Imi Paul Jawa Mbe Leŋgeere Na Pe
7
Fuŋga rɛ, mu wru kaalɛɛ nyjɛ e na ni nyunɔ yire haa kre, ki nyu mu blɔ ŋga, na wa da chlɔ na.
2 La, ŋga ee na tiɛri kre ndra na, ki fna mbe blɔ u chɔ ta, mbe chlɔ u plɔ ta na.
3 Blɔ n fna mbe je sinlɛ na u chɔ pan, a chlɔ n fna mbe je sinlɛ na u plɔ pan na.
4 Chlɔ wre n jaŋga ni wre titi wejiŋge na, na blɔ wre bɔkɔ. Pan chɔɔ blɔ wre n jaŋga ni wre titi wejiŋge na, na chlɔ wre bɔkɔ.
5 Chlɔ na u plɔ n fna mbe je sinlɛ na peyɛ pan, fɔna pe paara mu fni na pia da peyɛ na, mbe sɛ su nyjila ka nu, mbe ki ti pe nyjila ta mbe nyiɛtali. Na kre nyjila kre tro, mbe pe ndru mbe da peyɛ na, na kre ma Sutna we kolo cha mbe paan e pe mbe le, na yaa jaa frɔ eyɛ niŋge na.
6 Ni n na mbra leni na yaa leŋge, la, na mu chaa leŋge.
7 Kaa ni chaa mbe ndro kro na tni na mi wi, la, ndro kro na ŋga Nyiɛkpɔɔ u ŋga yi. U tii mbe wa leŋge, mbe ti wa tni ma na yɛshɔɔrɔ ni.
8 Ni yuu mblɛ pe n leŋge kre, na lekuchiɛlɛ pan, ki nyu mu pe ŋga na pie tni ma na mi wi.
9 La, na pia jaa peyɛ yii, kena pe leŋge. Na mu leŋge ki prɔ, ŋga mu tni mbe leŋgeere niŋge na mu kuu na.
10 Leŋgefɛɛnlɛ pre, ni yuu e pan, la, mi titi pan ma ki yiri, o Tafun wre pan ki yiri. Chlɔ waa shia u plɔ je.
11 La, na waa u je kre, u tni ma, na pan ma naa, u ndru u sɛ u plɔ lɔɔ wre leŋge na. A pan chɔɔ blɔ n fna mbe u chɔ je.
12 Yire hamblɛ pre, mi ni yuu e pan, O Tafun wre ma. Na blɔ shɔnlifun waa wa chlɔ ni, a chlɔ wre n pe shɔnlifun, a chlɔ wre li ki na mbe wre na wre tni kre, waa shia u je.
13 A na chlɔ shɔnlifun wa blɔ ŋmba u n shɔnli ni, a blɔ wre li ki na mbe wre na wre tni kre, waa shia u je.
14 Ŋgi na hin? Blɔ ŋmba u n shɔnli wre, u chɔ ŋmba u shɔnli wre saara na, Nyiɛkpɔɔ blɔ wre le na u fna chlɔ wre plɔ. A chlɔ ŋmba u n shɔnli wre, u plɔ ŋmba u shɔnli wre saara na, Nyiɛkpɔɔ chlɔ wre le na u fna blɔ wre chɔ. Na ki n pe ma, a pe waa je kre, kie jaa pan na pe biile wa Nyiɛkpɔɔ chin. La, na pe tni kre, Nyiɛkpɔɔ we biile pre le na u sumifɛɛnlɛ biile lɛ.
15 La, na ŋmba u n shɔnli wre chaa mbe ŋmba u shɔnli wre je kre, ti mbe u sɛ. Na ki pan ma kre, blɔ wre, ndee chlɔ wre, yaka n u pɔ. Ŋgi na hin? Nyiɛkpɔɔ o yeeri na o paan tni wejinyiŋge nu.
16 Ŋu chlɔ wre, mni mu pe mu chin na, na e kro mu tni, na ŋu na ma kie yire mbe mu plɔ ŋmaa ta hin? A ŋu blɔ wre, mni mu pe mu chin na, na e kro mu tni, na ŋu na ma kie yire mbe mu chɔ ŋmaa ta hin?
Tnimu
17 Ŋga o Tafun wre e ŋga kpan, e tni ki nu ma, imi na e na nyi a Nyiɛkpɔɔ na e yeeri kre. Kre kolo ŋga ni sumifɛɛnlɛ kro nyina.
18 Nyiɛkpɔɔ na wa yeeri, na pe yire Judae paala na mu u fɛŋgɛ kun ree? Ufun waa kawa na ki ni. A na pe n u fɛŋgɛ kun naa, waa kawa na ki ni na we ki kun.
