9 Mi ni pe fiɛn kuraa bitumblɔ pre nu, a ni n fna mbe pe ni yeeri bituŋu, ŋgi na hin? Ndaa Nyiɛkpɔɔ sumifɛɛnlɛ pre pra.

10 La, Nyiɛkpɔɔ dumiɛ kre saara na ni pe imi na ni nyi ŋga, a u dumiɛ ŋga u ni dumi kre n pe finfin, ŋgi na hin? Ni tnumu tun mu wɛ bitumblɔ hamblɛ pre na, la, mi titi ma ni ja mu ki pe niyɛ, Nyiɛkpɔɔ u ni dumi, mu ni tɛɛ mu tnumu tun.

11 Na mi ni tnumu tun kpɔɔ o, na pre lɛ o, ŋga ki shian yi na, o na ketaan kre kpali, a e na ki shɔnli.

12 Kena, na o ki kpali e nu na Kristo nyi mu yili kuulo nu, ŋgi ki tia e plɛ na yuu na kunnyiɛ n wa ŋga hin?

13 La, na kunnyiɛ n wa, kena Kristo nsra nyi hin?

14 A na Kristo nsra nyi, kena o kee ŋga o yuu kre pe waara, a e shɔnlie kre pe finfin.

15 A leele we o le na kala o fnɛ na taari Nyiɛkpɔɔ na, ŋgi na hin? O yuu na Nyiɛkpɔɔ Kristo nyi mu yili kuulo nu. A na kpra yi na kunnyiɛ n wa kre, kena u nsra nyi.

16 A na yɛŋgɛ yi na kunnyiɛ n wa kre, kena Kristo nsra nyi rɔ.

17 A na Kristo nsra nyi, kena e shɔnlie pe finfin, a ee wa e sisam nu tɛ.

18 Kena mblɛ pe ku Kristo mɛɛ nu kre ku mu fun.

19 Na ŋmaa ŋga nu o nyi ŋga chiin na o dankna ta Kristo nu kre, kena wre lɛ leele mblɛ kee kii fooro ni kpɔɔ mu wɛ ndro kro na.

20 La, kpra kee ŋga kii wa ki nu yi na, Kristo nyi mu yili kuulo nu, mu nyina na kuulo we kɔɔ nyi.

21 Ŋgi na hin? Imi na kra yire ndro nunu na, a kumu pan kre, pan chɔɔ ki yire ndro nunu na, a kunnyiɛ pan na.

22 A imi na ki yire Adam na a ndro kro na kuu kre, pan chɔ ŋga leele na Kristo pe nunu ŋga, pie nyi mbe ŋmaa ta.

23 O nyjila we da. Kristo wra klu mu ku mu nyi, a na waa ndru mu pan, u leele we nyi mbe ŋmaa ta.

24 Kre nu yirɛ kro nyu we to. Na waa jaŋgafɛɛnlɛ, na faŋgafɛɛnlɛ kro kla kre, we u ŋunumulie kre kna mbe u Lɛ Nyiɛkpɔɔ wre ŋga.

25 Ŋgi na hin? Kristo fna mbe ŋunumu li mbe sɛ sun na we u loŋgoolo kro le u jaŋga jaara.

26 Loŋgo ŋmba we kla haŋa wi kumu.

27 Pe ki nyunɔ Nyiɛkpɔɔ hlɛ kre nu mu tɛɛ mbo, “U tia u jaŋga ta yira kro na.” Na pe yo “U tia Kristo jaŋga ta yirɛ kro na,” Ki nɔɔ nyina chasi na Nyiɛkpɔɔ ŋmba u tia u jaŋga ta yirɛ kro na wre n chaa.

28 Na Nyiɛkpɔɔ waa yirɛ kro le u jaara mu kɔ kre, kre u Biblɔ wre titi we uyɛ le Nyiɛkpɔɔ ŋmba u yirɛ kro le u jaŋga jaara wre jaara na, mbe Nyiɛkpɔɔ wre titi ŋunumulie yira kro na.

29 A na kunnyiɛ n wa, kena mblɛ pe tia pe pe ndrɛ je kuulo titɛɛ ŋga hin? Yira ŋgi pe chaa mbe nya hin? Na yɛŋgɛ kee pe yuu na kunnyiɛ n wa wala, kena ŋgi ki tia pra pe ndrɛ jee kuulo titɛɛ hin?

30 A kena mni a o tia kumu na wre tɔndɔ, a o na kala nyaa nyjila kro nu ŋga hin?

31 Ni wolo, ki pe kpra na ni kumu nyaa blenyini, a pan ki pe kpra chɔɔ, na ni e teeri na niyɛ kpɔɔri o Tafun Yesu Kristo wre nu.

32 A na tnu ŋga mbe ta tra mna na yi kre, kaa mi na Ephesus bilɛ mblɛ pe nyaai na nyaalam yurɛ lɛ pre wa na wi. Na kunnyiɛ n wa yɛŋgɛ waa, kena e ti o na lii mbra gboo, ŋgi na hin? Baŋga imi, na o ku.

