Kpra Ŋumu Wre Yirɛ Nyjɛ U Kaan
12
Ni wolo, mu wru Kpra Ŋumu wre yirɛ nyjɛ u kee yire haa kre, ni n na chaa mbe yi ka ndra e na.
2 E chin na nyjila ŋga nu e n na pe Kristo wolo kre, sɛɛnlɛ nyjɛ yia jaa paara yire kro e na taa, a yira e wa mu fun.
3 Kena ni chaa mbe e chin na, na Nyiɛkpɔɔ Ŋumuu wa ndro nu, wa jaa kefɔɔn yo Yesu na. A ndro wa ja mbe Yesu yeeri Tafun, fɔna Kpra Ŋumu wre wa u nu.
4 Kpra Ŋumu wre yirɛ nyjɛ u kee yire nyini nɛɛ, la, Kpra Ŋumu nunu wre u yi kro kaan.
5 Sumiɛ kolo nɛɛ, la, Tafun nunu o kro sumi.
6 Kooloe nyjɛ na Nyiɛkpɔɔ yire na tnumu tuni o nu kre nɛɛ, la, Nyiɛkpɔɔ nunu wre u yi kro tuni lewo nu.
7 Kpra Ŋumu wre yire ndro wa na, na uyɛ woni na nyina, mbe ki pan tnu ni mbe o kro ŋga.
8 Kpra Ŋumu wre wa kaan kachindɛ kee, na tii mbe wa Nyiɛkpɔɔ kee nɔɔloo mbe yo.
9 Ŋumu wre chɔɔ wa kaan shɔnlie kpɔɔ, na wa kaan jaŋga wra yambla trai.
10 Kpra Ŋumu wre nunu wre chɔɔ wa kaan jaŋga wra kawako kee pini, mu na wa kaan jaŋga wra Nyiɛkpɔɔ kee nyaa na yuu, na wa kaan jaŋga mbe u ja mbe Ŋumu ŋga ki pe Nyiɛkpɔɔ wo, na ŋga ki n pe u wo chin, na wa kaan jaŋga mbe u jaa yolo fɔnyi yo, na wa kaan jaŋga mbe u ja mbe yolo fɔnyi yire nɔɔ nyina.
11 Kpra Ŋumu nunu wre u yire yirɛ nyjɛ kro pini, mu na ndro kro kaan ŋga wre Kpra Ŋumu wre titi chaa.
Wejiŋgee Nunu A Ki Kokoe Nɛɛ
12 Imi na lewo wejiŋgee nunu, a ki kokoe nɛɛ kre, pan Kristo nyi, kii wa na u sumifɛɛnlɛ nɛɛ, nde leele nunu lɛ.
13 Pan wre Judae, na mblɛ pe n pe Judae, na tinlɛ, na lebiile kro, pe yire Kpra ŋumu nunu wre na mu o ndrɛ je, a o Ŋumu nunu wre ta.
14 Lewo wejiŋge n pe kokoo nunu, ki kokoe nɛɛ.
15 Na ki pe na jele we yo na, kɛ ma mi, ki tia ni n chaa wejiŋge kre nu, kie jaa ti mbe kia pe wejiŋge kre kokoo ka ra?
16 A na ndie yo na, nyini ma mi, ki tia ni n chaa wejiŋge kre nu, kie jaa ti mbe kia pe wejiŋge kre kokoo ka ree?
17 Na wejiŋge kre poŋgo na pe nyini, mni kie na pe mbraa ndru hin? A na wejiŋge kre kro poŋgo na pe ndie, mni kie na pe mbraa ndiom ndru hin?
18 La, imi na ki nyi kre, Nyiɛkpɔɔ lewo kokoe yire pe wejiŋge nunu nu, imi na u chaa.
19 Na lewo wejiŋge na pe kokoo nunu chom, kaa sena wejiŋge kre nyi hin?
20 La, lewo kokoe yire nɛɛ, a nde wejiŋge nunu yi.
21 Ki tia nyini wa jaa yo kɛ pan na, “Ni kee ka ma na mu ni.” A ndra wa ja mbe yo jele pan na, “Ni kee ka ma na mu ni.”
22 La, lewo wejiŋge kokoo ŋga o jawa na ki n pe yaka kuraa kre, ma jaa yo na ki kee n shian.
23 A lewo wejiŋge kokoo ŋga o n na kaan buuro kuraa kre, kre o toni yira ni, mu ki wru mu pe yira kpɔɔ, a kokoe nyjɛ yi pe nyifɛɛrɛ ni kre, yire o toni yirɛ ni chiriri,
24 a o wejinyi kokoe nyjɛ yi nyaa fimi na yire, yi n yire yirɛ nyjɛ shian. La, Nyiɛkpɔɔ u wejiŋge kre pe, mu tia kokoo ŋga pe n wru mu pe yaka kuraa kre, a ki mɛɛ ta kpɔɔ.
25 Ki tia ma jaa wejiŋge kokoo ka wɔ kiyɛ, la, ki kokoe yiree yi yɛyɛ, nde yi kro keshian wa yi yɛ na.
26 Kena na kokoo nunu ka kala nyaa kre, yi kroo wa kanyana nu. A na pe kokoo nunu ka ŋga mɛɛ kre, yi kro yiɛshio.
27 Kena e kro, Kristo wejiŋge lɛ yire, a u wejiŋge kokoe lɛ yire nununu.
28 Nyiɛkpɔɔ plɛ wɔ sumifɛɛnlɛ nu mu tɛɛ. Mblɛ pe yiɛklu lɛ bitumblɔ, mblɛ pe taa shiin lɛ Nyiɛkpɔɔ kee nyanyofɛɛnlɛ, mblɛ pe taa taarɛ lɛ nyinafɛɛnlɛ, na kawako kee pe fɛɛnlɛ, na yambla trafɛɛnlɛ, na mblɛ pe yaa leele na, na loplombo, na mblɛ pe yolo fɔnyi yuu.
29 Pe kro n pe bitumblɔ, a pe kro n pe nyinafɛɛnlɛ, a pe kro ma pe kawako kee pini,
30 a pe kro ma pe yambla trai, a pe kro ma pe yolo fɔnyi yuu, a pe kro ma pe yolo fɔnyi nɔɔ nyina.
31 La, ni chaa mbe e yiɛ nyina Ŋumu kɛyirɛ nyjɛ kee yi shian titi yire na. A mbe e nyina kolo ŋga ki nyu mu wɛ yi kro na.