Kpra Ŋumu Wre Yirɛ Chichiele
4
Nyiɛkpɔɔ yire u foorochiɛn na mu o ŋga kre tnumu ŋga, ki tia o sɔɔnrɔ wa jaa ku.
2 La, o ndrandra, na nyifɛɛrɛ kepelee yire je, o n na leele fana, a o n na ka yaa Nyiɛkpɔɔ kee kre na. La, o kpra kee kre kpali chasi, mu yire Nyiɛkpɔɔ yiɛ mu oyɛ wɔ mu nyina ndro kro pan.
3 Na ketaan ŋga o kpali kre ndra leele na kre, kena mblɛ pe shie mbe sɛ fun pre chiin na ki ndra.
4 Sutna ŋmba wi waŋgra ŋga tafun wre, u mblɛ pe n shɔ mu li pre jawala tɔ, ki tia pia ketaan ŋga yi kania, a ki pe Yesu Kristo yɛnyiŋge kre nya, a imi na Nyiɛkpɔɔ nyi to, pan Yesu nyi.
5 A oyɛ kee ma o kpali, Yesu Kristo kee o kpali, a wre wi o Tafun, a wre ndra na o pe e sumifɛɛnlɛ.
6 Nyiɛkpɔɔ ŋmba wra yo mbo, “Ndram ki saan mbe yili ndram wɔmu nu kre,”a wre u kania le o lolonyi nu, mu tia o u yɛnyiŋge kre ki chiɛnri Kristo yiɛ na kre nɔɔloo.
7 La, wre mblɛ o kre Kpra Ŋumu krɔ yira ŋga ta kre, pan o nyi na chɔɛ nyjɛ pe faanri na choo ni yi, mbe ki ti mbe leele chin na Nyiɛkpɔɔ pan jaŋga kpɔɔ yiri, o pan ma ki yiri.
8 Nyjila kro nu o kala nyaa, nde ka n kun o na. Nyjila ka nu o n chin imi oo oyɛ pe, la, o kaan.
9 O prafɛɛnlɛ nɛɛ, la, Nyiɛkpɔɔ wre n laa o kro, nyjila ka nu pe o gbuun na chaan, mbe o ndru mbe yiri.
10 Nyjila kro nu o kumu nyaa, imi na Kristo na pe kre, imi kie pe mbe pe Yesu ŋmaa kre nya o wejinyi nu.
11 Wre mblɛ oo wa na le kre, Yesu ndra na kumu kanyana o nyaa nyjila kro nu imi kie pe mbe pe Yesu ŋmaa kre nya o wejinyi nyjɛ yie ku yire nu.
12 Kena wre rɛ, kumu kanyana nu o nyi, mbe ki ti mbe yire blenyini ŋmaa ta.
Blenyini Ŋmaa Kre Dankna
13 Pe ki nyunɔ Nyiɛkpɔɔ hlɛ kre nu mu tɛɛ mbo, “Ndaa shɔ mu li, ki tia ndaa paara.”b Wre Kpra Ŋumu wre nunu chɔɔ o ta mu shɔnli, mu na paara na.
14 O chin na Nyiɛkpɔɔ ŋmba wra o Tafun Yesu nyi mu u ŋga ŋmaa kre, we yire Yesu na mbe wre na yire nyi mbe sɛ u yiɛ na.
15 Yire kee nyjɛ o nyaa ŋga krɛrɛ, e ndra na yi, imi kie pe mbe dumiɛ ŋga lenɛɛrɛ taa kre ti Nyiɛkpɔɔ mboo ŋgaa nɛɛ, mbe u yɛnyiŋge ta.
Shɔnlie Tnumu
16 Kre kee ŋga ndra na o sɔɔnrɔ na ku. La, o wejikaara nyjɛ, yi lee, la, o ŋumu faŋga taa blenyini.
17 A yire kanyana fiɛn fiɛn nyjɛ o nyaa nyjila chiɛri nu ŋga, yie ti o blenyini yɛnyiŋge ŋga ki kpɔɔ mu wɛ yirɛ kro na kre ta.
18 Ki tia yirɛ nyjɛ leele nyaa nyiɛlɛ ni yire na ma o yiɛ nyi, la, nyjɛ yi n na nyaa nyiɛlɛ ni yire na o yiɛ nyi. Yirɛ nyjɛ yi nyaa nyiɛlɛ ni yire, yira mu, la, nyjɛ yira nya nyiɛlɛ ni yiree wa blenyini.