33 Yaa ti mbe pe e fana. “Nɔɔlɔ sisaa wruu kepele chiriri klai.”

34 E yiɛ tɛɛ, mbe yaa na sisaa pini. Ŋgi na hin? Plɛɛ wa e nu a pe n Nyiɛkpɔɔ chin. E ti mbe nyifɛɛrɛ e gbo na ni kre kee ŋga yuu e pan.

35 Aada wa we wie na, “Mni sembremu kuulo nyiɛ nyi hin? A wejiŋge ŋgi sembremu pie ta hin?”

36 Jijuo, ŋga mu luu kre wa jaa yiri, fɔna ki fɔɔn tun.

37 A na mu chaa mbe yua, ndee mbe sro ka tiŋge nyini chin kre, ki bie mu le tra, ki tiŋge ŋga kie yiri kre ma mu le tra.

38 La, Nyiɛkpɔɔ u ki kaan wejiŋge ŋga u chaa. Yira bie ŋga mu luu kpan, kre na ki tiŋge nyini yi.

39 Wejiŋge kro n nunu, leele wejinyi nyinii nunu, a yurɛ wee nyinii nunu, a hanyiɛlɛ wee nyinii nunu, a mbroe wee nyinii nunu.

40 Pan chɔɔ nyjeeri wejiŋgee wa, a tra wejiŋgee wa, la, nyjeeri wejiŋge nyumu nyinii nunu, a tra wejiŋge nyumu nyinii nunu.

41 Yila nyumu nyinii kiyɛ, a nyiɛpɔ nyumu nyinii kiyɛ, a wɔɛlɛɛ nyumu nyinii yi yɛyɛ. Wɔɛlɛɛ yire yɛ nyinii wa, yire na yire nyumu nyini yi.

42 Kena imi na kuulo nyiɛ nyi yi kre. Wejiŋge ŋga pie le tra kre we fɔɔn, a ŋga kie nyi kre wa jaa fɔɔn fio.

43 Ŋga kie le tra yɛkuuro nu kre, we nyi mbe yɛnyiŋge ta. Kie le tra, na faŋga n wa ki nu, la, kie nyi faŋga ni.

44 Kre wejiŋge ŋga o nyaa ŋga we le tra, la, ŋga kie nyi kre we pe ŋumu wejiŋge. Imi kre wejiŋge ŋga wa kre chɔɔ, pan ŋumu wejiŋgee wa.

45 Pe ki nyunɔ Nyiɛkpɔɔ hlɛ kre nu mu tɛɛ mbo, “Adam jle ŋmba Nyiɛkpɔɔ na klu mu wa kre, ŋmaa wra u ŋga,” la, ŋmba u kro tɔ wre rɛ, Kpra Ŋumu ŋmba u ŋmaa kaan wi.

46 La, ŋumu wejiŋge ma kra klu mu pan, la, tra wejiŋge kre kra klu mu pan, a ŋumu wejiŋge kre na chin mu taa.

47 Lewo ŋmba Nyiɛkpɔɔ na klu mu wa wre, tra ŋga pooro ni pra u faanri, a lewo shiin wo wre, nyjeeri wre yiri mu pan.

48 Imi na ŋmba pra faanri pooro ni wre na nyi kre, pan chɔɔ mblɛ pee wa tra mna nyi. A imi ŋmba u yiri nyjeeri wre nyi kre, pan nyjeeri wolo pre nyi na.

49 Imi na o tra mna ndro wre wru kre, pan chɔɔ oo kɔɔ nyjeeri wo wre wru na.

50 Ni wolo, ŋga ni yuu e pan yi na, wejikaara na nyimi wa jaa sɛ Nyiɛkpɔɔ ŋunumu kre nu. A ŋga kie fɔɔn kre, wa jaa ŋga kia fɔɔn kre krɔ li.

51 E loo, ndrandra kee mbe yo e pan kre. O kro wa ku, la, o kro we chinɛ,

52 na bnɔ haŋa kre waa tin, o kro we chinɛ nyjila nunu chom na, nyini wa gbun gbee shiin kple. Na bnɔ kre waa tin, Kristo leele mblɛ pe ku pre we nyi mbe ŋmaa ta, a pia ku na. A wre mblɛ o le kro we chinɛ.

53 A o wejinyi nyjɛ yie jaa ku mbe fɔɔn kre we chinɛ, mbe kaari wejinyi nyjɛ yia jaa ku mbe fɔɔn.

54 Kena na yira ŋga kie ku mbe fɔɔn kre, na ki waa chinɛ mu kaari ŋga kia ku mbe fɔɔn kre, kena kee kre pe nyunɔ Nyiɛkpɔɔ hlɛ kre nu mu tɛɛ na, “U kumu jaŋga gbo, mu jaŋga ta ki na.”^a Kre we pe yɛŋgɛ.