Pe Twanfɛɛnlɛ Pre Pra
8
A wre Saul wre chɔɔ wra li Stephen kumu kre na. A kre ble kre, shɔnlifɛɛnlɛ mblɛ praa wa Jerusalem na wa pre prara na wɛ kuraa, a pra pe gbun mu nyina Judea, na Samaria trɛ yire nu. Bitumblɔ pre chiin pra kro wa.
2 A Nyiɛkpɔɔ chinfɛɛnlɛ plɛ na Stephen wru mna sɛ le, mna u nyɛni chichie.
3 Saul wre na shɔnlifɛɛnlɛ pre tɔɔra kpɔɔ, mnaa lee kalonyi nu, na bilɛ na chiɛlɛ woni na shie, na pe leni nyuŋgo.
Philip Ketaan Kre Yo Mu Kawako Kee Pe
4 A mblɛ pra gbun mu nyina pre, na sɛ na kila na Nyiɛkpɔɔ kee kre yuu na tro.
5 Bawa Philip na sɛ Samaria chia ka na, mna sɛ Kristo wre kee yo mu pe nyina.
6 Ŋga lenɛɛrɛ pre na u kee kre loo mna kawako kee tataara nya kre, pe kro na ndie tɛɛ u pan.
7 A ŋumufuɛn mblɛ praa wa pe nɛɛrɛ nu, na gblee badɛnyi tɛɛ mu yili yili pe nu. A pe finla, na pe mblɛ sooloe yira ku ku kre tataara na faŋga ta.
8 A yɛshɔɔrɔ kpɔɔ na pan chia kre na.
Simon Sɛɛn Sumifun Wre
9 Kre nyjila kre, blɔ wa naa wa waŋgra kre nu u mɛɛ naa Simon, a wra pe lewo ŋmba wraa dobodobo woni, a kra Samaria leele pre pe kawako ni. A wra uyɛ pe na lekpɔɔ wi waŋgra kre nu.
10 Wre blɔ ŋmba, waŋgra kre biile, na pe loplombo kro na taari u kee ŋga we yo na, a praa yuu mbo, “Blɔ ŋmba jaŋga ŋga yiri Nyiɛkpɔɔ pan, a kre yi jaŋga kpɔɔ kre.” Kra tia pra taa u kee na. Ŋgi na hin?
11 wra u kɔmfoɔrɔ kre tɛɛ mu pe ndra li mu mu.
12 A ŋga pra kɔ mna Nyiɛkpɔɔ ŋunumu kre ketaan kre, na Yesu Kristo mɛɛ kre loo Philip pan kre, pra u shɔnli, a pe bilɛ na pe chiɛlɛ na tia pra pe ndrɛ je kro.
13 Hali Simon wre titi na shɔnli, a pra u ndra je na. Ŋga pra u ndra je mu kɔ kre, a wra taa Philip na, ŋga wra kawako kee, na kekpɔɛ yire nya ma kre, a kra ndru mu u pe kawako ni kpɔɔ.
Peter Na John Sɛ Samaria Na
14 Ŋga bitumblɔ mblɛ praa wa Jerusalem na pre na loo na Samaria leele Nyiɛkpɔɔ kee kre shɔnli kre, a pra Peter, na John wɔ mu tun, a pra sɛ pe le.
15 Ŋga pra sɛ kre, a pra sɛ nyiɛtali mu pe ŋga mbe pe Kpra Ŋumu wre ta.
16 Yaka ma kra tia, na Kpra Ŋumu wre n ta mu pan pe wa nu tun, na pe ndrɛ chiin pe je mu le o Tafun Yesu wre mɛɛ nu.
17 A Peter na John na kɛnyi taa taa pe na, a Kpra Ŋumu wre na pan mu tni pe nu.
Sɛɛn Sumifun Wre U Yiɛ Kee Loo
18 Ŋga Simon na nya na bitumblɔ pre kɛnyi taari leele pre na, a praa Kpra Ŋumu wre taa kre, a wra yo we pe ŋga swa, mna yo pe pan mbo,
19 “E mi ŋga jaŋga ka na ɛ, mbe ndro ŋmba na mbe kɛ taa kpan, mbe u Kpra Ŋumu ta uyɛ nu.”
