3 A Saul na yiri mu to kolo na shie, ŋga wraa mbra Damascus na kre, titɛɛ kre nu na lawee nyi mu yiri nyjeeri mu pan mu u kun mu fni.

4 A wra foli mu to tra, mna mana ka loo na ki u yeeri mbo, “Saul, Saul, Mni a mu ni pra ma hin?”

5 A Saul na kna mbo, “Ŋu wi ŋmbi hin? Ni Tafun?”

6 Yiri mu le chia kre lam. Na mu le ki na kre, ŋga ki fna mbe mu pe kre, pie ki yo mu pan.”

7 A wre na bilɛ mblɛ praa shie pre, na yire na kpoolo lɛ. Pra kee kre loo, a pe nsra ndro nya.

8 A Saul na yiri tra wa, mu nyiɛlɛ nyaa mbe lawee le kre, na u fun nyiɛlɛ na. A bilɛ pre na u yii kɛ na mna le na u ni Damascus lam.

9 U ble nununu taarɛ, na wa nya, na wa ka, a wa gbɔ.

10 Kre nyjila kre na twanfun waa wa Damascus na wa, a praa u yeeri Ananias. Wre wra Nyiɛkpɔɔ kee nya nyiɛlɛ na, a o Tafun wre na yo u pan mbo, “Ananias!”

11 A o Tafun wre na yo u pan mbo, “Yiri mu sɛ lete fraka wo kre na, mu sɛ wie blɔ ŋmba pe yeeri Judas wre katoo, mbe pe mu nyina Saul ŋmba u yiri Tarsus na wre, mu nya na uu wa na ni tali,

12 mu nya nyiɛlɛ na na blɔ ŋmba pe yeeri Ananias pan mu kɛ taa u na, mbe u nyiɛlɛ yire nyaa.”

13 A Ananias na kna mbo, “Ni Tafun, ni wre blɔ ŋmba kee loo lenɛɛrɛ pan. Sisam ŋga nyini u taa mu leele mblɛ pee wa Jerusalem na kre ma ŋga.

14 A u sɛ hlɛ shɔ srawɔfɛɛnlɛ loplombo pre pan mbe paan mblɛ pe mu mɛɛ yeeri chia ŋga na pre kro yii mbe sɛ.”

15 A o Tafun wre na kna mu yo u pan mbo, “Sɛ, blɔ ŋmba wi ndro ŋmba mi titi wɔ mbe u ni mɛɛ tio mbe sɛ waŋgra leele pre, na pe ŋulo, na Israel leele kro nu.

16 Mi chɔɔ mbe u nyina, kanyana nyjɛ yi fna mbe u nya ni mɛɛ kre ndra na.”

17 A Ananias na yiri mna sɛ le katoo ŋga nu Saul na nyi kre nu, mna sɛ kɛnyi taa u na mna kna mu yo u pan mbo, “Ni chunu Saul, o Tafun Yesu ŋmba wra uyɛ wɔ mna mu nyina mu kolo ŋga mnaa kuun kre nu kre, wre u ni tun na ni pan mu lawee, mbe mu nyiɛlɛ yire nyaa, mbe Kpra Ŋumu wre pan mbe tni mu nu.”

18 Titɛɛ kre nu, na yira ka pe na mbro krɔ yi, na ki yili Saul nyiɛlɛ mu to, a u nyiɛlɛ yire na nyaa, a wraa nyaa. Ba wra yiri to, a pra u ndra je.

19 A wra chin mna yaka cha mu le lɛɛ, a faŋga na pan. A wre na twanfɛɛnlɛ mblɛ praa wa Damascus na wa pre na tni wa mna mu chiɛri.

20 Titɛɛ kre nu, na Saul Yesu kee yuu pe fninyinyi yire nu, na Yesu wi Nyiɛkpɔɔ Biblɔ wre.

21 A leele mblɛ pra u nya mna u kee kre loo kre kro, kra pe pe kawako ni. A pra kna na peyɛ wie mbo, “Blɔ ŋmba ma wraa leele kuu Jerusalem na, Yesu mɛɛ ŋga ndra na kree? Hali mna yila ki na mna pan Damascus na mna, mbra paan mblɛ pee wa mna mu taa Yesu mɛɛ kre na pre yii haa, mbra sɛ srawɔfɛɛnlɛ loplombo pre ŋga Jerusalem na kree?”

22 Bawa Saul na faŋga ta u dansiɛrɛ kre wraa lii kre nu kuraa mu ya, a wra tia sra na wɔ Judae mblɛ praa wa Damascus na wa kre na, na Yesu wi Kristo ŋmba Nyiɛkpɔɔ wɔ wre.

