Nyiɛkpɔɔ Nyu Nunu Fɔŋgɔ Kre Sumifɛɛnlɛ
3
Kena kre kee ŋga nyina na nyu kpɔɔmu kee o yuu e pan ree? Ndee ki fna mbe leele plɛ hlɛ nyunɔ, imi na plɛ pini kre, mbe paan o nyina e pan, mbe yire hlɛ nyunɔ mbe sɛ o nyina plɛ pan ree?
2 Yire lɛ o hlɛ ŋga ki o nyina, a ee wa o lolonyi nu, a ndro kro we jaa o nya mbe ki chin.
3 E tia leele chin na Kristo hlɛ ŋga u nyunɔ lɛ yire, kre hlɛ ŋga, inki ni ma pe ki nyunɔ, la, Nyiɛkpɔɔ ŋmba u le wre Ŋumu ni u ki nyunɔ. A dnɛ kpɛfrɛɛ kpɛfrɛɛ shiin na ma wra kee yire nyunɔ. La, leele lolonyi nu u yi nyunɔ.
4 Kre dankna ŋga o ta Nyiɛkpɔɔ nu mu yire Kristo na, na yire kee nyjɛ yuu.
5 Ki n pe yaka o chin mbra jaa kre tnumu ŋga tun, la, jaŋga ŋga o ta kre yiri Nyiɛkpɔɔ pan.
6 Wre u tia o ja mu yire nyu nunu fɔŋgɔ kre na na sumi, ki n pe mbra nyjɛ pe nyunɔ mu tɛɛ yire kolo na yi, la, Kpra Ŋumu wre kolo na yi. Mbra yire pe nyunɔ mu tɛɛ yire paan kumu ni, la, Kpra Ŋumu wre, ŋmaa wre kaan.
Nyu Nunu Fɔŋgɔ Kre Yɛnyiŋge
7 Ŋga Nyiɛkpɔɔ na mbra nyjɛ pra nyunɔ dnɛ na yire ŋga kre, u yɛnyiŋge na yili. Moses yiɛ ŋga kraa chiɛnri mbe Israel leele pre wa jaa ki le kre, kraa laari nyjila ka nu. Kena na yire mbra nyjɛ yi paan kumu ni kre ja mu pan kre yɛnyiŋge ŋga sembremu ni kre,
8 mni kie pe mbe Kpra Ŋumu wre kee ŋga ki paan ŋmaa ni kre wa jaa yɛnyiŋge ta kpɔɔ mbe wɛ hin?
9 Na kee ŋga ki leele gbuun pimi ni kre yɛnyiŋge ta, mni kie pe mbe kee ŋga ki tii mbe lewo fraka kre wa yɛnyiŋge ta kpɔɔ mbe wɛ hin?
10 Yɛnyiŋge jle kre n ja mu sna, ŋgi na hin? Yɛnyiŋge shiin wo kre pan mu wɛ ki na.
11 Na ŋga kra pan mu nyjila chiɛri li kre na yɛnyiŋge ta kre, ŋgi kie ti mbe ŋga kie tni nyjila kro nu kre wa yɛnyiŋge ta kpɔɔ hin?
12 Ŋga o kre dankna ŋga ta kre ndra na, ki tia o gbun ta.
13 O n pe na Moses wi, wre wraa yoŋgo teeri na yiɛ toni, mbe Israel leele pre wa u yiɛ ŋga kraa chiɛnri, mbe ndruu laa nyjila chiɛri kre le.
14 Hali mu pan mu su aŋga na, na Israel leele pre nyu nunu lɛɛ kre kee tɔɔnri, pe jawalaa wa mu tɔ tɛ, pan ki nyi na yoŋgo kre nyini kii wa mu pe jawala tɔ tɛ. Yoŋgo kre wa jaa laa lewo jawala na, fɔna wre na Kristo wre pe nunu.
15 Hali aŋga, na pe Moses hlɛ yire tɔɔnri kre, kre yoŋgo kre nyinii wa mu pe jawala tɔ tɛ.
16 La, na lewo laa u sisam kro, mu pan o Tafun wre pan kre, kre yoŋgo kre we laa, mbe u nɔɔloo ta.
17 O Tafun wre wi Kpra Ŋumu wre, a mna o Tafun wre Ŋumu nyi kpan, yɛtaaraa wa wa.
18 Wre mblɛ yiɛ na yoŋgo kre laa kre, o Tafun wre yɛnyiŋge chiɛnri o yiɛ na. A ŋga u Ŋumu wree wa o nu kre na, u o chinɛ na o kaan yɛnyiŋge kpɔɔ na wre wi.