Pra Sɛ Ketaan Kre Kpali
13
Sumifɛɛnlɛ pre praa wa Antioch na pre, Nyiɛkpɔɔ kee nyanyofɛɛnlɛ, na ketaan kre nyinafɛɛnlɛ naa wa pe nu. Barnabas, na Simeon ŋmba praa yeeri lewɔɔ wre, na Lucius ŋmba wra yiri Cyrene na wre, na Manaen ŋmba pra wre na Ŋunu Herod chaa mu pɔɔri katoo nunu nu wre, na Saul, pe kro naa wa wa.
2 Ŋga praa wa wa na Nyiɛkpɔɔ sumi, na ble funi kre, a Kpra Ŋumu wre na yo pe pan mbo, “E Barnabas, na Saul wɔ e ni ŋga mbe pe sɛ tnumu ŋga na ni pe yeeri kre tun mbe ni ŋga.”
3 Ŋga kra pan ma kre, pra blefuun, na nyiɛtalaa wru mna kɛnyi taa taa pe na, mna pe wa kolo, a pra sɛ imi na Kpra Ŋumu wre na yo pe pan kre.
Pe Sɛ Cyprus Na
4 Ŋga Kpra Ŋumu wre na pe tun kre, a pra sɛ Seleucia na, mna yiri wa mna sɛ krɔ bali mu sɛ Cyprus na.
5 Ŋga praa shie mna da Salamis na kre, a pra tii wa mna Nyiɛkpɔɔ kee kre yo Judae pre fninyinyi yire nu. Na John ŋmba praa yeeri Mark wree wa mu ya pe na.
Sergius Paulus Na Elymas
6 Ŋga pra epo lalaa tra kre kila mna sɛ da Paphos na kre, bawa pra Judae wo kafinɛ Nyiɛkpɔɔ kee nyanyofun, dobodobofun wa da, u mɛɛ naa Bar-Yesu.
7 Wre wraa wa, mna mbra waŋgra lopom Sergius Paulus kachiŋu wre na. Wre waŋgra lopom ŋmba wra Barnabas, na Saul yeeri, mnaa chaa mbe pe Nyiɛkpɔɔ kee yo mbe u loo.
8 Wre Bar-Yesu ŋmba pra ndru na yeeri Elymas Greek yolo nu, a wraa dobodobo woni, na pe nyu kaanri, mbe lopom wre wa pe ketaan kre shɔ mbe li.
9 Bawa Saul ŋmba praa yeeri Paul wre, ŋmba nu Kpra Ŋumu wre na nyi wre na blɔ wre le dumm,
10 mna kna mbo, “Ŋu Sutna pɔ. Ŋu ŋmba mu kee chichie fun, na kala fnɛ, na leele fana kre, ma Nyiɛkpɔɔ kefrakaa kre fɛɛlɛɛ tii?
11 Le, o Tafun wre we kɛ laa mu na, mbe mu fun nyiɛlɛ na, mbe ma yila nya, mbe sɛ su nyjila ŋga wre titi chaa nu.”
Titɛɛ kre nu to, na lawee pe u yiɛ na suu, mna wɔ u yiɛ na, a wra kaari fuun, a wraa ndro chaa mbe u u yii kɛ na.
12 Ŋga abani lopom wre na kee nyjɛ nya ma kre, o Tafun kee kre na pe u pan kawako ni mu tro, a kra tia wra shɔnli.
Pisidian Na Antioch
13 A Paul na u wolo pre na yili Paphos na, mna tni krɔ nu mna sɛ Perga ŋga kii wa Pamphylia tra nu kre na. Bawa John Mark na pe ti, mna ndru mu sɛ Jerusalem na.
14 A pra yili Perga na, mna tro mu sɛ Antioch ŋga kii wa Pisidian tra nu kre nu. Ŋga pe Wuuble na to kre, a pra sɛ tni Judae fninyuŋgo wa.
15 Ŋga pra Moses mbra yire tɔɔnri, mna Nyiɛkpɔɔ kee nyanyofɛɛnlɛ hlɛ yire tɔɔnri mu kɔ kre, a fninyuŋgo wa loplombo pre na tia pra sɛ pe wie mbo, “O wolo, na ee wa na kee ka ni mbe paara mbe leele pre nyina kre, ee jaa paara.”
Paul Paarahaa Antioch Na
16 Bawa Paul na yiri mu yire, mna kɛ wa pe pan mbo, “Israel bilɛ na yire mblɛ e n pe Judae, mu na Nyiɛkpɔɔ fiɛ kre, e ni kee ŋga loo.
