Ŋumu Wejikaara
5
Fuŋga o chin na o tra mna katoo ŋga nu o nyi, a ki pe o wejiŋge ŋga we kla, a Nyiɛkpɔɔ we o ŋga wejiŋge nyjeeri a kia jaa kla fio.
2 O jiin lɛɛ, a o yiɛ nyina o na o nyjeeri wejinyi yire chaa mbe yi o tɔ,
3 na o waa o wejinyi yire ta a yi o tɔ na yoŋgo fɔŋgɔ yi kre, pia o ŋumu nya wejiwaara na.
4 O tra mna wejinyi nyjɛ yi tia o na jiin lɛɛ, la, o n na chaa mbe wejinyi la, o chaa mbe nyjeeri wejinyi ta mbe yi o tɔ, imi kie pe mbe o wejinyi nyjɛ yie ku yire kna mbe pe blenyini ŋmaa wee.
5 Kre chinɛɛ ŋga oo chinɛ ŋga, Nyiɛkpɔɔ u o pe ma, mu o ŋga u Kpra Ŋumu wre mbe o chin na yɛŋgɛ oo chinɛ.
6 Ki tia o kaan nyjila kro nu. O chin na nyjila ŋga nu oo wa tra mna wejinyi ni ŋga, wre na o Tafun wre katoo haa le.
7 Shɔnlie ni o tni, ki n pe nyjɛ o nyaa na yi.
8 O dankna kpɔɔ, na chaa na oo ku mbe wre na o Tafun wre sɛ tni.
9 Ki tia na oo ŋmaa ni o, na o ku o, o jawala yi na o kee we u yiɛ nyi.
10 Ŋgi na hin? O kro we yire Kristo yiɛ mbe u o kpra kun. O kro we sɛ o chichie, ndee sisaa nyjɛ o pe tra mna fɔtɔɔrɔ ta nununu.
Nɔɔlɔ Ŋga Wre Na Nyiɛkpɔɔ Yii Mu Yire Kristo Na
11 O chin na ki fna mbe o o Tafun wre fiɛ, ki tia o yiɛnyina o na leele kna. Nyiɛkpɔɔ o chin imi na o nyi, a ni kaan na yire chɔɔ e ni chin.
12 Oyɛ ma o chaa mbe nyina e pan na, la, chaa o chaa mbe e nyina kolo chiriri ŋga na ee tro mbe o tɛɛ mbe eyɛ kpɔɔ, imi kie pe mbe e ja mbe mblɛ pe lewo nyaa to, pia u kepele ka nya, mbe u tɛɛ mbra peyɛ kpɔɔri kre, mbe e jaa pe nyu wɔ.
13 Na o tɔɔlɔ yɛŋgɛ kre, kena Nyiɛkpɔɔ ndra na yi, a na o n na tɔɔlɔ naa, kena e nyumu na yi.
14 Kristo koroo ŋga u o kori kre ki o le, ŋgi na hin? O chin na ndro nunu wra ku mu o kro ŋga, ki nyina na wre na wre kro o ku.
15 Wra ku mu ndro kro ŋga mbe ki ti mblɛ pee ŋmaa ni kre, mbe pia tni mbe peyɛ ŋga, la, mbe pe tni mbe ŋmba u yila pe ndra na mu ku mu nyi wre ŋga.
16 Kena waa ndro le yiɛ na mbe u kpra kun. Hali na jle kre o na Kristo le yiɛ na mna u kpra kun kuraa kre, waa pe ma na.
17 Na lewo na Kristo pe nunu kre, u pe lewo fɔŋgɔ, u kelɛɛ yire wa mu kefɔnyi wru.
18 Yire kee nyjɛ krɛrɛ Nyiɛkpɔɔ u yi pini, wre u yire Kristo na mu o wru nɔɔlɔ, ki tia o loŋgo ma na, wre u o ŋga tnumu o na plɛ pini u nɔɔlɔ na.
19 O kee ŋga o yuu kre yi na, Nyiɛkpɔɔ lewo kro chaa nunu, mbe yire Kristo na. Na ki pan ma, u n na lewo sisam sɔɔnri na. A u o ŋga kre kee ŋga na o leele nyina imi Kristo wre na Nyiɛkpɔɔ lalaa gbeele.
20 Kena Kristo jeelee na o yire na paara, na Nyiɛkpɔɔ wre titi u yire o na, na paara na e nyina, na e tali. Kristo jeelee na o yire na e tali, e ti mbe Nyiɛkpɔɔ e wru nɔɔlɔ.
21 Kristo nsra sisaa ka pe, la, Nyiɛkpɔɔ u yila o ndra na mu tia pe u le sisaa pefun, mbe ki yire u na mbe o fraka Nyiɛkpɔɔ yiɛ.