Kristo Wre Bitumblɔ
4
Kena e o jawa na Kristo sumifɛɛnlɛ lɛ wre, a Nyiɛkpɔɔ kpra kee ŋga ki ndra kre tnumutunfɛɛnlɛ lɛ wre.
2 Kee nunu ŋga ki kro yi na, oo kpra li mbe ŋmba u tnumu le o kɛɛ wre ŋga.
3 La, ki n ni shian na ee ni gbun pini ni, ndee na pie ni gbun pimi ni kala li ndoo ka nu, mi titi n niyɛ gbun pimi ni.
4 Ni n kee sisaa ka nya niyɛ na, la, kre n nyina na ni tam li ya. O Tafun wre we ni kpra kun.
5 Kena wa waa shia ndro gbun pimi ni, mbe nyjila ŋga nu o Tafun we pan kre chiin da. Wre we pan mbe kee nyjɛ yi ndra wɔmu nu kre kro wɔ fimi na, mbe lewo loloŋgo kee kro wɔ fimi na. Kre nyjila kre nu ndro kro we mɛɛ ŋga ki fna na u ni ta Nyiɛkpɔɔ pan.
6 Ni wolo, yire na ni yila mu mi na Apollos tɛɛ mu kee nyjɛ yo, mbe e o le mbe kee ŋga pe nyunɔ mu tɛɛ kre twan o pan, kee kre yo mbo, “Yaa shia pe mbe wɛ kee ŋga pe nyunɔ mu tɛɛ kre na.” Kena wa waa shia ndro wa tɛɛ mbe uyɛ kpɔɔ, mbra wa le fiɛn.
7 Ŋmbi u ŋu pe a ŋu yili muyɛ na hamblɛ ni hin? Yira ŋgi mu ta, a Nyiɛkpɔɔ ma u mu ŋga ki yi hin? A na wre u mu ŋga ki yi, yira ŋgi ki tia mna muyɛ kpɔɔri na Nyiɛkpɔɔ ma u mu ŋga ki yi hin?
8 E yirɛ nyjɛ yi e shian kro ta. E jawa na e nyu mu kɔ. E jawa na ŋulo lɛ yire, a wre n pe leele plɛ. Ki tna ni pan na ee na pe ŋulo yɛŋgɛ, mbe wre na yire na chaa mbra ŋunumu li.
9 Na mu le, ki pe na Nyiɛkpɔɔ wre bitumblɔ wru mu tɛɛ kro kpɔklɔ, a o pe na leele mblɛ pe gbun pimi ni, na shie mbe sɛ o yire leele yiɛ na mbe pe gbo, mbe waŋgra leele, na nyjeeri bitumblɔ kro o le mbe tɛɛ.
10 Kristo saara na, jijiele lɛ wre, la, kachimblɛ lɛ yire Kristo nu. Wre pɔlɛ, la, yire sheli. Pe wre le fiɛn fiɛn, la, pe yire kaan buuro.
11 Mu pan mu su nyjila ŋga nu o nyi ŋga nu kre, klo na gbɔɔ o tro, yokunumɛɛ o toni, gbuun pe o gbuun, a o n lawee ni mbe tni.
12 Wre titi kɛnyu tnumu o tuni na oyɛ le. Na pe o suni, mbe wre na dwan mbra pe kaa kaan, na pe o le nyibinyiɛ, mbe o frɔ ta.
13 Na pe o mɛɛ klai, mbe o bonyaa tɛɛ mbra paara pe pan. Mu pan mu su aŋga na, wre lɛ tra ŋga kpɔli yira, a wre lɛ waŋgra ŋga kafuŋgo.
Paul Corinth Leele Tali
14 Ni n na yire kee nyjɛ nyunɔi mbe ti mbe nyifɛɛrɛ e gbo, la, ni yi tɛɛ na e jaari na ni biile lɛ yire.
15 Ŋgi na hin? Hali na e lefɛɛnlɛ nɛɛ Kristo nu, a pia ja mbe tɔɔnri kuraa kre, e lɛɛlɛ n nɛɛ, mi ni yire ketaan kre na mu pe e lɛ Yesu Kristo nu.
16 Kena ni e tali, e ni le, e ni kepele twan.
17 Kre kee ŋga ndra na, ni Timothy tuni e pan. Ni pɔ ŋmba ni kori wi, a kprafun wi o Tafun wre nu. We pan mbe e sɔɔnri ni kooloe nyjɛ na ni tro Kristo wre nu, yire kee nyjɛ ni sumifɛɛnlɛ pre nyina lawee kro nu.
18 E plɛ e yɛ kpɔɔri, na jawa na mba pan mbe e shaari na.
19 La, na o Tafun wre li ki na, kia mu mbe paan e shaari. Mi titi we paan pe nyukpɔɔmu kee nyjɛ pe yuu yire, na jaŋga ŋga ni pe paara kre nya.
20 Ŋgi na hin? Nyiɛkpɔɔ ŋunumu kee kre, ki n pe nyu yoo yi, la, Nyiɛkpɔɔ jaŋga yi.
21 Ŋgi e chaa hin? Ni pan na fwa ni ree, ni niyɛ nyjii mbe pan koroo ni hin?