17 Nyiɛkpɔɔ ŋmba Israel leele sumi wre, wre wra o tolɛɛlɛ wɔ mna pe pe lekpɔɛ nyjila ŋga ni praa wa Egypt tra nu, mna u jaŋga tɛɛ mna pe wɔ pe tnimu nu.
18 A pra ndikana pe u na, ande wra pe dumbrɛ yɛlɛ fuloe shiin tablɔ tra kre nu.
19 Ŋga pra sɛ da Canaan tra nu kre, Nyiɛkpɔɔ na tia pra waŋgrɛ nununu kɔɔnashin kla, a wra pe trɛ yire wru mu pe ŋga.
20 Kre kɔkro, Nyiɛkpɔɔ na pe ŋga yɛkulo, mna sɛ su Nyiɛkpɔɔ keenyanyofun Samuel na, yɛlɛ lafɛɛ jijirɛ na fuloe shiin na kɛ nyu na.
21 Kre nyjila ŋga kɔkro kre, a pra Nyiɛkpɔɔ tali na u pe ŋga ŋunu. A Nyiɛkpɔɔ na pe ŋga Saul, Kish pɔ, ŋmba wra yiri Benjamin sele nu wre, a Saul na ŋunumu li yɛlɛ fuloe shiin.
22 Ŋga Nyiɛkpɔɔ na Saul kɔ jɔɔn na kre, a wra tia pra David tɛɛ ki na, ŋmba dansiɛrɛ Nyiɛkpɔɔ na li mna yo mbo, ‘Ni nya na David, Jesse biblɔ wre pe ni loloŋgo ndro, ŋmba we kee nyjɛ ni chaa pe mbe ni ŋga.’
23 Wre David ŋmba kɛ leele na Nyiɛkpɔɔ yire mu Israel leele ŋga Yesu ŋmaashɔfun ŋmba nyu wra le kre.
24 Ŋga Yesu nsra ta mu u tnumu nɔɔ hle kre, na John klu mu na jawala chinɛɛ, na ndrɛ jee kee kre yuu Israel leele kro pan.
25 Ŋga John naa shie mbe sɛ u tnumu nyu le kre, wra pe wie mbo, ‘E jawa na mi wi ŋmaashɔfun wre ree? Mi ma, la, uu wa ni kro na paan, a mi n fna na u kpawrɛ kuraa, mbe kɛ taa yi na.’
26 Kena ni wolo Israel leele, yire Abraham kɛ leele, na yire mblɛ e n pe Judae mu na Nyiɛkpɔɔ fiɛ kre, wre na yire kro pe nyina kolo ŋga na oo tro, mbe ŋmaashɔmu kre ta.
27 Jerusalem leele, na pe loplombo pre nsra chin na pe ŋmaashɔfun wi, ndee mna kee nyjɛ Nyiɛkpɔɔ kee nyanyofɛɛnlɛ pre na yo mu tɛɛ, a praa yi tɔɔnri nyjila kro nu Wuuble yire nɔɔloo. Kre ndra na, pra u gbun kumu pimi ni, imi na pra ki nyunɔ mu tɛɛ fa na kie pe kre chɔɔ.
28 A nde pe nsra pimi kee chiriri ka ta mna u taan, na ki fna mbe u ku, nde pra je mna tia Pilate na u gbo.
29 Ŋga pra u pe kee nyjɛ pra nyunɔ mu tɛɛ fa yire krɛrɛ mu kɔ kre, a pra u laa kaan kre na, mna sɛ u le dnɛwee ka nu.
30 A Nyiɛkpɔɔ na u nyi mna yili kuulo nu.
31 A wra uyɛ wɔ ble tataara nu, mna wre, na mblɛ pra yiri Galilee na mna sɛ Jerusalem na pre nyina. Pre lɛ u dansiɛfɛɛnlɛ waŋgra kro nu.
32-33 Kena e chin na fa kre, Nyiɛkpɔɔ na u nyu yo o tolɛɛlɛ pre pan. A u Yesu nyi mu yili kuulo nu, mu li u nyu kee kre na. Kre kee o pan mbe yo e pan kre, imi na pra ki nyunɔ Mɛɛ hlɛ shiinwo kre nu kre mbo,
‘Ni Biblɔ wi ŋu, aŋga ni mu se.’a
34 A ŋga kra nyina na ŋga Nyiɛkpɔɔ u nyi kre, na wa fɔɔn na kre, a pra ki nyunɔ mu tɛɛ mbo,
‘Mbe mu ŋga dwamu cheche,
ŋga nyu ndaa yo ŋunu David pan kre.’b
35 Kre ndra na wra yo Mɛɛ hlɛ kre lawee fɔŋgɔ ka nu na mbo, ‘Mba ti mbe ni Ndro Cheche wre fɔɔn wee.’c
36 La, David ŋmba pan Nyiɛkpɔɔ na kee nyjɛ yo wre, wra sumi imi na kra fna Nyiɛkpɔɔ pan. A wra kɔ mu ku, a pra sɛ u le lawee ŋga nu pra u lɛɛlɛ le, a wra fɔɔn wee.
