4 A Peter na chin mu yire wa, mna pe nyina kee kre nɔɔ nununu imi na kra le mbo,

5 “Ki ble ka ndaa wa Joppa na, na nyiɛtali. Bawa ndaa nya nyiɛlɛ na, na yira ka na pe na mbɔfiŋge yi badaaŋga, a pe ki pɔ ki jeŋgle jijirɛ na, mna yiri nyjeeri mu tii tra ni yiɛ tata.

6 Ŋga ndaa ki le chiriri kre, na yurɛ mblɛ pee wa tra ŋga na kro plɛɛ wa ki nu, puɛ yurɛ, na hanyiɛlɛ, na yurɛ mblɛ pe fulo gbun na kro.

7 Bawa ndaa loo na mana ka yuu ni pan mbo, ‘Peter yiri, ta kuu mna kaa.’

8 A ndaa kna mu yo mana kre pan na, ‘Ɔɔhɔn ni Tafun, yira ŋga pe fun, na ŋga ki n pe cheche n da mu le ni nyuu tun.’

9 A mana kre na ndru mu yo ni pan shiinwo na mbo, ‘Yira ŋga Nyiɛkpɔɔ yo na ki pe cheche kre, maa shia yo na ki n fna liwo.’

10 A kra pe ma gbee taarɛ, a pra ndru mu ki tini mu sɛ nyjeeri.

11 Kre nyjila kre nu, na pe bilɛ taarɛ plɛ tun ni pan, mu yiri Caesarea na, a pe pan mu yire ni katoo nyu na.

12 A Kpra Ŋumu wre na yo ni pan na ni yiri mbe sɛ, la, mbaa shia pe jawa na leele mblɛ pe n pe Judae lɛ. Ni wolo kɔɔnanu mblɛ, pre pra sɛ ni tɛɛ, a o na sɛ le blɔ wa katoo.

13 A blɔ wre na o nyina imi na Nyiɛkpɔɔ bituŋu wa na uyɛ wɔ mu u nyina u katoo, mna yo u pan na u ndro wɔ mbe u sɛ Joppa na, mbe sɛ Simon Peter yeeri mbe u pan.

14 Wre we ketaan ŋga kie ŋu na mu katoo leele ŋga ŋmaa kre yo mu pan.

15 Ŋga ndaa yiri mu yire mbe paara to, a Kpra Ŋumu wre na pan pe nu, imi Kpra Ŋumu wre na pan mu le o nu jle kre.

16 Bawa ndaa kee ŋga o Tafun Yesu na yo kre sɔɔnri na, nyumu ni John naa leele ndrɛ jee, a yire rɛ, Kpra Ŋumu wre ni mbe e ndrɛ je.

17 Kena na Nyiɛkpɔɔ wre u leele mblɛ pe n pe Judae pre ŋga Kpra Ŋumu wre, imi wra o ŋga u wi, nyjila ŋga nu o na o Tafun Yesu Kristo wre shɔnli kre waa, kena mi wi ŋmbi, na mbe jaa Nyiɛkpɔɔ nyu kaala hin?”

18 Ŋga pra loo ma kre, a pe nyu na ku. A pra kna na Nyiɛkpɔɔ kaan mɛɛ mbo, “Kena Nyiɛkpɔɔ leele mblɛ pe n pe Judae pre ŋga jawala, mbe pe chinɛ mbe ŋmaa ta na.”

19 Nyjila ŋga nu prara kpɔɔ ŋga nu pra Stephen gbo kre na pan kre, shɔnlifɛɛnlɛ pre na nyina mna sɛ tni tni Phoenicia, na Cyprus, na Antioch na, mnaa ketaan kre yuu Judae pre chiin pan.

20 La, pe plɛ na pe Cyprus, na Cyrene leele, a pra sɛ Antioch na, mnaa o Tafun Kristo wre ketaan kre yuu na Greek leele pre nyina.

21 A Nyiɛkpɔɔ na ya pe na, a leele tataara na shɔnli, mna kna mu taa o Tafun Yesu kee kre na.

22 Kre kee ŋga na le shɔnlifɛɛnlɛ mblɛ praa wa Jerusalem na pre ndie. A pra Barnabas wɔ mna tun Antioch na wa.

23 Ŋga wra sɛ le mna nya imi Nyiɛkpɔɔ na nyu pe na kre, u yiɛ na shɔ. A wra pe gbeŋmba, mna yo pe pan na, pe jawala nunu ŋga kia jaa jɔŋgɔ wru, mbe tni na o Tafun wre ni kpra ni.

24 Barnabas na pe lewo chichuo ŋmba nu Kpra Ŋumu, na shɔnlie na nyi. A leele tataara na pan mu ya o Tafun wre shɔnlifɛɛnlɛ pre na.

25 A Barnabas na yire wa mna sɛ Tarsus na, mna sɛ Saul haa cha.

26 Ŋga wra u nya kre, a wra pan na u ni Antioch na wa. A pra tni sumifɛɛnlɛ pre ni yɛlɛ nyu, mna leele tataara nyina Nyiɛkpɔɔ kee kre. Kena Antioch na wa pra klu mu twanfɛɛnlɛ pre ŋga mɛɛ mbo, “Kristo wolo.”

27 Yire ble yire nu kre, Nyiɛkpɔɔ kee nyanyofɛɛnlɛ plɛ na yiri Jerusalem na mna pan Antioch na.

28 Bawa pe nunu ŋmba praa yeeri Agabus, na yiri mna yire Kpra Ŋumu wre na mna yo mbo, “Klo badaaŋga we to waŋgra kro nu. Kre klo ŋga ka kra to nyjila ŋga nu Claudius na ŋunumu li kre.”

29 A shɔnlifɛɛnlɛ pre na pe jawala pe na pie yirɛ cha, imi na pie ja, mbe Kristofɛɛnlɛ mblɛ pee wa Judea na pre chese.

30 A pra yirɛ yire wɔ mna Barnabas, na Saul tun na yi ni, na pe sɛ loplombo mblɛ pee wa Judea tra nu pre ŋga.