Imi Kristo Sumifɛɛnlɛ Yaa Peyɛ Na
9
Fuŋgaami ŋga ki n shian na mbe e nyunɔ yirɛ nyjɛ leele Nyiɛkpɔɔ leele pre kaan yire kee na.
2 Ni chin na yire titi chaa mbe kɛ fa, a ki tia ni e tɛɛ mu niyɛ kpɔɔ Macedonia leele pan, ndaa yo pe pan na yire Achaia leele na eyɛ kna ale, na chaa mbe Nyiɛkpɔɔ leele kɛ. Ŋga e chaa mbe pe kre tia pe nɛɛrɛ yiɛnyina.
3 Ni o wolo mblɛ tuni e pan, imi kie pe mbe pe chin na, ŋga o e teeri na oyɛ kpɔɔri kre, na nyu kee ma o yuu. La, imi na ndaa yo pe pan kre, ni shɔnli na e eyɛ kna na chaa mbe kɛ.
4 Na ki n pe ma, na mi na Macedonia leele pre plɛ waa pan, mu nya na e n eyɛ kna kre, nyifɛɛrɛ we mi na yire kro gbo, na o kaan e na.
5 Ki tia ni ki pe keshian, mu o wolo mblɛ tali, mbe pe yiɛklu mbe pan mbe yirɛ nyjɛ e chaa mbe kɛ yire nyu ble. Kena mi naa paan wa kre, na kee kro pe nunu, kie nyina na yire titi e chaa mu yirɛ yire ŋga, ki n pe na fna ki fna mbe e yi ŋga.
Nyjɛ O Luu Yire Oo Kun
6 E kee ŋga mbe yo ŋga le chichie, ndro ŋmba u yirɛ ndru nɛɛrɛ kre kuun nɛɛrɛ, a ŋmba u ndru fiɛn kre na kuun fiɛn.
7 Ndro kro u kɛ imi na u jawa u loloŋgo nu, wa waa shia yirɛ kɛ yɛjeere ni, ndee jaŋga na, ŋgi na hin? Ndro ŋmba u yirɛ kee yɛshɔɔrɔ ni kre, Nyiɛkpɔɔ u kori.
8 A Nyiɛkpɔɔ we jaa mu ŋga mbe yi nɛɛ mbe wɛ imi mu chaa na, imi kie pe mbe mu nyjɛ mu chaa ta mbe yɛ kro. Mbe mu plɛ ŋga na yɛshɔɔrɔ ni.
9 Imi na pe ki nyunɔ Nyiɛkpɔɔ hlɛ kre nu kre mbo,
“U lɛɛ woni na shianfɛɛnlɛ kee,
u chichie pee wa nyjila kro nu.”a
10 A Nyiɛkpɔɔ ŋmba u falifun kaan yirɛ bie mbe u luu, mbe u ŋga sro mbe u li kre wre we e ŋga yirɛ bie nyjɛ yi e shian, mbe ti yi lɛ, mbe jaa sɛ nɛɛrɛ, ŋga e kee lɛɛ nunu ni kre na.
11 Wre we ti e ta nɛɛrɛ, mbe jaa lɛɛ wɔ mbe kɛ nyjila kro nu, mbe ki ti lenɛɛrɛ yire yirɛ nyjɛ ee yire o na, mbe pe kɛ yire na, mbe Nyiɛkpɔɔ ŋga mboo.
12 Na e kre tnumu ŋga tuni kre, ki n pe nyjɛ yi Nyiɛkpɔɔ leele shian chiin e pe kaan, la, e tia lenɛɛrɛ na Nyiɛkpɔɔ kaan mboo badaaŋga.
13 A leele we yire nyjɛ e pini yire na, mbe Nyiɛkpɔɔ ŋga yɛnyiŋge, ŋga e lii Kristo ketaan ŋga kro e yo e taa kre na, na imi e lɛɛ woni na pre na lenɛɛrɛ kaan yirɛ kre.
14 A e la we pe ta, a ŋga Nyiɛkpɔɔ e dumi kpɔɔ kre na, pie nyiɛtali mbe e ŋga.
15 E ti mbe o Nyiɛkpɔɔ ŋga mboo kpɔɔ, na u o ŋga u Biblɔ wre.