37 La, ŋmba Nyiɛkpɔɔ nyi mu yili kuulo nu wre, u n ja mu fɔɔn wee.
38 Kena ni wolo, e ja e chin na wre Yesu ŋmba na ki nyaari, a o na sisam tinkɛɛ kee yuu na e nyina kre.
39 U jaŋga nu, ŋu ŋmba mu u shɔ mbe li kro we sisam tinkɛɛ ta, ŋga Moses mbra wa jaa pee mu ŋga.
40 Kena e eyɛ le chichie, mbe kee yire Nyiɛkpɔɔ kee nyanyofɛɛnlɛ pre yo mu tɛɛ yire, waa shia pan e na.
41 ‘E le, yire mblɛ e pna Nyiɛkpɔɔ kee ni,
ni paan mbe kee ka pe e nyjila ŋga nu,
ee kawa na ki ni, mbe kuu fun.
Ŋgi na hin? Yaa ki shɔ mbe li,
hali, na ndro u ki yo e pan,
yaa ki shɔɔ li.’”d
42 Ŋga Paul na Barnabas na yili pe sumindoo wa mbe sɛ kre, a leele pre na pe tali na pe paan paara mbe pe nyina Wuuble ŋga kie pan kre nu.
43 Ŋga pra paara mna kɔ mbe nyina kre, a Judae pre, na leele mblɛ pe n pe Judae mblɛ praa wa Judae sumiɛ nu kre tataara, na taa Paul, na Barnabas kro. A pra sɛ paara mu pe le gbeŋmbaa, na pe tni Nyiɛkpɔɔ dumiɛ kre nu.
Bitumblɔ Pre Sɛ Leele Mblɛ Pe N Pe Judae Pre Lawee
44 Ŋga pe Wuuble na ndru mu to na kre, chia kre leele pre nɛɛrɛ na sɛ fni mbe Nyiɛkpɔɔ kee loo.
45 Ŋga Judae pre na lenɛɛrɛ pre nya ma kre, kra pe pe nyibinyiɛ kpɔɔ, a pra sɛ na paara na Paul kee yire wraa yuu na leele pre nyina yire lii kakra, na u tɛɛlɛ.
46 Bawa Paul na Barnabas na paara pe pan gbuntitirem ni mbo, “Kaa ki fna mbe o na klu mbra ketaan kre yo yire Judae pan. La, mu yire ŋga e na kee kre je, mu nyina na e n fna blenyini ŋmaa ni kre ndra na, ki tia oo kna mbe sɛ na ki ni leele mblɛ pe n pe Judae pre nu.
47 Pan o Tafun wre na paara mu yo o pan mbo,
‘Ni e wɔ, mbe e pe leele mblɛ pe n pe Judae pre kaniɛ,
mbe e sɛ waŋgra kro nu,
mbe sɛ pe ŋga ŋmaashɔmu kee kre.’”e
48 Ŋga leele mblɛ pe n pe Judae pre na ki loo ma kre, pe yiɛ na shɔ, a pra tia Nyiɛkpɔɔ kee kre yiɛ na yili. A pe mblɛ o Tafun na wɔ mbe pe blenyini ŋmaa ta pre na shɔnli.
Wraa Shie Na Pe Ni Iconium Na
49 Ŋga kra pan ma kre, Nyiɛkpɔɔ kee kre na kpali mu tro tra kre nu kro.
50 A Judae pre plɛ na kanyaa le chia kre bilɛ, na chiɛlɛ sumifɛɛnlɛ titie plɛ nu, a pra yiri mna Paul na Barnabas taan, a pra pe ni mu yili pe tra kre nu.
51 A pra yili tra kre nu, mna pe jeelee lam tra pɔ mu wo wa, mbe ki pe sisam dansiɛrɛ li. A pra sɛ Iconium na.
52 La, twanfɛɛnlɛ pre pra kro Antioch na pre na yɛshɔɔrɔ ta, a Kpra Ŋumu wre na pe nyi.