Sɛɛnlɛ Sro Lie
8
Mu wru prɛ wɔ kaara haa kre, O kro kala chin, a imi na o kro chin mu da kre, kachindɛ ki paan yɛkpɔɔmu ni, la, koroo tii mbe o lɛ sumiɛ nu.
2 Na wa uyɛ pe na u kala chin kre, u n ta mu chin imi na ki fna u chin mbe da.
3 La, ŋmba u Nyiɛkpɔɔ kori kre, wre Nyiɛkpɔɔ chin.
4 Kena prɛ wɔ kaara yire kaa kee e yuu kre, o kro chin na sɛɛn pe yira waara waŋgra ŋga nu, a Nyiɛkpɔɔ wa n wa haka na, na nunu chom wre bɔkɔ.
5 Hali na sɛɛnlɛ yɛɛ wa nyiɛ yiɛ na, ndee tra mna mu nɛɛ kre,
6 wre pan rɛ, Nyiɛkpɔɔ wree nunu chom, wre wi o Lɛ wre, a wre u yirɛ kro gbeele, a u sumiɛ na u yila mu o gbeele. A o Tafun Yesu Kristo ŋmba na u yire mu yirɛ kro gbeele, a o yire u na mu ŋmaa ta wree nunu.
7 La, ndro kro ma u kre kee ŋga chin. Plɛ taa sɛɛnlɛ kro mu mu, ki tia na pe yire kaara nyjɛ kaa, mbe pra jawa na sɛɛnlɛ wee yi yɛŋgɛ. Pe jawala pe pini na na pe yi ka, kena pe peyɛ tɔ nɛɛrɛ ni.
8 Kaara kaa wa jaa ti Nyiɛkpɔɔ yiɛshɔ o na. Na o yi ka o, na o n yi ka o, waa yaka ta yi nu.
9 La, e dɔɔta, mbe yaa kolo ŋga yire ta kre wru, mbe ti mblɛ shɔnlie ki n yire kre to.
10 Kena ŋu ŋmba mu chin kre, na ŋmba shɔnlie ki n yire wre mu nya, na mu kaa sɛɛn jaara, kia u ŋga faŋga mbe u sɛ sɛɛn kaara ka na ree?
11 Kena mu ŋmbrɔ ŋmba shɔnlie ki n yire, a Yesu yila u na mu ku wre we kla, ŋga ŋu chin kre ndra na.
12 Na ki pan ma, ki pe sisaa mu Kristo taan, na mu mu ŋmbrɔ pe sisaa kre kolo ŋga na, na mu tia u faŋga ta, mu kee ŋga u jawa na ki pe sisaa pe.
13 Kena na sɛɛn kaara kaa we ti mbe ni ŋmbrɔ le sisam nu kre, kena mba sɛɛn kaara ka na, mbe ki ti ni ŋmbrɔ le sisam nu.