Jaaraa
10
Ni wolo, ni chaa mbe e kee nyjɛ o tolɛɛlɛ mblɛ pra taa Moses na pre na nya yire sɔɔnri. Tlo kre na pe kro tɔ, a pe kro na nyaari mu tro epo nyiɛ kre lam.
2 Ŋga pra tro epo kre nu, a tlo kre na pe tɔ kre, pan kra nyi to na pe ndrɛ pra je mu le Moses kɛɛ.
3 Pe kro na chaa mna sro ŋga Kpra Ŋumu wre na pe ŋga kre li.
4 A pe kro na chaa mna nyumu ŋga Kpra Ŋumu wre na pe ŋga kre gbɔ. Dnɛ ŋga nu Ŋumu wre na tia nyumu na yili, a pra ta mu gbɔ kre na pre praa shie. A dnɛ kre, Kristo na wi.
5 Hali nyjɛ krɛrɛ kɔkro kre, Nyiɛkpɔɔ yiɛ nsra shɔ pe nɛɛrɛ kepele na, a kra tia pe nɛɛrɛ na ku fimi tra kre nu.
6 Yire kee nyjɛ pe o pan jaaraa fuŋgaami, mbe waa na sisam kee jawa mbe kɔɔ pe na pre lɛ,
7 ndee mbra sɛɛnlɛ sumi imi na pe plɛ na pe kre. Imi na pe ki nyunɔ Nyiɛkpɔɔ hlɛ kre nu mu tɛɛ kre mbo, “Leele pre na tni mu li, mu gbɔ, mna yiri mu yɔ.”a
8 Yaa ti mbe o tiɛri imi na pe plɛ na tiɛri, a leele kagbenyi fulo na taarɛ na to mu ku ble nunu kre.
9 Yaa ti mbe o o Tafun wre pe mbe le, imi pe plɛ na u pe mu le, a wɔɔlɔ na pe niɔ mu gbo kre.
10 A yaa ti mbe o na taanri imi na pe plɛ naa taanri, a nyjeeri bituŋu ŋmba u leele kuu wre na pan mu pe gbo kre.
11 Yire kee nyjɛ krɛrɛ na yili pe na, mna pe jaaraa mna plɛ ŋga, a pra yi nyunɔ mu tɛɛ mbe yi pe jaaraa wre mblɛ nyjila waŋgra paan mbe kla kre pan.
12 Kena e ti mbe ŋmba u jawa na u yire gbiŋmbi kre uyɛ dɔɔta, mbe wa to.
13 Nyu chaara kee ŋga ki da mu pan mu wɛ e na kpan, pan yi nyini leele dani. La, Nyiɛkpɔɔ pe kprafun, a wa ti na pe e nyu chaa, mbe ki wɛ e faŋga na. Nyjila ŋga nu pie na e nyu chaa kre, wre we ti e jaa eyɛ yii, mbe u e nyina kolo ŋga na ee tro mbe yili yi nu.
Sɛɛnlɛ Sro Na O Tafun Sro
14 Kena ni wolo mblɛ ni kori, e eyɛ wɔ e yili sɛɛnlɛ sumiɛ nu.
15 Ni paara na e ni na kachimblɛ lɛ yire. Yire titi, e kee ŋga mbe yo e pan ŋga kpra kun.
16 Gbɔyira ŋga Nyiɛkpɔɔ dwan, a o mboo ŋga ki na kre, na o gboo ki nu, kena Kristo nyimi kre ma o gboo ree? A paanu ŋga o pile kre, na o ki kaa, kena Kristo wejiŋge ma o kaa ra?
17 Ŋgi na hin? Paanu kree nunu, a wre nɛɛ, la, wejiŋge nunu lɛ wre, ŋgi na hin? O kro we chaa mbe paanu nunu kre ka.
18 E yiɛ wa e Israel leele pre le, pe mblɛ praa yirɛ nyjɛ ni praa sra woni sragbuɛnlɛɛ yire na, na Nyiɛkpɔɔ kaan yire kaa kre, pe n pe nunu na Nyiɛkpɔɔ ni ra?
19 Kena mni ni chaa mbe nyina hin? Ni chaa mbe nyina na sro nyjɛ ni pe sɛɛnlɛ peerii yire nyu ree? Ndee ni chaa mbe nyina na sɛɛn pe yira titi ra?
20 Pan ma ni yo. Ni yo na yirɛ yire ni pe sɛɛnlɛ peerii kre, ŋumufuɛn pe yi woni na kaan, Nyiɛkpɔɔ ma. Kena ni n na chaa mbe yire na ŋumufuɛn pe nunu.
21 Yaa jaa gbɔ o Tafun gbɔyira nu, mbe ndruu sɛ gbɔ ŋumufuɛn gbɔyira nu. Yaa jaa sɛ li o Tafun lihaa, mbe ndruu sɛ li ŋumufuɛn lihaa.
22 O chaa mbe ti o Tafun wre krɔkun na o ni ra? O faŋga wɛ u wo na ra?
23 Koloo wa mbe o jaa kee kro pe, la, kee kro ma ki nyu mu o ŋga. Koloo wa mbe o jaa kee kro pe, la, yi kro ma yie ya o na.
24 Yaa na yire chiin chichie jawa, e ta e ŋmbilɛ jawa chichie ni na.
25 Kaara ŋga nyini pe prɛ jafa na kpan, ee jaa ki ka, yaa shia kaara ŋga nyini yi wie, a yaa na lɛɛlɛ ki kaa na.
26 Tra na yirɛ nyjɛ yii wa ki na kro, Nyiɛkpɔɔ wee yi.
27 Na leele mblɛ pe n shɔnli pre e wa yeeri mbe ŋu na wre sɛ li, a maa ki nɔɔloo mu sɛ, sro ŋga nyini we tɛɛ mu yiɛ kpan, ta lii, maa shia sro ŋga nyini yi wie, ŋga mu kɔɔ na kawa na ki ni kre ndra na.
28 La, na wa waa yo mu pan na, “Kaara ŋga rɛ, prɛ wɔ kaara yi kre.” Ŋmba u ki yo mu pan wre jawala, na imi we na kawa na ki ni kre na, maa shia ki ka.
29 Ŋga ŋu titi we na kawa na ki ni kre ndra na ma, la, ŋmba u ki yo mu pan wre na yi. Wa we yo na, “Ŋgi ki tia ni niyɛ ta, mbe jaa ŋga ni chaa pe, a kee ŋga ni ŋmbrɔ jawa na, mba jaa ŋga ni chaa pe ŋga hin?
30 Na ni ta mu Nyiɛkpɔɔ ŋga mboo ni sro ŋga mbe li na mu kɔ, mni mbe ndro ni kee yo ki na na hin?”
31 Kena kee ŋga mu pe kpan, na lii mu lii o, na gboo mu gboo o, ki pe kolo ŋga na Nyiɛkpɔɔ we yiɛnyiŋge ta.
32 Wa waashia pe gbrontohaa mbe Judae ndro, ndee ŋmba u n pe Judae wo, ndee Nyiɛkpɔɔ sumifun wa pan.
33 E pe imi na ni pini kre, nyjila kro nu ni chaa ŋga mbe pe kpan, mbe ni ndro kro yiɛ nyi, ŋga ki nyu mu ni ŋga na ma ni yiɛ nyina, la, imi kie pe mbe pe ŋmaa ta na yi.