Yolo Fɔnyi Yoo Na Nyiɛkpɔɔ Keenyanyoo
14
Kena e klu e koroo haa cha, e ti e yiɛ nyina Kpra Ŋumu wre yirɛ nyjɛ u kee yire na, la, ŋga ki nyu yi nu yi Nyiɛkpɔɔ kee nyanyoo.
2 Ŋmba u yolo fɔnyi yuu kre, leele ni ma u paara, la, Nyiɛkpɔɔ ni u paara. Ŋgi na hin? Ndro n na u yolo yire nɔɔ ndru. Ŋumu wre jaŋga ni u kpra kee nyjɛ yi ndra yire yuu.
3 La, ŋmba u Nyiɛkpɔɔ kee nyaa na yuu kre, leele pan u yi yuu, na yaa pe na mbe pe lɛ Nyiɛkpɔɔ kee kre nu, na pe leni gbeŋmbaa na faŋga.
4 Ŋmba u yolo fɔnyi yuu kpan, uyɛ u leni faŋga, la, ŋmba u Nyiɛkpɔɔ kee nyaa na yuu kre sumifɛɛnlɛ pre u leni faŋga.
5 Ni chaa mbe e kro naa yolo fɔnyi yuu, la, ŋga ni chaa titi yi na, e kro we pe Nyiɛkpɔɔ kee nyanyofɛɛnlɛ. Ŋmba u Nyiɛkpɔɔ kee nyaa na yuu wre kpɔɔ mu wɛ yolo fɔnyi yofun wre na, fɔna ndroo wa mbe jaa yolo fɔnyi yire nɔɔ nyina, mbe ki sumifɛɛnlɛ pre le gbeŋmbaa.
6 Ni wolo, kena na ni pan na yolo fɔnyi yuu e nu, a e n na yi nɔɔ ndru, tnu ŋgi ee ta ni pan hin? Fɔna ni Nyiɛkpɔɔ kee ŋga u ni ŋga kre yo e pan, ndee fɔna ni kachindɛ kee yo e pan, ndee fɔna ni Nyiɛkpɔɔ kee nya mu yo e pan, ndee fɔna ni e nyina Nyiɛkpɔɔ kee kre.
7 Hali yirɛ nyjɛ nu ŋmaa n wa, a yi ja na gble kre, imi na bnɔ, na juru nyi ŋga, na yi n na tini chiriri, mni ndro we pe mbe mɛɛ ŋga luuro pe koni na ki ni chin hin?
8 A na ndro ŋmba u ŋunɔwibnɔ foo kre n ki fɔ chichie, ndro ŋmbi we uyɛ kna mbe sɛ ŋunɔ hin?
9 Pan chɔɔ ki nyi, na mu yolo fɔnyi yo, a ndro n yi nɔɔloo, mni we pe mbe kee ŋga mu yo kre nɔɔloo hin? Kena kie pe na fuflɛ na mu paara mu wo finfin.
10 Yolo nyininyinii wa waŋgra nu tataara, nde yi kro nɔɔ ni.
11 La, na ni n na yolo ka ndru kre, mbe ŋmba u ki yuu wre le yolo ka nyini yofun, mbe wrefun mi le yolo ka nyini yofun na.
12 Kena yire chɔɔ, ŋga e yiɛ nyina, a e na Kpra Ŋumu wre yirɛ yire chaa ŋga, e gbeŋmba e ŋga kie jaa ya sumifɛɛnlɛ pre na haa cha kpɔɔ.
13 Kena ŋmba u yolo fɔnyi yuu kre, u nyiɛtali mbe jaa na yi nɔɔ nyina.
14 Ŋgi na hin? Na ni nyiɛtali yolo fɔŋgɔ nu kre, kii wa na ni ŋumu nyiɛtali, nde ni jawala n chin ŋga ni yuu.
15 Kena mni ki fna mbe ni pe hin? Mbe nyiɛtali yolo fɔnyi nu, mbe ndru mbe nyiɛtali yolo nyjɛ nɔɔ ni ndru nu. Mbe mɛɛ kɔ yolo fɔnyi nu, mbe ndru mbe mɛɛ kɔ yolo nyjɛ nɔɔ ni ndru nu.
16 Na ŋu na ndro tni, a mna Nyiɛkpɔɔ kaan mboo yolo fɔnyi nu, mni we pe mbe yo “Ami” hin? Na u n chin ŋga mu yuu.
17 Hali na mboo ŋga mu kaan kre nyu, ŋmba ŋu na wre tni kre wa tnu ka ta ki nu.
18 Ni Nyiɛkpɔɔ kaan mboo na ni yolo fɔnyi yuu nɛɛrɛ mu wɛ e kro na.
19 La, na nii wa sumifɛɛnlɛ pre nu kre, na ni ni jawala tɛɛ mu kalɛɛ kunɔ yo, a pe yi nɔɔloo, a ni plɛ nyina kre, kre nyu mu wɛ ŋga mbe kee kagbeŋge yo yolo fɔnyi nu na.
