Sumifɛɛnlɛ Kepele Fuɛn
5
Pe pan mu yo ni pan na tiɛrɛɛ wa e nu, hali leele mblɛ pe n Nyiɛkpɔɔ chin pre kuraa wa pe ma. Pe pan mu yo ni pan na wa u lɛ chɔ wru mu leŋge.
2 A e je na eyɛ kpɔɔri, nyjila ŋga ni ki fna mbe e yiɛ na je, mbe e na ŋmba u kre kee ŋga pe wre wɔ mbe yili eyɛ nu.
3 Kii wa na ni wejikaara haa le na e ni, nde ni ŋumu wa e jaara. A o Tafun Yesu Kristo wre mɛɛ nu, ni ŋmba u kre kee ŋga pe wre gbun pimi ni fuŋga ma, mu yo nii wa e lalaa.
4 Na e waa fni o Tafun Yesu wre mɛɛ nu, a ni ŋumu wa e lalaa, a Kpra Ŋumu wre jaŋga wa mu ya e na kre,
5 e ndro ŋmba u kre kee ŋga pe wre wɔ e Sutna ŋga, mbe u u wejiŋge kla, mbe ki ti o Tafun Yesu pan ble kre mbe u ŋmaashɔmu ta.
Jaaraa Kee
6 Imi e eyɛ kpɔɔri kre n nyu. E n chin na yiisi chiɛri ka ki tii mbe paanu mimi kre poŋgo tin ra?
7 E yiisi lɛɛ ŋga ki pe sisam kre wɔ eyɛ nu, kre ee pe chasi. Na ki pan ma, ee pe chasi na paanu mimi ŋga nu yiisi n wa yi, imi na ni shɔnli na e nyi fa kre. Ŋgi na hin? Pe o Klɛntro ble sra mbɔɔ ŋmba wi Kristo wre gbo.
8 Kena e ti mbe o ble kpɔɔ kre li, la, ki n pe paanu ŋga nu yiisi lɛɛ yire nyi ni oo ki li, sisam na kefuɛn pee ni ma. La, paanu ŋga nu yiisi n wa, mu pe chasi, a nɛɛrɛ n wa ki nu ni oo ble kpɔɔ kre li.
9 Hlɛ ŋga ndaa e nyunɔ kre nu ndaa yo e pan na yaa na eyɛ chaa tiɛrifɛɛnlɛ nu.
10 Ni n yo na waŋgra ŋga tiɛrifɛɛnlɛ, ndee jajaarafɛɛnlɛ, ndee juolo, ndee sɛɛnlɛ sumifɛɛnlɛ pre. Na e yo ee eyɛ kun pre na kre, kena yili ki fna e yili waŋgra ŋga nu.
11 La, ndaa nyunɔ mu pan mu e ŋga na, yaa na mbra ŋmba u uyɛ yeeri Kristo wo, mu je na tiɛri, mu pe jajaarafun, ndee na sɛɛn sumi, ndee mu pe kabaarafun, ndee gbɔgbɔɔ, ndee mu pe jio na. Yaa shia chaa mbe li na ki fun ni kple.
12 Ŋgi na hin? Mi tnumu ma na mbe mblɛ pe n chaa sumifɛɛnlɛ pre nu pre kpra kun, Nyiɛkpɔɔ wo yi kre. Kena e wolo sumifɛɛnlɛ pre kpra ma ki fna e kun ra?
13 Pe ki nyunɔ Nyiɛkpɔɔ hlɛ mu tɛɛ mbo,
“E sisampefun wɔ eyɛ nu.”a