19 Na pe mu fɛŋgɛ kun o, na pe n ki kun o, yi kro ka n shian. Ŋga ki pe keshian yi na mu li Nyiɛkpɔɔ mbra na.
20 Ndro kro u kro imi na u nyi a Nyiɛkpɔɔ u yeeri.
21 Ŋga Nyiɛkpɔɔ na mu yeeri, na tnu wi ŋu ree? Maa kawa na ki ni. La, na mu kolo ka ta mbe yili mu tnibim nu kre, tro ki na.
22 Ŋgi na hin? Tnu ŋmba o Tafun yeeri kre, u yili u tnibim nu mu pe Kristo lepɔɔ. Pan chɔɔ lepɔɔ ŋmba Kristo yeeri kre pe Kristo tnu.
23 Nyiɛkpɔɔ na e lɔ ndrɔ shelee. Kena yaa pe leele tinlɛ.
24 Kena ni wolo, imi na e na nyi a Nyiɛkpɔɔ na e yeeri kre, e tni ma na u ni.
Leŋgeere Jaaraa
25 Fuŋga rɛ, mu wru bichabɛɛlɛ mblɛ pe n leŋge tun pre haa kre, ni n mbra ka ta mu yiri o Tafun wre pan, la, ni jawala ni nyina, a o Tafun wre dumiɛ saara na, ni pe lewo ŋmba ki fna e shɔ mbe li.
26 Ni shɔnli na kre nyjila shelee ŋga nu o nyi ŋga, ki nyu na lewo we tni ma mbe wa leŋge.
27 Muu chlɔ ni ree? Maa u je. Mu n leŋge ra? Maa chlɔ haa cha.
28 La, na mu leŋge, mu n sisaa pe, a na chlɔ ŋmba u n blɔ chin tun leŋge kre, u n sisaa pe. La, leŋgefɛɛnlɛ na waŋgra ŋga blenyini kebɛɛlɛ nyi. La, ni chaa mbe e wɔ mbe yili yi nu.
29 Ni wolo, ŋga ni chaa mbe yo e pan yi na, nyjila ŋga kii wa o yiɛ kre kro fiɛn. Kena mu yire fuŋga na shie kre, leŋgefun u uyɛ pe na u n leŋge.
30 Mbe mblɛ pe nyɛni kre peyɛ pe na pe n na nyɛni. Mbe mblɛ pe yɛshɔɔrɔ lii kre pe na pe yiɛ n na shio. Mbe mblɛ pe loni kre pe na pe n yirɛ ta na loni.
31 A mblɛ pe waŋgra yirɛ ta kre, pia ti pe yiɛ shɔ yi na. Ŋgi na hin? Imi waŋgra shie kre, kia mu mbe kla.
32 Ni chaa mbe jawala bɛɛlɛ laa e na. Lewo blɔ ŋmba u n leŋge kre, o Tafun wre tnumu na u jawala nyi, imi we pe mbe o Tafun wre yiɛ nyi.
33 La, blɔ ŋmba u leŋge kre, waŋgra kee na u jawala nyi. Ŋgi na hin? U chaa mbe u kepele u chɔ yiɛ nyi,
34 a ki tia u jawalaa shiin shiin. A chlɔ ŋmba u n leŋge, ndee bichable ŋmba u n blɔ chin kre, o Tafun wre kee na u jawala nyi, imi we pe mbe pe cheche wejiŋge, na ŋumu nu. La, chlɔ ŋmba u leŋge kre, waŋgra yirɛ na u yiɛ nyina, imi we pe mbe u plɔ yiɛshɔ u na.
35 E chichie na ni yire kee nyjɛ yuu. Chaa ma ni chaa mbe e leŋgeere ti. La, ŋga ki nyu, mu fna kre ni chaa mbe e pe, mbe jaa eyɛ wru poŋgo mbe le o Tafun wre tnumu nu.
36 Na blɔ wa le na u bichlɔ wa da leŋgee, a pɔ wre n na chaa mbe kepele chichie pe, a lɛ wre na chaa mbe u bichlɔ wre leŋge kre, u ti u leŋge, sisaa ma.
37 La, na blɔ wre ja mu yire gbiŋmbi u loloŋgo nu, mu u jawala pe na wa ti u pɔ wre leŋge, na yaka ma ki u pɔ kre, uu kolo ni mbe jaa ki pe. Na ki pan ma, kena blɔ wre ka pe na u n tia u bichlɔ wre leŋge.
38 A ŋmba we ti u pɔ leŋge kre ka pe, la, ŋmba we ti u pɔ tni ma mbe wa leŋge kre ka pe titi.
39 Mbra chlɔ pɔ nyjila ŋga ni u plɔɔ wa ŋmaa ni. Na u plɔ wre ku rɛ, kena kre u uyɛ ta mbe jaa blɔ ŋmba u chaa leŋge na, la, Kristo ndro ki fna u leŋge.
40 Mi jawala nu, na u tni ma kre, u yiɛ we shɔ mbe wɛ ŋga we leŋge na. Ni shɔnli na Nyiɛkpɔɔ Ŋumu ŋmba uu wa ni nu wre na ni yire na paara e pan kre.