Waŋgra Leele Kaliire
6
Na e wa na u ŋmbrɔ ta, ŋgi ki tii mbe e sɛ na kee kre ni waŋgra kpra kunfɛɛnlɛ pan, mbe Nyiɛkpɔɔ leele pre ti hin?
2 E n chin na Nyiɛkpɔɔ sumifɛɛnlɛ pie waŋgra leele kpra kun ra? A kena na yire ee kɔɔ waŋgra ŋga leele kpra kun, kena e n da mbe jaa eyɛ kebɛɛlɛ nyjɛ kpra kun ra?
3 E n chin na wre oo kɔɔ nyjeeri bitumblɔ kpra kun ra? A mni kie pe mbe o pra waŋgra ŋga kee yoo na hin?
4 Kena na yire kee nyjɛ nyini pan e nu, ŋgi ki tii mbe e sɛ na yi ni leele mblɛ pe n yire haa ni e sumiɛ nu ŋga pan hin?
5 Nyifɛɛrɛ ki e gbo kre, kena kachiŋu nunu chom n wa e nu, na kala pan wa na u ŋmbrɔ lalaa, mbe u jaa ki gbeele ra?
6 A e na shie na eyɛ ni leele mblɛ pe n shɔnli yiɛ.
7 Ŋga e ta na tuni, na shie na eyɛ ni kala lihaa ŋga kuraa nyina na e to. Ŋgi ki tia yaa ti mbe pe sisaa pe e na hin? Yira ŋgi ki tia yaa kolo ŋga mbe ndro yire dnumu hin?
8 A yire kna na sisaa pini e wolo shɔnlifɛɛnlɛ pre na, na pe dnumu.
Na Mu Fraka Ki Nyu
9 E n chin na mblɛ pe n fraka kre wa Nyiɛkpɔɔ ŋunumu kre ta mbe li ra? Kena yaa eyɛ fana, tiɛrifɛɛnlɛ, na sɛɛn sumifɛɛnlɛ, na leŋgeere klafɛɛnlɛ, na bilɛ mblɛ pe sni na pe ŋmbilɛ bilɛ ni,
10 na juolo, na jajaarafɛɛnlɛ, na gbɔgbɔɔlɔ, na kabaarafɛɛnlɛ, na dnumufɛɛnlɛ kro, wa wa Nyiɛkpɔɔ ŋunumu kre ka ta mbe sɛ.
11 Pan e plɛ na nyi fa, la, pe e weli, a e pe cheche, a e yire o Tafun Yesu Kristo mɛɛ kre, na o Nyiɛkpɔɔ wre Ŋumu nu.
Kristo Leele Yɛtaara N Kaari Sisaa Pee
12 Wa we yo mbo, “Koloo wa mbe ni jaa kee ŋga ni chaa kro pe.” Pan ki nyi ya. La, kee kro ma ki nyu mu mu ŋga. Mbe jaa yo na nii kolo ni na mbe kee ŋga ni chaa kro pe, la, mba ti mbe kee ka ni ta tnu.
13 A lefuŋu we yo mbo, “lɛɛ wo yi sro, a sro wo yi lɛɛ.” A nde Nyiɛkpɔɔ we yi kro kla. Nyiɛkpɔɔ nsra lewo wejiŋge pe na wra tiɛri na ki ni. La, wra ki pe na wraa u sumi na ki ni, mbe o Tafun wre paan tni wejiŋge kre nu.
14 Nyiɛkpɔɔ na o Tafun wre nyi mu yili kuulo nu, a we yire u jaŋga kre na mbe o nyi na.
15 E n chin na Kristo wejiŋge kre ka yi e wejinyi yire ree? Kena ki fna mbe ni Kristo wejiŋge kre ka tɛɛ mbe tiɛri ree? Ki n fna ma.
16 E n chin na blɔ ŋmba we uyɛ wru mbe gbun tɛtiɛrɔɔ na kre, kena wre na wre wejiŋge pe nunu ra? Pe ki nyunɔ Nyiɛkpɔɔ hlɛ kre nu mu tɛɛ chasi mbo,
“Pre shiin pre we pe wejikaara nunu.”a
17 La, ŋmba na o Tafun pie mbra kre, wre na wre we pe nunu ŋumu nu.
18 E tiɛrɛɛ ti, sisaa ŋga lewo pini kpan kra u wejiŋge kla, la, ŋmba u tiɛri kre, u sisaa pini na u wejiŋge klai.
19 E n chin na e wejiŋge pe Kpra Ŋumu wre nyuŋgo, a Nyiɛkpɔɔ wre wra e ŋga u wi, a uu wa e nu ra? Yire titi ma e eyɛ ta, Nyiɛkpɔɔ wolo lɛ yire.
20 A u e lɔ ndrɔ shelee. Kena e e wejinyi tɛɛ e Nyiɛkpɔɔ le yɛnyiŋge.