7
Ni wolo, ŋga pe yire kee nyjɛ yo mu tɛɛ o pan mbe o yi ta ŋga, e ti mbe o oyɛ wɔ mbe yili kee nyjɛ yi lewo toni nɛɛrɛ ni nu, mbe pe cheche, mbe tni Nyiɛkpɔɔ fiɛrɛ nu.
Paul Yɛshɔɔrɔ
2 E lɛɛ wɔ e o kee kre loo. O n da mu e wa pe sisaa tun, a o n e wa wa mu fun, a o n e wa dnumu.
3 Ni n na kre kee ŋga yuu mbe e gbun na pimi ni. Ŋgi na hin? Ni klu mu yo e pan na o e kori, na o ku o, na o le o, wre na yire lɛ.
4 Ni dankna e na mu tro, ni e teeri na niyɛ kpɔɔri, a kanyana nyjɛ nu kuraa kre, ni kaan e na, a ni yiɛshɔ mu tro.
Titus Paan
5 Hali ŋga o na le Macedonia na kre, o n sra wuu. Mna oo tro kpan kanyana, na kakrɔ ni o fni, kra tia fiɛrɛ na o yii.
6 La, Nyiɛkpɔɔ ŋmba u foorofun lɛɛ nyiŋgei wre na tia Titus na pan, a o gbun na nyjii o na.
7 U paan kre chiin ma, la, mandiɛ ŋga wra o bɔ, na e na u gbeŋmba kre ya na. Wra yo o pan na e ni chaa mbe nya, a ŋga e na o mandiɛ loo kre, fooro na e yii kpɔɔ, a ni kee na e shian, ki tia ni yiɛshɔ mu tro.
Shɔnlifɛɛnlɛ Foorolie Kaari Ŋmaashɔmu
8 Hali na ni hlɛ jle kre na tia e yiɛ na je kuraa kre, ki n na ni yaa na. Ŋga ndaa nya na hlɛ kre we ti mbe e yiɛ je kre, kra ni yaa chiɛri, la, ni nya na ki nsra tia e yiɛ na je mu sɛ yiɛ.
9 Fuŋgaami ni yiɛshɔ na ndaa kre hlɛ kre nyunɔ, ki n pe ŋga kra tia e yiɛ na je kre na yi, la, ŋga e yɛjeere kre tia e chinɛ kre na yi. Kre yɛjeere kre Nyiɛkpɔɔ chaa. Kena o n e pe sisaa.
10 Yɛjeere ŋga ni Nyiɛkpɔɔ paan kre, jawala chinɛɛ ni ki paan, mbe o yire ki na mbe ŋmaashɔmu ta. Kena na ki pan ma, fooro lie n wa ki nu, la, waŋgra yɛjeere rɛ, kumu ni ki paan.
11 E yira ŋga Nyiɛkpɔɔ yɛjeere kre e ŋga kre le, imi ki tia e na dɔɔtaa, mu tia e jawala saan e na, a ki tia e na eyɛ woni sisam nu, mu tia e na Nyiɛkpɔɔ fiɛ, mu tia ni la e ta, a e na ni chaa mbe nya, na imi na e kpra lii, na sisam pefɛɛnlɛ ndie tiniɛ! Kaalɛɛ yire kro nu, nɛɛrɛ ka n wa e na.
12 La, ndaa e nyunɔ, a ki n pe ŋmba wra sisaa pe, ndee ŋmba na pra sisaa taa na ndaa yila mna e nyunɔ, la, imi kie pe Nyiɛkpɔɔ yiɛ na, mbe yire titi chichie ŋga e o pe nya.
13 Mu yire yire kee nyjɛ krɛrɛ na kre, o gbun nyjii.
A o gbunnyiŋge kre chiin ma, la, ŋga o na Titus nya, a u yiɛ na shɔ e yaa ŋga e na ya u na kre na kre, o yiɛ na shɔ mu tro.
14 Ndaa e tɛɛ mu niyɛ kpɔɔ u pan, a e n tia nyifɛɛrɛ ni gbo. O kpra kre yo e pan nyjila kro nu. Pan chɔɔ kpɔɔmu ŋga o oyɛ kpɔɔ na e ni Titus pan kre, pe ma yɛŋgɛ.
15 Ki tia na u sɔɔnri imi e kro na ndie tɛɛ, mna u yii fiɛrɛ, na seeree ni kre, ki tii mbe imi u e kori kre kpɔɔ mbe ya.
16 Ni yiɛshɔ kpɔɔ, a ndaa kaan e na.