mna pe wru mu le o Tafun ŋmba pra shɔnli wre kɛɛ.
Pra Tni Antioch Na
24 Ŋga pra yiri wa, a pra tro Pisidia tra nu, mna sɛ to Pamphylia tra na.
25 A pra ketaan kre yo Perga na, mna yire wa mna sɛ Attalia na.
26 Ŋga pra yiri wa kre, a pra krɔ wru mna ndru mu sɛ Antioch na, chia ŋga na pra pe wru mu le Nyiɛkpɔɔ kɛɛ, a pra chin mu sɛ kre.
27 Ŋga pra le kre, a pra shɔnlifɛɛnlɛ pre kro fni titɛɛ, mna kee nyjɛ Nyiɛkpɔɔ na pe tɛɛ mu pe yire krɛrɛ yo pe pan, na imi na Nyiɛkpɔɔ sɛ shɔnlie kolo nyaa mu leele mblɛ pe n pe Judae pre ŋga.
28 Pra tni twanfɛɛnlɛ pre ni Antioch na wa mna mu.