6
Kena ŋga wre na Nyiɛkpɔɔ pe nunu, na tnumu nunu tuni ŋga, u e dumi, kena o e tali, yaa ti mbe u dumiɛ kre pe waara.
2 E loo kee ŋga Nyiɛkpɔɔ yo mbo,
“Nyjila ŋga kra fna nu ndaa loo e pan,
mna ya e na,
a ŋga ŋmaa shɔ ble kre na da,
a ndaa ya e na.”a
E loo, nyjila ŋga nu Nyiɛkpɔɔ ya e na yi kre, a aŋga yi e ŋmaa shɔ ble.
Bitumblɔ Pre Tnumu
3 O n na chaa mbe ndro o tnumu kre kefɔɔn ka ta mbe yo, ki tia o n kee ka sembremu pe, ŋga kie jaa wa tɔ kolo.
4 La, kee kro nu kre, o nyina na Nyiɛkpɔɔ sumifɛɛnlɛ lɛ wre, o frɔ kanyana na nyjila shelee, na kefuɛn kro nu.
5 Pe o frɔ, mu o yii mu le nyuŋgo, mu krɔ wru na o ni. Pe tia o tnumu tun imi na ki n fna, mu tia o tni mu nyiŋge se, o n sni, mu tia o tni klo.
6 A mu yire ŋga nɛɛrɛ ka n wa o na, a oo jawala ni, na frɔ, mu leele fooro chin kre ndra na, o oyɛ nyina na Nyiɛkpɔɔ sumifɛɛnlɛ lɛ wre, mu yire Kpra Ŋumu wre, na o kpra koroo na,
7 na kpra kee ŋga o yuu kre na, na Nyiɛkpɔɔ jaŋga kre, yi tia o kpra ta na ŋunɔ wiyirɛ yi kamɛŋɛ na kalie.
8 Plɛ o kaan yɛnyiŋge, plɛ na cheu woni o na, plɛ na o tɛɛlɛ, a plɛ na o kaan mɛɛ. Pe o pini na kala o fnɛ, nde kpra o yuu.
9 Pe o pini na o n mɛɛ ni, nde oo mɛɛ ni. Pe o pini na o ku, nde o le. Pe o ndie tiniɛ titi, nde o n ku.
10 Pe o pini mbe ti o yiɛ je, nde o yiɛshio nyjila kro nu. O pe na shianfɛɛnlɛ lɛ, nde o tia tataara ta. O pe na yaka n wa o pan, nde o Ŋumu wre krɔ yirɛ ta.
11 O wolo mblɛ ee wa Corinth na, o lɛɛ wɔ mu paara e pan chasi.
12 Wre ma o n e kori, la, yire e n wre kori.
13 Fuŋga rɛ, ni paara e pan na ni biile lɛ yire. E lɛɛ wɔ e o kori, imi na o lɛɛ wɔ mu e kori kre.
Kristo Leele Na Sɛɛn Sumifɛɛnlɛ Chaara N Nyu
14 Ki n fna mbe yire na mblɛ pe n Kristo shɔnli pre na chaa mbra kee nunu pini. Mni kpra na sisaa we pe mbe jaa chaa hin? Ndee mni kania na wɔmu nɔɔlɔ yiri hin?
15 Nyu nunu ŋgi kii wa Kristo na Sutna lalaa hin? Ndee mni shɔnlifun na ŋmba u n shɔ mu li nɔɔlɔ yiri hin?
16 Nyu nunu ŋgi kii wa Nyiɛkpɔɔ suminyuŋgo na sɛɛn lalaa hin? Ŋgi na hin? Nyiɛkpɔɔ ŋmba u le wre, u Suminyuŋgo lɛ wre. Imi na Nyiɛkpɔɔ wre titi yo kre mbo,
“Mbe tni ni leele nu,
mbra nyaari pe lalaa,
a mbe pe pe Nyiɛkpɔɔ,
mbe pre pe ni leele.”b
17 Kre ki tia o Tafun wre yo mbo,
“E eyɛ wɔ e yili pe nu,
a yaa shia kɛ taa yira ŋga ki n pe cheche na, kre mbe e shɔ.”c
18 “A mbe pe e Lɛ,
mbe yire pe ni bibilɛ,
na ni bichiɛlɛ, pan o Tafun Jaŋgafun wre yo.”d