Sumifɛɛnlɛ Yirɛ Ŋgaa
8
O wolo, o chaa mbe e chin dumiɛ ŋga Nyiɛkpɔɔ Macedonia sumifɛɛnlɛ pre dumi.
2 Kanyana badɛnyi na pe da, la, pe yɛshɔɔrɔ na kpɔɔ, hali pe shian titi nu kuraa kre, pra lɛɛ nunu tɛɛ mna yirɛ kɛ.
3 Ni chaa mbe yo e pan na, pre titi chaara na kre, pra wɔ mu wɛ imi na pie ja na.
4 Pra nyibinyiɛ tɛɛ mu o tali, na pe chaa mbe ya Nyiɛkpɔɔ sumifɛɛnlɛ mblɛ pee wa Judea na kre na.
5 Imi na o naa jawa kuraa kre, pra pe mu wɛ ma na, ŋga ki yiɛ klu, pra klu mu peyɛ wru mu o Tafun wre ŋga, mna ndru mu peyɛ wru mu o ŋga, imi na Nyiɛkpɔɔ chaa.
6 Ki tia o Titus ŋmba wra kre tnumu ŋga nɔɔhle e pan wa kre tali, mbe u paan ya e na, mbe e ja mbe kre koroo tnumu ŋga tun mbe kɔ.
7 Nyjɛ e ta yire kro, e ta mu tro, e shɔ mu li, mu paara mu chin, mu kala chin, mu na gbeŋmba, a e o kori kpɔɔ. Ki tia o chaa mbe e lɛɛ wɔ mbe kɛ imi na ki fna.
8 Mbra ma ni leni e pan jaŋga na. La, ni chaa mbe e nyina imi na plɛ yiɛ nyina na chaa mbe ya plɛ na. Kre kie ti mbe ni chin imi na e koroo nyi.
9 E o Tafun Yesu Kristo lɛɛtnam kre chin, imi na wra yirɛ kro ta mu da, a wra yila e na mna uyɛ pe shianfun, mbe yire ki na mbe ti e yirɛ ta.
10 Ni jawala ŋga ni ta mbe e ŋga kre kee ŋga ni yuu ŋga haa yi na, ki nyu mu e ŋga na ee tnumu ŋga nɔɔ e na hle ale kre tun mbe sɛ kɔ. Yire e na yiɛklu mna pan na ki jawala ni, hali mna kɛ imi na ki fna.
11 Kena e taa e ki tnumu kre tun, e ti mbe e yiɛ nyina mbe e ki tun imi na e na ki jawa kre, e yirɛ nyjɛ yii wa e pan kɛ.
12 Na mu chaa mbe yirɛ kɛ kre, ŋga kii wa mu pan mbe mu kɛ kre, kre Nyiɛkpɔɔ chaa. La, ŋga ki n wa mu pan ma u chaa mu kɛ.
13 O n na chaa mbe plɛ wuu, mbe yire na kala nyaa,
14 la, ŋga yire ta nɛɛrɛ fuŋgaami ŋga, ki nyu na ki fna e ya mblɛ pe shian kre na. Kena na yire waa shian, a pre waa ta kre, mbe pre kna mbe ya yire na. Na ki pan ma, kena e kro yila.
15 Imi na pe ki nyunɔ Nyiɛkpɔɔ hlɛ kre nu mu tɛɛ kre mbo,
“Ŋmba wra koli nɛɛrɛ kre,
u nsra ta nɛɛrɛ mu tro,
a ŋmba wra koli fiɛn kre,
yi nsra u klo.”a
Titus Na U Wolo
16 Ni Nyiɛkpɔɔ kaan mboo na e kee Titus shian, imi na e kee ni shian kre.
17 Ki n pe na ŋga o u tali kre chiin yi, la, u yiɛshɔ na u paan mbe ya e na, ni shɔnli na wre titi chaa mbra pan wa fa.
18 O wre Titus, na o ŋmbrɔ ŋmba sumifɛɛnlɛ pre kro yila u ketaan kpalaa na, na u kaan mɛɛ kre tuni e pan.
19 A u kee ŋga ki ya yi na, sumifɛɛnlɛ pre pra u wɔ mu ya o na, mbe wre na wre sɛ na yirɛ nyjɛ pra wɔ yire ni Jerusalem na, kre tnumu ŋga kie o Tafun wre ŋga yɛnyiŋge, mbe nyina imi o chaa mbe ya oyɛ na.
20 O chaa mbe ndro kro jawala saan u na yire yirɛ yire sɛɛ na.
21 O tnumu yi na oo kee ŋga ki fraka pe, ki n pe o Tafun wre yiɛ na chiin ki fna o pe ma, la, ki fna o pe ma leele yiɛ na na.
22 Ki tia o pre na o ŋmbrɔ wa tuni e pan, o u le, mu nya na nyjila kro nu, u chaa mbe ya leele na, kre kolo ŋga tia u yiɛshɔ, ŋgi na hin? U dankna e na kpɔɔ, na chaa mbe ya e na.
23 Titus rɛ, mi na wre o tnumu tuni na yaa e na, la, o wolo hamblɛ pre rɛ, sumifɛɛnlɛ pre pe pe wɔ, mbe pe yire pe jeelee na mbe Kristo wre ŋga yɛnyiŋge.
24 Kena e pe kori, mbe ki ti sumifɛɛnlɛ pre e koroo kre nya, mbe chin na, na o e teeri na oyɛ kpɔɔri rɛ, ki kolo yi.