Sumifɛɛnlɛ Pre Yɔɔlɛɛ
3
Ni wolo, ni nsra ja mbe paara na e ni na leele mblɛ nu Kpra Ŋumu wre nyi lɛ, la, ndaa paara e pan na leele mblɛ nu Ŋumu wre n wa lɛ, na biile lɛ yire Kristo nu.
2 Nyinimi nyumu ndaa e ŋga, sro titi na ma. Ŋgi na hin? E nsra ja mbe sro shelee li, hali fuŋgaami kuraa kre, yaa jaa ki li.
3 Ŋgi na hin? Ee wa mu pe na waŋgra wolo lɛ tɛ. Ŋga keyira sisaa, na kakrɔɔ wa e nu ŋga, ki n na nyina na waŋgra ŋga wolo lɛ yire, a e na waŋgra ŋga kepele pini ra?
4 Na e plɛɛ wa na yuu na, “Paul kro o taa,” a plɛ na yuu na, “Apollos kro o taa,” kena pan ma e pini na waŋgra wolo pre lɛ ra?
Yirɛ Luufun Na Nyumu Wofun
5 Kena ŋmbi wi Apollos, a ŋmbi wi mi Paul hin? O kro pe Nyiɛkpɔɔ sumifɛɛnlɛ, a ki yire o na a e shɔ mu li. O Tafun wre o ŋga o tnumu oyɛ yɛ, a o na tuni.
6 Mi ndaa yira bie kre luu, a Apollos na nyumu wo ki na, la, Nyiɛkpɔɔ u tia ki lɛ.
7 Kena ŋmba u ki luu, na ŋmba u nyumu wo ki na kre, wa ma u yaka pe, la, Nyiɛkpɔɔ ŋmba u tia ki lɛ kre, wre u ka pe.
8 Ŋmba u ki luu kre, na ŋmba u nyumu wo ki na kre, kala nunu pe pini, pe kro we pe tnumu ŋga pe tun kre fɔtɔɔrɔ ta.
9 Nyiɛkpɔɔ tnumutunfɛɛnlɛ lɛ wre, a yire lɛ Nyiɛkpɔɔ see, a Nyiɛkpɔɔ nyuŋgo lɛ yire.
Nyuŋgo Kre Nɔɔ Nunu
10 Nyiɛkpɔɔ dumiɛ ŋga u ni dumi kre ndra na, ni pe na nyuŋgo sinchifun titi ŋmba ni nyuŋgo nɔɔ le wi, a lefuŋu na paan mbe sin mbe taa ki na, la, ŋmba we sin mbe taa ki na kpan, ufun u u siɛn dɔɔta.
11 Ŋgi na hin? Nyiɛkpɔɔ Yesu Kristo wɔ na wre nunu chom wi nyuŋgo kre nɔɔ. Fɔŋgɔ ka n wa mbe ndro ja mbe le na.
12 Plɛ we swa nyiɛ, ndee swa fiŋge, ndee dnɛ chichiele tɛɛ mbe sin mbe taa nyuŋgo kre nɔɔ na, mbe plɛ kɛɛn, ndee nyaa, ndee bleju kɛɛn tɛɛ mbe siin taa ki na.
13 Na Kristo ble kre waa to, kie ndro kro tnumu ŋga u tun wɔ mbe nyina. Ki ble kre kanhun we ndro kro tnumu pe mbe le, na ŋga u pe kre nyu, ndee na ki n nyu.
14 Kena ŋga mu sin mbe taa nyuŋgo kre nɔɔ na kre, na kanhun kre nsra ki shɔ, kena mu fɔtɔɔrɔ chichie ta.
15 La, na mu tnumu ŋga mu tun kre waa shɔ, ma fɔtɔɔrɔ ta, la, ŋu titi we ŋmaa ta, pan kie pe na lewo fɛ mu yili kanhun ŋga ki nyini nu.
16 E n chin na Nyiɛkpɔɔ Suminyuŋgo lɛ yire, a Nyiɛkpɔɔ Ŋumu wre wa mu tni e nu ree?
17 Kena na ndro Nyiɛkpɔɔ Suminyuŋgo kre kla, Nyiɛkpɔɔ we ufun wre kla na. Ŋgi na hin? Nyiɛkpɔɔ Suminyuŋgo kre pe cheche, a yire lɛ Suminyuŋgo kre.
Lewo Kachindɛ Pe Finfin
18 Wa waa shia uyɛ fana. Na waa wa e nu na uyɛ jawa kachiŋu waŋgra haa kre, ufun u uyɛ pe jijuo tun, kre we jaa pe kachiŋu titi.
19 Ŋgi na hin? Waŋgra ŋga kachindɛ pe jijiere kee Nyiɛkpɔɔ yiɛ. Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Nyiɛkpɔɔ kachimblɛ yii pe kachindɛ sisaa na.”a
20 A pe ki nyunɔ Nyiɛkpɔɔ hlɛ kre nu lawee fɔŋgɔ nu na mbo,
“O Tafun wre chin na waŋgra ŋga kachimblɛ jawala nyjɛ pe le yire kro pe finfin.”b