20 Bawa Peter na kna mu yo u pan mbo, “Nyiɛkpɔɔ we ŋu na mu swa kro kla, na mu jawa na swa pe teeri na Nyiɛkpɔɔ kɛyira kre loni.
21 Kee ŋga, mu wo n wa ki nu, a mu n krɔyira ni ki nu, na mu loloŋgo n fraka Nyiɛkpɔɔ ni.
22 Kena mu jawala chinɛ mu laa mu sisam kro, mu Nyiɛkpɔɔ tali, aada we mu sisam ŋga kii wa mu loloŋgo nu kre ti mbe mu kɛ.
23 Yaka ndra na ma, ni ja mu nya na nyibinyiɛ sisaa wa mu nu, a sisam mu ndra li.”
24 A Simon wre na kna mbo, “Jande, e o Tafun wre tali e ni ŋga, mbe kee nyjɛ e yo nyjɛ waa shia kaari ni pan jiɛnlɛ.”
25 Ŋga pra dansiɛrɛ kre li mna o Tafun wre ketaan kre yo wa kre, a pra ndru na shie Jerusalem na, mnaa ketaan kre yuu Samaria tra nu wa na shie.
Philip Na Ethiopia Blɔ Wre
26 Bawa Nyiɛkpɔɔ bituŋu na paara Philip pan mbo, “Yiri mu sɛ tapan haa kolo ŋga ki yire Jerusalem na mu sɛ Gaza na kre na.” Kre kolo kre, nyaa kolo yi.
27 A wra yiri mna sɛ. Ŋga we le na Ethiopia blɔ waa ŋmba, a wra pe Ethiopia ŋuchlɔ Candace lepɔɔ ŋmba wraa u swa kro le. Na u sɛ Jerusalem na mu sɛ sumi,
28 mu ndru na paan mu tni u soo kaa nu, mu na Nyiɛkpɔɔ kee nyanyofun Isaiah hlɛ kre tɔɔnri.
29 A Kpra Ŋumu wre na yo Philip pan mbo, “Flo mu da sookaa ŋga wa na.”
30 A Philip na fɛ mu sɛ blɔ wre jaara. Ŋga wra loo na Isaiah hlɛ blɔ wre tɔɔnri kre, a wra u wie mbo, “Kee ŋga mu tɔɔnri ŋga mu ki nɔɔloo?”
31 A blɔ wre na kna mbo, “Mni mbe pe mbe jaa ki nɔɔloo hin? Fɔna ndro ni nyina ki yi?”
“Pan pra u yii mu sɛ
na pe shie sɛ mbɔɔ gbo.
Imi na mbɔɔ pɔ we pieri
u yooro knumufun yiɛ kre,
pan u nsra nyu kun.
33 Pra cheu wɔ u na, mna u kala li mu kpra fɛɛlɛ.
A ŋmbi we jaa u nɔɔ leele chin mbe nyina na hin?
Ŋgi ndra na hin? Na u ŋmaa nsra tnu tra ŋga nu.”a
34 A blɔ wre na kna mu Philip wie mbo, “Jande, kena ŋmbi kee Nyiɛkpɔɔ kee nyanyofun ŋmba yuu ŋga hin? Wre titi kee u yuu ndee, ndro fuŋu wa kee u yuu hin?”
35 Bawa Philip na yire mna paara mu yire Nyiɛkpɔɔ kee kre blɔ wre naa tɔɔnrii kre na, mna Yesu ketaan kre yo mu u nyina.
Philip Na Blɔ Wre Ndra Je
36 Ŋga pra kolo kre yii na shie kre, pra sɛ da lɔɔ ka na. A blɔ wre na kna mu yo Philip pan mbo, “Le, lɔɔ yi kre. Kena yira ŋgi kie ni tɔ ni ndra jee kolo hin?”
37 A Philip na kna mu yo u pan mbo, “Na mu mu loloŋgo kro tɛɛ mu shɔnli kre, kena koloo wa ki na mbe ni mu ndra je.”
A blɔ wre na kna mbo, “Ni shɔnli na Yesu Kristo wi Nyiɛkpɔɔ Biblɔ wre.”
38 A blɔ wre na tia soo kaa kre na yire, a pe kro shiin na tii mna le lɔɔ kre nu. A Philip na blɔ wre ndra je.