Pra Peter Le Nyuŋgo
12
Kre nyjila kre nu Ŋunu Herod na yiri, mna shɔnlifɛɛnlɛ pre plɛ fiŋge imi na ki fna.
2 Wra John chunu James gbo na brɔfiɛn yiɛshiin ni.
3 Ŋga Herod na nya na kee kre wra pe kre tna Judae pre pan kre, a wra tia pra sɛ Peter yii na, na kre nyjila kre pe pe Klɛntro ble yire lii.
4 A wra yila ki na mna tia pra sɛ u le nyuŋgo, mna u wru mu le sojae feko jijirɛ kɛɛ, a praa u sri. Feko yire kro naa leele jinyjirɛnyjirɛ. Herod na u jawala pe na, na pe Klɛntro ble yire li mu kɔ, mbe u u wru mbe Judae pre ŋga, mbe pe u kala li.
5 Kra tia Peter naa wa nyuŋgo wa. La, shɔnlifɛɛnlɛ pre na sɛ nyiɛtali kpɔɔ mu u ŋga.
Bituŋu Wa Na Peter Wɔ
6 Ŋga kra kro ble nunu, mbe Herod Peter wɔ nyuŋgo mbe pe sɛ u kala li kre, ki blee, na Peter wa mu sni sojae shiin lalaa, a pe jlɔnyi tɛɛ mu u pɔ, a lawee kre shiefɛɛnlɛ wa mu yire yire krɔ kre nyu na na u sri.
7 Titɛɛ kre nu, na Nyiɛkpɔɔ bituŋu wa wa na pan mu yire u jaara, a nyuŋgo kre lam fniŋge poŋgo na kaniɛ ni pe le wa. A wra Peter gbun mu nyi mbo, “Yiri nyaanyaa.” Titɛɛ kre nu to, a jlɔnyi nyjɛ ni pra u pɔ kɛnyi na yire na pile mu wo.
8 A Nyiɛkpɔɔ bituŋu wre na kna mu yo u pan mbo, “Muyɛ grere, mu mu kpawrɛ le.” A wra uyɛ kna. A wra ndru mu yo u pan mbo, “Mu yoŋgo wru mu taa ni na.”
9 A Peter na yiri mna taa u kro. Kre nyjila kre krɛrɛ na u n chin na keyɛŋgɛ ki pini, wraa jawa na yirɛ u nyaa nyiɛlɛ na.
10 A pra shiefun ŋmba wra yiɛklu wre tro, mu shiinwo wre tro, mna pan mu da tɔɔnrɔ krɔ kre na, mna mu tro mbe to lete na kre. Titɛɛ kre nu, na krɔ kre titi nyaa kiyɛ. A pra yili fimi na, mna to lete kre na na shie to, a Nyiɛkpɔɔ bituŋu wre na fun u yiɛ na.
11 Bawa Peter yiɛ na chin mu cheeri u na, a wra kna mbo, “Fuŋga ni chin na Nyiɛkpɔɔ u u bituŋu tun, na u pan mbe ni wɔ mu yili Herod kɛɛ, na kee nyjɛ Judae wra ni pe nu.”
Shɔnlifɛɛnlɛ Pre Yɛshɔɔrɔ
12 Ŋga Peter yiɛ na cheeri u na wa kre, a wra sɛ Mary ŋmba pɔ na wi John ŋmba praa yeeri Mark wre katoo. Na kre katoo kre nu shɔnlifɛɛnlɛ pre tataara sɛ fni na nyiɛtali.
13 A Peter na sɛ pe jlonwee nyu krɔ kre koori, a bichable tnu wa (U mɛɛ naa Rhoda) na pan mbe krɔ kre nyaa.
14 Ŋga wra da krɔ kre na mna Peter mana loo kre, ki yɛshɔɔrɔ ndra na, u nsra krɔ kre nyaa, a wra fɛ mna sɛ yo shɔnlifɛɛnlɛ pre pan mbo, “E le! Peter wa mu yire krɔ kre kro.”
15 A pra kna mu yo bichable wre pan mbo, “Tɔɔlɔ mu tɔɔlɔ kre.”
A wra je mbo, “Yɛŋgɛ na ni nyi.”
A pra kna, mbo, “Kena u Nyiɛkpɔɔ bituŋu wi hin.”
16 Na Peter wa mu yire na krɔ kre koori, a pra sɛ krɔ kre nyaa, na Peter wi yɛŋgɛ, a kra pe pe kawako ni mu tro.
17 A Peter na kɛ wa pe pan, na pe pieri. A wra yire wa mna pe nyina imi na o Tafun wre na sɛ u wɔ nyuŋgo wa. A wra kna mu yo pe pan na pe sɛ kee yire krɛrɛ yo James, na shɔnlifɛɛnlɛ hamblɛ pre pan. A Peter na yili wa mna sɛ ndoo ka nu.
Pra Lawee Shiefɛɛnlɛ Shiin Pre Gbo
18 Ŋga nyiŋge na se, a sojae mblɛ praa lawee kre sri pre na yiri mu Peter cha mu la kre, pra nyjira peyɛ nu, na jawa na yira ŋgi ki Peter wru hin?
19 Ŋga Herod na kɔ mu Peter cha mu la kre, a wra shiefɛɛnlɛ pre wie imi na ki le, mna tia pra pe gbo.
Herod Kumu Na Pe Kawako Ni
Herod na kɔ mu yiri Judea tra nu, mna sɛ tni Caesarea na.
20 Kra kɔ mu pan na Herod krɔ na kun na Tyre leele, na Sidon leele ni. A yire chiɛ shiin nyjɛ leele na nyu nunu pe, mna sɛ to ŋunu katoo lopom titi wa na, u mɛɛ naa Blastus, mbe u sɛ Herod tali pe pan. Yaka ma kra tia, na ŋunu wre tra na pe sro taa na lii.
21 Ŋga ble ŋga pra tɛɛ mbe kala kre yo na da kre, Herod na u ŋunumu dodonyi le, mna sɛ tni u jɔɔn na, mna paara leele pre pan.
22 A leele pre pra fni wa pre kro naa gble na yuu mbo, “Nyiɛkpɔɔ u paara kre, ki n pe lewo mana yi.”
23 Titɛɛ kre nu wa to, a Nyiɛkpɔɔ bituŋu na pan mna tia yira na Herod gbun, a wra yaa. Ŋgi na hin? Wra Nyiɛkpɔɔ yɛnyiŋge shɔ mu uyɛ ŋga. A kra tia dɔmblɔ na yili u nu, mna u ka mu gbo.