2
Ki tia ndaa ni jawala pe na, ni n na chaa mbe pan wa shiinwo na, mbe ki ti e yiɛ kɔɔ je.
2 Yire mblɛ e fna mbe ti ni yiɛshɔ kre, na ni pan mu tia e yiɛ je, ŋmbi we kro wa mbe ti ni yiɛshɔ na hin?
3 Kre ki tia ndaa e nyunɔ hlɛ jle kre, ni n na chaa na ni waa pan, mbe yire mblɛ ee ti ni yiɛshɔ kre, mbe e ti ni yiɛ je. Ni shɔ mu li na kee ŋga kie ti ni yiɛshɔ kre, kie ti mbe e yiɛshɔ na.
4 Ŋga ndaa e nyunɔi hlɛ ŋga, na fooro ni yii kpɔɔ, a ni yiɛ na je, a yotunyi naa ni fuu, chaa ma ndaa chaa mbe hlɛ kre ti e yiɛ je, la, ndaa chaa mbe e chin imi na ni e kori mu da.
Sisam Tinkɛɛ
5 Na e wa waa tia u ŋmbrɔ yiɛ je kre, mi yiɛ ma ufun tia ki je, la, yire e yɛjeere kee pini eyɛ na, nde ni n na chaa mbe paara ufun wre pan na krɔ ni.
6 Ŋga e tataara nyu fni, a e u ufun ndie tini ŋga, ki yila ma.
7 Kena e u sisam ti e u kɛ, e u le gbeŋmbaa, mbe u yiɛ wa je kpɔɔ mbe waa ndru kro.
8 Ni e tali, e ti mbe u chin na e u kori.
9 Ŋga ki tia ndaa e nyunɔ kre hlɛ ŋga yi na, ndaa chaa mbe e jawala le, na ee jaa li kee nyjɛ ni yuu e pan yire kro na.
10 Na wa kee ka pe, a e u sisam ti mu u kɛ kre, kena mi ki ti mu ufun kɛ na. Na ni kee ka ti mu kɛ kre, e chin na e ndra na ni yire Kristo jele na mu ki ti mu kɛ.
11 Imi kie pe mbe o Sutna tɔ kolo, mbe wa jaŋga ka ta o na. Ŋgi na hin? O Sutna kooloe nyjɛ na u troi yire chin.
Paul Jawala Kla Troas Na
12 Ŋga ndaa sɛ le Troas na mbe sɛ Kristo ketaan kre kpali wa kre, ndaa nya na o Tafun kolo nyaa ni pan wa.
13 La, ni lɛɛ nsra to ni nu, ŋgi na hin? Ni nsra o ŋmbrɔ Titus nya wa, ki tia ndaa kolo tali pe pan mna sɛ Macedonia na.
14 Ni Nyiɛkpɔɔ kaan mboo, na u tia o yire Kristo na mu wi mu yili. Nyiɛkpɔɔ o tɛɛ mu Kristo kachindɛ kee kre nyina, a ki lawee kro shɔ mu ta, na yira ndiom taan lawee shɔ mu ta.
15 Ŋgi na hin? O pe na tuwe ndiom taan ŋga Kristo Nyiɛkpɔɔ ŋga yi, a ki ndiom nyina mu le mblɛ ŋmaa Nyiɛkpɔɔ shio pre, na mblɛ pe shie mbe sɛ fun pre nu.
16 Mblɛ pe shie mbe sɛ fun pre pan kre, ki pe na kumu ndiom pe ndru, a mblɛ ŋmaa pe shio pre pan rɛ, ŋmaa titi ndiom pe ndru. A ŋmbi we jaa kre tnumu ŋga tun hin?
17 O n pe na leele mblɛ pe Nyiɛkpɔɔ kee kre kpali na swa chaa pre lɛ, la, o lɛɛ wɔ na kee kre kpali na Kristo sumifɛɛnlɛ lɛ wre Nyiɛkpɔɔ yiɛ.