Paul Na Kristo Dansiɛrɛ Li
2
Ni wolo, ŋga ndaa pan mu Nyiɛkpɔɔ kpra kee ŋga ki ndra kre kpali e pan kre, ni nsra kekpɔɛ, ndee kachindɛ paaraa paara.
2 Ŋgi na hin? Ndaa ni jawala pe na mbe yira kro kee fɛɛ nyjila ŋga ni mi na yire wa kre, fɔna Yesu Kristo, na u kumu ŋga wra ku kanyana kumu kaan kre na kre chiin bɔkɔ.
3 Kena ŋga ndaa wa e nu kre, ndaa niyɛ pe na pɔlɛfun wi, a fiɛrɛ na tia ndaa seeri.
4 Ni paaraa, na ni kee ŋga ndaa kpali kre nsra pe fanaa, na waŋgra kachindɛ kee, la, jaŋga ŋga kii wa Nyiɛkpɔɔ Ŋumu nu ndaa e nyina,
5 imi kie pe mbe Nyiɛkpɔɔ jaŋga ti mbe e shɔ mbe li, mbe yaa yire lewo kachindɛ na mbe shɔ mbe li.
Kachindɛ Ŋga Ki Yiri Nyiɛkpɔɔ Ŋumu Nu
6 Mblɛ pe lɛ Ŋumu wre nu kre, ni kachindɛ kee paara pe pan. La, ki n pe waŋgra ŋga kachindɛ, ndee waŋgra ŋga jaŋgafɛɛnlɛ mblɛ jaŋga yia mu mbe pe waara pre kachindɛ kee yi.
7 La, kachindɛ ŋga kee o yuu kre, Nyiɛkpɔɔ kachindɛ kee ŋga ki ndra leele na yi. Nyjila ŋga ni u nsra ta mu waŋgra ŋga gbeele kre, kre kachindɛ ŋga naa wa u ndra, na we ti o yire ki na mbe yɛnyiŋge ta.
8 Waŋgra ŋga lopom wa nsraa wa mu kre kachindɛ ŋga kee chin. Na pra ki chin kre, pia na o Tafun yɛnyiŋgefun wre kan kanyana kumu kaan na.
9 La, pe ki nyunɔ Nyiɛkpɔɔ hlɛ kre nu mu tɛɛ mbo,
“Yira ŋga nyini n da mu nya,
ndee a ndie n da mu loo,
ndee ŋga ndro n da mu jawa na kie pe kre,
kre yira kre Nyiɛkpɔɔ gbeele mu tɛɛ mblɛ pe u kori pre pan.”a
10 La, Nyiɛkpɔɔ yire u Kpra Ŋumu wre na, mu ki wɔ mu o nyina. Kpra Ŋumu wre yira kro lam chin, hali Nyiɛkpɔɔ wre ndrandra kee kro.
11 Lewo ŋumu ŋga kii wa u nu, kre ki chin imi na u nyi. Pan chɔɔ, ndro n ŋga kii wa Nyiɛkpɔɔ nu chin, fɔna Nyiɛkpɔɔ wre titi Ŋumu ŋga kii wa u nu.
12 Waŋgra ŋga ŋumu ma o ta, la, Ŋumu ŋmba u yiri Nyiɛkpɔɔ pan wre o ta, mbe ki ti o yirɛ nyjɛ Nyiɛkpɔɔ o ŋga finfin yire chin.
13 Kena kee nyjɛ o yuu yire n pe kee nyjɛ yi yiri lewo kachindɛ nu, la, yi yiri kpra Ŋumu wre kachindɛ nu, na Kpra Ŋumu wre kee nɔɔ nyina mblɛ nu Ŋumu wre nyi pre pan.
14 La, lewo ŋmba nu Nyiɛkpɔɔ ŋumu wre n wa kre, wa jaa yirɛ nyjɛ Kpra Ŋumu wre kaan yire ta. Ŋgi na hin? Yi pe u pan jijiere kee, ki tia wa jaa yi nɔɔloo fio. Ŋgi na hin? Na Kpra Ŋumu wre wa mu nu, wre we ti mbe mu jaa yi nɔɔ loo.
15 Ndro ŋmba nu Kpra Ŋumu wre nyi kre ja na yira kro le mbe ki kpra kun, la, lewo wa ja mbe u kpra kun.
16 Pe ki nyunɔ Nyiɛkpɔɔ hlɛ kre nu mu tɛɛ mbo,
“Ŋmbi u o Tafun wre jawala kee chin hin?
A ŋmbi we jaa u ŋga jawala hin?”b
La, wre rɛ, Kristo wre jawala kii wa o nu.