23 Ble tataara yɛ kɔkro kre, Judae pre na sɛ bɔɔnri, na Saul chaa mbe gbo.

24 A Saul na pe kolo kre nya, na pe u sri chia kre kooloe na, lafo na blee, mbe u yii mbe gbo.

25 A Saul twanfɛɛnlɛ pre na u tre chia kre mbookrɔ na kakɛɛ ni blee ka, a wra fɛ.

26 Ŋga Saul na ndru mna sɛ le Jerusalem na kre, wraa chaa mbe sɛ chaa twanfɛɛnlɛ pre nu. A na twanfɛɛnlɛ pre kro naa u fiɛ, na pe n u shɔnli na u kaari twanfun chiriri.

27 Bawa Barnabas na sɛ na u ni bitumblɔ pre yiɛ na, mna sɛ kee ŋga o Tafun na wɔ mu Saul nyina Damascus kolo kre, na ŋga wraa wa Damascus na imi na wra Yesu kee kre yo na gbun ni kre, mna yi krɛrɛ yo pe pan.

28 Ŋga kra pan ma kre, Saul na pre na tni Jerusalem na wa.

29 A wra gbun ta, na ketaan kre yuu o Tafun wre mɛɛ nu. A wraa paara na Greek leele pre nyina, a wre na pre naa nyu kna peyɛ ni. A pre na kɔ na u chaa mbe gbo.

30 Ŋga u ŋmbilɛ pre na ki loo kre, a pra sɛ na u ni Caesarea na, mna sɛ yire wa, mna tia wra sɛ Tarsus na.

31 Fuŋga kra pan na sumifɛɛnlɛ mblɛ praa wa Judea, na Galilee, na Samaria na kre kro na wejinyiŋge ta, mna faŋga ta mu ya, mna tni Yesu mɛɛ, na u fiɛrɛ ni. A pra li Kpra Ŋumu wre kolo na, na nɛɛi na yaa.

32 Ŋga kra pan nyjila ka nu a Peter naa kila sumifɛɛnlɛ pre na na tro kre, wra sɛ da Nyiɛkpɔɔ leele mblɛ praa wa Lydda na pre na.

33 Bawa wra sɛ blɔ wa da na u fuuru mu kro u dɛŋglɛ na kie pe yɛlɛ kɔɔnatarɛ, u mɛɛ na Aeneas.

34 A Peter na kna mu yo fna wre pan mbo, “Aeneas, Yesu Kristo mu tra, kena yiri mu mu dɛŋglɛ kru.”

35 Ŋga leele mblɛ praa wa Lydda, na Sharon na wa pre na u nya kre, a pe kro na kna mna o Tafun wre kee kre shɔnli.

36 Kre nyjila kre na twanfun chlɔ waa wa Joppa na, u mɛɛ naa Tabitha, ki nyina na safiun. Wre chlɔ ŋmba, chichie pee, na ndro fooro chiɛn, kre na yi u tnumu.

37 A kra pan na yire ble yire nu, chlɔ wre na yaa mna ku. A pra u weli mna sɛ u sniŋge abansru nyuŋgo ka nu.

38 Ŋga twanfɛɛnlɛ pre na loo na Peter wa Lydda na, a haa nsra le kre, pra leele shiin wɔ mu tun u pan na pe sɛ u tali mbe u pan nyaanyaa.

39 A pra sɛ Peter yeeri, a wre na leele pre na pan Joppa na wa. Ŋga Peter na le Joppa na kre, a pra nduu na u ni abansru nyuŋgo ŋga nu pra gboo wre tɛɛ kre nu. Na Tabitha nɔɔlɔ lekuchiɛlɛ wa mu yire u jaara na nyɛni. A praa dodonyi, na yonyi nyjɛ Tabitha naa pini na pe kaan u gbugbam nyjila kre woni na leele nyina.

40 A Peter na pe kro yile fimi na, mna kosie kan mna nyiɛtali, mna kna mu yo gboo wre pan mbo, “Tabitha yiri” A Tabitha na nyiɛlɛ nyaa. Ŋga wra Peter yiɛ nya to, a wra fuma mu yiri mu tni.

41 A Peter na kɛ tini mu u yii mu yire sholo, mna Nyiɛkpɔɔ leele pre, na lekuchiɛlɛ pre yeeri, mna pe nyina u wi na u nyi.

42 Leele mblɛ praa wa Joppa na pre kro na kee kre loo, a tataara na o Tafun wre shɔnli.

43 A Peter na tni Simon jeribaa wa katoo Lydda na wa ble tataara.