3 Imi na ni niyɛ nyu woni mblɛ pe ni wie yire kalɛɛ nyjɛ pan yi kre.

4 Kena o n kolo ni na pie o ŋga sro, na nyumu o tnumu ŋga o tuni kre na ra?

5 A o n wa kolo ni na oo chlɔ shɔnlifun leŋge mbe taa oyɛ na, imi na bitumblɔ pre plɛ, na o Tafun wre chinlɛ, na Peter nyi kre ra?

6 Ndee mi na Barnabas chiin o fna mbe oyɛ faŋga tɛɛ mbe tnumu tun, mbe chiin yaka ta mbe ka ra?

7 Soja ŋmbi u uyɛ fɔlɔ toni hin? Ŋmbi u see teeri mbe wa ki sro ka le nyuu hin? Flachɛ ŋmbi u n kolo ni na we nui mblɛ u le pre nɔnɔ gbɔ hin?

8 Lewo jaŋga ni ni kee ŋga yuu ree? Pan Moses mbra yire yo na.

9 Pe ki nyunɔ Moses mbra yire nu mbo, “Maashia nuu ŋmba u nyaari bleju nu, na yi tru wre nyu pɔ.”^a Kena nui chiin kee kra Nyiɛkpɔɔ shian, a wra yo ma ŋgaa?

10 Ndee e n shɔnli na wre na wra nyi ree? Wre na pra yila mu kre kee ŋga nyunɔ Nyiɛkpɔɔ hlɛ kre nu mu tɛɛ. Ŋgi na hin? Falifun wre, na yirɛ kunfun wre, pe fna mbe pe tnumu tun, mbra kaan na pie pe wee ta yirɛ nyjɛ pie luu yire nu.

11 Kena ŋga o pan mu e ŋga Kpra Ŋumu wre kee yire ŋga, ki kpɔɔ e pan mu tro na oo wejiyirɛ ta tnu yirɛ e pan ra?

12 Na plɛɛ jaŋga ni na pie yire yirɛ nyjɛ ta e pan, wre jaŋga n wɛ prefɛɛnlɛ na ree? Wre n na kre jaŋga kre lii, la, o frɔ mu na lii kee kro na, mbe waa kee ka wru mbe paan Kristo ketaan kre tɔ kolo.

13 E n chin na mblɛ pe tnumu tuni Suminyuŋgo wa kre, Suminyuŋgo wa pe pe nyu sro taa ra? A mblɛ pe sra woni sragbunu na kre, pe sra yirɛ yire yɛ taa.

14 Pan chɔɔ o Tafun wre ki yo na, mblɛ pe ketaan kre kpali kre fna mbe pe aliire ta, ketaan kre kpalaa nu.

15 La, mi n kre jaŋga ŋga ka li e na, a ni n na e nyunɔi mbe kre ti e pe ma mbe ni ŋga. Na ni ku prɔ ni pan, na ndro we kee ŋga ni ni niyɛ kpɔɔri ŋga le kewaa.

16 Na ni ketaan kre yuu, kre n nyina na ki fna ni niyɛ kpɔɔ. Ŋgi na hin? Fna ki fna mbe ni ketaan kre kpali. Na ni n shia ketaan kre kpali, kena ni atɛ.

17 Na mi titi chaara na ni tnumu kre tuni kre, ka mbe na fɔtɔɔrɔ ta, la, mi titi ma ni ki tuni niyɛ chaara na, Nyiɛkpɔɔ u ni wɔ, mu kre tnumu ŋga le ni kɛɛ.

18 Kena ni fɔtɔɔrɔ yi ŋgi hin? Ni fɔtɔɔrɔ yi na mbe ketaan kre kpali finfin, mbe mba yaka wie ki nu, la, kaa nii wa jaŋga ni na mbe yaka wie.

19 Ni niyɛ ta, ndro wa tnu ma mi, la, mi titi ni niyɛ pe tnu mu ndro kro ŋga, imi kie pe mbe ni lenɛɛrɛ ta, mbe pe paan o Tafun wre sumi.

20 Ŋga ndaa wa Judae nu kre, ndaa niyɛ pe na Judae wo wi, imi kie pe mbe ni pe ta. Ŋga ndaa wa mblɛ pee wa Moses mbra jaara kre, ndaa niyɛ pe na Moses mbra jaara ni nyi, imi kie pe mbe ni pe ta. La, Moses mbra nsra ni pɔ.

21 Pan chɔɔ, na ni sɛ mblɛ pe n wa Moses mbra jaara nu kre, mbe ni niyɛ pe na ni n wa mbra jaara, imi kie pe mbe ni pe ta. La, kre n na nyina na, ni n wa Nyiɛkpɔɔ mbra jaara. Nii wa Kristo mbra jaara.

22 Na nii wa mblɛ shɔnlie kii fiɛn nu kre, ni niyɛ pini na pe wa wi mi, imi kie pe mbe ni pe ta. Leele mblɛ nu mbe sɛ kpan, ndaa niyɛ pini na pre lɛ, imi kie pe mbe ni plɛ ta.

23 Nyjɛ krɛrɛ, ketaan kre na ni yila na yi pini, mbe ki ti o kro ki dwamu ta.

24 E chin na tafɛŋgɛ lawee kre, leele pre kro feni chɔ, nde ndro nunu we yira ŋga pie kɛ kre ta, kena e fɛ chichie, e kɛyira ta.

25 Ndro ŋmba u shie fɛ haa kre uyɛ knai chichie, na we ja mbe uyɛ yii kee kro na, mbe fɛ mbe sɛ kɛyira ŋga pie u ŋga kre ta. Nde kre yira kre nyini we kɔɔ kla, la, wre yira ŋga oo ta kre rɛ, ki n wa klahaa ni fio.

26 Kre ki tia ni yiɛnyina na feni. Pan ni nyi na churɛgbunfun wi, ndaa gbun mbe la.

27 Ni ni wejiŋge fiŋge. Ŋga ki tna wejiŋge kre pan ma ki pini, imi mbe pe, ŋga ni ketaan ŋga kpali ŋga, mbe pia kɔɔ ni je na ni n fna mbe kɛyira kre ta.