20 Ni wolo, yaa pe biile tɛ, mbra bimi kee jawa, la, sisam haa kre, e eyɛ pe na bifimble lɛ, la, e loplombo jawala le.
21 Pe ki nyunɔ Nyiɛkpɔɔ hlɛ kre nu mu tɛɛ mbo,
“O Tafun Nyiɛkpɔɔ yo na, leele mblɛ pe yolo fɔnyi yuu,
na waŋgra ka leele na mbe yire mbe paara leele mblɛ pan,
a nde kre naa kɛ ni, pia ki loo.”a
22 Kena yolo fɔnyi yoo n pe sɛmbɛɛrɛ yira mu shɔnlifɛɛnlɛ ŋga, la, mblɛ pe n shɔnli pre pan yi pe sɛmbɛɛrɛ yira. Nyiɛkpɔɔ kee nyanyoo yaa shɔnlifɛɛnlɛ na mbe pe lɛ Nyiɛkpɔɔ kee kre nu, la, ki n na yaa mblɛ pe n shɔnli pre na.
23 Kena na yire sumifɛɛnlɛ sɛ fni, a e kro na yolo fɔnyi yuu poŋgo, a fimi leele, ndee mblɛ pe n shɔnli pre pan e nu kre, pia yo na tɔɔlɔ e tɔɔlɔ ree?
24 La, na e kro Nyiɛkpɔɔ kee nyaa na yuu kre, a ŋmba u n shɔnli, ndee fimi ndro pan e nu kre, nyjɛ we loo kre we u gbun pimi ni, mbe ti u chin uyɛ lam na sisaa pefun wi.
25 A kee ŋga ki ndra u lam kpan, pie ki yo mbe u loo, mbe u kosie kan, mbe yo nyu lam na, “Kpra na, Nyiɛkpɔɔ wa e lalaa.”
E Ŋga Kie Ti Sumiɛ Kre Sɛ Yiɛ Pe
26 Kena mni mbe yo na hin? Ni wolo, na e fni titɛɛ kre, waa wa na mɛɛ ni mbe kɔ, a waa wa kee ni mbe nyina, a waa wa wɔnyinakee ni, a waa wa mbe yolo fɔnyi yo, a waa wa chɔɔ mbe yi nɔɔ nyina. E ti mbe yi kro na pini kolo ŋga na sumiɛ kre we sɛ yiɛ.
27 Na plɛ we yolo fɔnyi yo kre, ki fna leele shiin, na pe nɛɛ kuraa kre, pe fna taarɛ, na ŋmba yo, mbe ŋmba yo, mbe wa yi nɔɔ nyina.
28 La, na ndro n wa mbe yi nɔɔ nyina kre, kena pe pieri, mbe pre na Nyiɛkpɔɔ na yi paara.
29 A Nyiɛkpɔɔ kee nyanyofɛɛnlɛ pre, shiin ndee taarɛ pe paara, mbe leele hamblɛ pre pe kee yire kpra kun.
30 La, na wa waa na Nyiɛkpɔɔ kee nyaa na yuu, a shiin wo waa yiri kre, ki fna mbe jle wo wre pieri.
31 Ŋgi na hin? E kro fna mbe yo nununu, mbe e kro jaa yaka twan mbe yili nyjɛ pe yuu yire nu, mbe yi e le gbeŋmbaa.
32 Nyiɛkpɔɔ kee nyanyofɛɛnlɛɛ wa jaŋga ni na, na kee yire pan, mbe pe jaa frɔ, mbe peyɛ shie.
33 Ŋgi na hin? Nyiɛkpɔɔ n pe Nyiɛkpɔɔ ŋmba u kee pini sakasaka, la, u pe wejinyiŋge Nyiɛkpɔɔ.
Imi na ki nyi Nyiɛkpɔɔ sumifɛɛnlɛ kro nu kre,
34 na e fni, ki fna mbe chiɛlɛ na pieri. Ŋgi na hin? Pe n kolo ni na pie paara, imi na Moses mbra nyina kre, pe fna mbe peyɛ nyjii.
35 Na kee ka pe chaa mbe chin kre, ki fna mbe pe sɛ pe pilɛ wie katoo. Ŋgi na hin? Ki pe nyifɛɛrɛ kee na chlɔ we yiri mbe paara sumifɛɛnlɛ lalaa.
36 Ndee e jawa na yire na Nyiɛkpɔɔ kee kre klu mu yire mu pan ra? Ndee yire chiin na kee kre da ree?
37 Na wa jawa na Nyiɛkpɔɔ kee nyanyofun wi, ndee Kpra Ŋumu wree wa u nu kre, ufun fna mbe chin na kee ŋga ni e nyunɔi ŋga, na o Tafun wre mbra yi.
38 Kena na wa n kre kee ŋga ni yuu ŋga wru mu pe keshian kre, yaa shia u wru mbe pe yaka.