Swɛ Nyjɛ Pe Jerusalem Sumifɛɛnlɛ Kaan
16
Mu wru swɛ nyjɛ pe waari na Nyiɛkpɔɔ sumifɛɛnlɛ kaan kre, e pe imi na ndaa yo Galatian sumifɛɛnlɛ pan na pra pini kre.
2 Aliɛri ŋga kie to kpan, swa ŋga ŋufun ta kranu kre nu kpan, ki fna mu ki le mbe imi ki fna wɔ mbe tɛɛ. Na ni waa pan kre, kena tɔɔ shɔɔ ka n wa na.
3 Na mbaa pan, leele mblɛ yire titi we wɔ pre, mbe hlɛ ŋga ni pie pe chin nyunɔ mbe ya e swa kre na, mbe pe tun na ki ni Jerusalem na.
4 A na kia fna na mbe ka sɛ naa, kena mi na pre we sɛ.
Ŋga Paul Jawa Mbe Pe
5 Na ndaa yiri Macedonia na, mbe pan e pan wa. Bawa ni chaa mbe tro tun.
6 Aada mbe ble yɛ li e pan wa, na nyiɛ li ki na, mbe zaara nyjila da wa, mbe ki ti mna mbe na chaa mbe sɛ kpan, mbe e jaa ya ni na.
7 Ni n na chaa mbe ni shaaraa kre sɛ pe na shaari ni e shaari mbe troo sɛ lawee ka nu. Ni chaa na o Tafun wre li ki na, mbe ni tni e jaara mbe mu chiɛri.
8 La, mbe tni Ephesus na mna mbe sɛ su Pentecost ble kre nu.
9 Ŋgi na hin? Kolo badaaŋga nyaa mu ni ŋga, a ndaa ketaan kre kpali, a kee nɛɛrɛ na pini, la, loŋgoolo pe nɛɛ.
Timothy Kee
10 Na Timothy waa pan, e u le chichie, mbe wa fiɛrɛ wru mbe tni e nu. Ŋgi na hin? O Tafun wre tnumu u tuni na mi wi na.
11 Kena yaa shia u le fiɛn. E u wa kolo na wejinyiŋge ni, mbe u ndru mbe pan ni jaara. Nii wa na wre na o wolo hamblɛ pre sri.
Apollos Kee
12 O ŋmbrɔ Apollos rɛ, ni u tali mbe wre na o wolo pre pan mbe e shaari. U n na chaa mbe pan fuŋgaami. La, na waa kolo ta we pan.
13 E na dɔɔtaa, e yire gbiŋmbi e shɔnlie nu, e yire blɛm kɛ na, e sheli.
14 E ta e kee kro pini na koroo ni.
15 Ni wolo, e chin na Stephanas na u sele wolo na lɛ shɔnlifɛɛnlɛ mblɛ pra klu mu shɔnli Achaia na, a pe peyɛ wru mu Nyiɛkpɔɔ sumifɛɛnlɛ tnumu kre ŋga.
16 Ni wolo, e jande, e eyɛ nyjii e pre leele mblɛ ŋga, pre na mblɛ pe Nyiɛkpɔɔ tnumu tuni pre kro.
17 Ni yiɛshɔ Stephanas, na Fortunatus, na Achaicus paan kre na. Ŋgi na hin? Pe pan mu ŋga ee na pe ni pan kre pe.
18 Pe tia ni yiɛshɔ, imi na pe tia e yɛshɔɔrɔ ta wa kre. Pre leele mblɛ nyini ki fna mbe e eyɛ nyjii mbe ŋga chiriri kre.
Shaaraa
19 Sumifɛɛnlɛ mblɛ pee wa Asia na kre, pe e shaari. Aquila, na Priscilla, na sumifɛɛnlɛ mblɛ pe fnii pe katoo wa kre kro e shaari chichie o Tafun mɛɛ nu.
20 O wolo pre kro e shaari. E eyɛ shaari chichie ni pan.
21 Mi Paul, mi titi kɛ nyunɔmu shaaraa yi ŋga.
22 Ŋmba u n o Tafun kori wre, Nyiɛkpɔɔ we u sun. Kena o Tafun pan.
23 Yire na o Tafun Yesu dumiɛ e tni.
24 Ni e kro kori Yesu Kristo mɛɛ nu. Ami.