3 Ki ble ka, na kie pe nyjila taarɛ lafo na, a wra nya nyiɛlɛ na na Nyiɛkpɔɔ bituŋu wa pan mu na yeeri mbo, “Cornelius.”

4 A fiɛrɛ na Cornelius yii, a wra nyiɛlɛ gbli na u le, mna bituŋu wre wie mbo, “Yira ŋgi yi hin ni Tafun?”

5 Kena yiri mu ndro tun Joppa na fuŋgaami, mbe u sɛ Simon ŋmba pe yeeri Peter wre yeeri, mbe u pan mu jaara.

6 Uu wa Simon jeribaa ŋmba katoo kii wa lɔɔ nyu na kre nu.”

7 Ŋga bituŋu wre na paara u pan mu kɔ mna sɛ kre, a wra u sumifɛɛnlɛ pre shiin yeeri, mna u sojae mblɛ praa u sri pre nunu, ŋmba wraa Nyiɛkpɔɔ fiɛ wɔ mu ya, mna kee yire krɛrɛ yo pe pan.

8 Mna pe tun Joppa na, Simon Peter wre pan.

9 Ŋga nyiŋge na se, a Cornelius bitumblɔ pre naa shie mna chaa da Joppa na kre, na Peter nduu nyuŋgo ndra na lafo na, mbe nyiɛtali.

10 Kre nyjila kre na klo Peter ta, a wraa yaka chaa mbe ka, ŋga praa yaka pini u pan kre, wra yirɛ nya nyiɛlɛ na.

11 Bawa wra nya na nyjeeri nyaa, a yira ka na pe na mbɔfiŋge yi badaaŋga, a pe ki pɔ kokoe jijirɛ na, na ki trei tra.

12 Kre yira kre nu kre, na tra ŋga yurɛ mblɛ mu chin ŋga kroo wa ki nu, mblɛ pe fulo tra, na hanyiɛlɛ mblɛ pe tro nyjeeri kro.

13 A mana ka na yo u pan mbo, “Peter, yiri mu mblɛ mu chaa gbo mu ka.”

14 A Peter na kna mbo, “Ɔɔhɔn, ni Tafun. Ni n da mu yira ŋga ki n pe cheche ka tun.”

15 A mana kre na ndru mu yo u pan shiinwo na mbo, “Yira ŋga Nyiɛkpɔɔ yo na ki pe cheche kpan, maa shia yo na ki n fna liwo.”

16 Mana kre na yo u pan ma gbee taarɛ, a pra chin mna yira kre bali mu sɛ nyjeeri.

17 Ŋga kra pan ma kre, ki nsra u ndra yii. A ŋga wraa jawa na yirɛ nyjɛ wra nya nyiɛlɛ na kre nɔɔ yi ŋgi kre, na Cornelius bitumblɔ pre pan mu wie wie, a pe pe nyina a pe pan mu yire u katoo nyu na,

18 na wie mbo, “Katoo ŋga nu blɔ ŋmba pe yeeri Simon Peter wre nyi kree?”

19 Na Peter wa mu tni na u yirɛ yire u nya nyiɛlɛ na yire jawai. A Kpra Ŋumu wre na yo u pan mbo, “Le, Peter, leele taarɛɛ wa mu yire fimi na na mu chaa.

20 Kena yiri mu tii tra mbe ŋu na pre sɛ, maa shia pe li kakra, mi ni pe tun mu pan.”

21 A Peter na yiri mu tii tra, mna sɛ Cornelius leele mblɛ wra tun u pan pre da, mna pe wie mbo, “E mandiɛ hin? Mi e chaa ree?”

22 A pra kna mbo, “Sojae lopom Cornelius, blɔ ŋmba u fraka, mu na Nyiɛkpɔɔ fiɛ, a uu mɛɛ chichie ni Judae nu. Wre Nyiɛkpɔɔ bituŋu cheche wa na uyɛ wɔ mu nyina, mna yo u pan na u ti pe paan mu yeeri, mbe mu sɛ u katoo, mbe u mu nyu kee loo.”

23 A Peter na le na pe ni katoo, mna pe le, mu pe ŋga lawee a pra sni. A nyiŋge na se, a pre na Peter na yiri mu to kolo. A sumifɛɛnlɛ mblɛ praa wa Joppa na wa pre plɛ na sɛ u tɛɛ.

24 Ki nyisee na, a Peter na leele pre kro na le Caesarea na. Na Cornelius chin na pie pan, a wra u sele leele, na u nɔɔlɔ mblɛ pra mbra u na kro yeeri, a pe kro na pan mu tni na Peter sri.

25 Ŋga Peter na yili, a Cornelius na u yiɛ nya to, a wra yiri mu sɛ kosie kan u yiɛ.

26 A Peter na kɛ le u nu, mna u yire, mna yo u pan mbo, “Yiri, ndro wi mi chɔɔ na ŋu wi.”

27 Ŋga wre na Peter naa paara kre, Peter na leele nya na pe fni katoo wa tataara.

