Koroo Titi
13
Na ni ja na yolo kro yuu, hali mu na nyjeeri bitumblɔ yolo yuu na, a ni n koroo ni kre, pan ni gble na taha ŋga pe gbuun, ndee yambrawa ŋga pe nyaara yi.
2 A na ni ja na Nyiɛkpɔɔ kee nyaa na yuu, mu ja na ndrandra kee, na jawala kee kro chini, mu shɔnlie ta mbe jaa ti nyuɛ klɔ yi titɛɛ, na ni n koroo ni kre, kena yaka ndro ma mi.
3 Na ni yirɛ nyjɛ yii wa ni pan kro kɛ, mu niyɛ wru mu sra wɔ mbe pe ni gbo, na ni n koroo ni, tnu ka n wa ki nu.
4 Koroo frɔ kpɔɔ, a ki lɛɛ tna, yenyjam n wa koroo nu, a kraa kiyɛ kpɔɔ.
5 Koroo n na mɛɛ chaa, a kraa ŋga ki n fna pe, a ki n na kre chiin wo jawa, a ki krɔ na kun, a kra sisam le lɛɛ.
6 Koroo yiɛ n shɔ sisam pee na, la, kpra na ki yiɛshio.
7 Koroo na pra, a ki kee kro shɔnli, kii dankna ni kee kro nu, na frɔ kee kro nu.
8 Koroo n nyukɔɔrɔ ni, la, Nyiɛkpɔɔ kee nyanyoo, na yolo fɔnyi yoo, na kachindɛ, yi kro nyu we to, yi krɛrɛ nyjila we tro peii.
9 Ŋgi na hin? O kachindɛ n da haka, a o kee nyanyoo n da yaka.
10 Kena na ŋga ki nyu titi kre waa pan kre, bawa nyjɛ yi n da yaka kre nyjila we tro.
11 Ŋga ndaa pe pɔ kre, ndaa paara na pɔ wi, a ndaa bimi jawala jawa, na bimi kee pini, a ŋga ni da lopom ŋga, ni bimi kee yire ti.
12 Fuŋgaami ŋga, ki pe na dwanle nu o yirɛ nyaa duu, la, kre nyjila kre nu rɛ, oo yirɛ kro nya chasi. Fuŋgaami ŋga, ni n chin mu da haka, la, kre nyjila kre nu rɛ, mbe kee kro nɔɔloo chasi, imi na Nyiɛkpɔɔ ni lam kee chin kre.
13 Fuŋgaami, kee nyjɛ yi kro yi shɔnlie, na dankna, na koroo, a yi kro nu ŋga ki wɛ yi koroo.