28 A Peter na kna mu yo pe pan mbo, “Yire titi e chin na o mbra n kolo ŋga mbe Judae wo, na leele mblɛ pe n pe Judae pre chaa mbe kee nunu pe, ndee mbe sɛ pe wa lawee. La, mi rɛ, Nyiɛkpɔɔ u ni nyina na, mbaa shia yo ndro wa pan na u pe lewaa, ndee u n pe cheche.

29 Kre ki tia ŋga e leele tun ni pan, a ni n je, a ni pan kre. Kena kee ŋga na e leele tun ni pan kre, e ki yo ni pan.”

30 A Cornelius na kna mbo, “Kie pe ble jijirɛ yi ŋga, imi nyu, na nii wa mu na nyiɛtali ni katoo mna, na nyjila taarɛ lafo na yi. Ŋga mbe nya na blɔ wa dodoŋgi fiŋge prupru le mu pan mu yire ni yiɛ.

31 A blɔ wre kna mu yo ni pan mbo, ‘Cornelius, mu nyiɛtalaa, na mu chichie nyjɛ mu pini yire kro le Nyiɛkpɔɔ ndie.

32 Kena ndro tun mbe u sɛ Joppa na, mbe sɛ blɔ ŋmba pe yeeri Simon Peter wre wru mbe pan mu jaara. Uu wa mu tni lɔɔ nyu na Simon jeribaa wre katoo.’

33 Titɛɛ kre nu, a ndaa yiri mu leele wɔ mu tun mu pan, a mu n je, a mu ki loo mu pan kre. Kena fuŋgaami ŋga, o kro fni Nyiɛkpɔɔ wre yiɛ, na kee ŋga u yo na mu paan yo o pan kre sri.”

34 A Peter na kna mna paara pe pan mbo, “Kpra na ni chin na Nyiɛkpɔɔ na ndro yiɛ le, mbe chiin u kala pe,

35 la, mu sɛ su waŋgra ŋga kro nu, ŋu ŋmba mu u fiɛ, na kee ŋga ki fraka pini kre, we mu shɔ.

36 E chin kee ŋga ni Nyiɛkpɔɔ na sɛ Israel leele pre pan, kee kre na yi na, wejinyiŋge wa Yesu Kristo wre nu, a wre wi ndro kro Tafun.

37 Kre kee ŋga pra yo mu tro Judea tra nu kre, Galilee na pra ki nɔɔ hle, nyjila ŋga nu John na ndrɛ jee kee kre yo, kre kɔkro.

38 E chin imi na Nyiɛkpɔɔ na Yesu ŋmba wra yiri Nazareth na wre wɔ, mna u ŋga jaŋga, na Kpra Ŋumu wre, a wraa kila na chichie pini, na mblɛ Sutna tɔɔra pre trai. Ŋgi ndra na hin? Na Nyiɛkpɔɔ wa u kro.

39 A wre lɛ kee nyjɛ wra pe Jerusalem, na Judea tra nu wa yire kro dansiɛfɛɛnlɛ. A wre Yesu wre chɔɔ pra kɔ mu kan kaan na mna u gbo kre.

40 Wre Nyiɛkpɔɔ na nyi u ble taarɛ ble na, mna tia wra uyɛ wɔ mu nyina.

41 Waŋgra kro ma kra u nya, la, u dansiɛlifɛɛnlɛ mblɛ Nyiɛkpɔɔ wɔ mu tɛɛ pre, pre lɛ wre mblɛ u kunnyiɛ kɔkro kre, wre na wre na chaa mu li, mu gbɔ.

42 Wre u o tun na o sɛ ketaan kre yo mbe leele nyina, mbe u dansiɛrɛ li na wre wi ŋmba Nyiɛkpɔɔ wɔ na u pe ŋmaafɛɛnlɛ, na kuulo kro kpra kunfun.

43 Wre dansiɛrɛ Nyiɛkpɔɔ kee nyanyofɛɛnlɛ kro lii na, ndro ŋmba we u shɔ mbe li kre, ufun we yire u mɛɛ kre na mbe sisam tinkɛɛ ta.”

44 Ŋga Peter naa yire kee nyjɛ yuu pe pan kre, titɛɛ kre nu, a Kpra Ŋumu wre na pan mblɛ praa kee kre ndru pre nu.

45 A kra Judae shɔnlifɛɛnlɛ mblɛ pra sɛ Peter tɛɛ pre pe kawako ni, na Nyiɛkpɔɔ leele mblɛ pe n pe Judae pre kuraa ŋga Kpra Ŋumu wre na.

46 Ŋgi ndra na, na pe loo, a leele mblɛ pe n pe Judae pre na yolo fɔnyi yuu, na Nyiɛkpɔɔ kaan mɛɛ.

47 “Kena ndro we jaa kolo tɔ na mbaa leele mblɛ pe Kpra Ŋumu ŋmba ta na wre lɛ ŋga ndrɛ jee?”

48 A wra tia pra pe ndrɛ je, mna le o Tafun wre mɛɛ nu. Ŋga kra pan ma kre, leele pre na u tali na u tni pe jaara ble shiin yɛ.