Ŋumu Ŋunɔ Wiire
10
Mi Paul ni yire Kristo nyjiimu, na u latam kre na, na paara na e nyina. E yuu na, na nii wa e nu ni fiɛ, la, na nii wa lee, mbe ndaa gbuntitirem kee pini.
2 Ni e tali, na ni pan e nu, yaa shia ni pe mbe ti ni gbuntitirem kee ka pe. Mblɛ pe yuu na nyu o yuu kre, pre na ki fna mbe ni gbuntitirem kee pe.
3 Ki pe kpra na oo wa waŋgra ŋga nu, la, kolo ŋga na waŋgrafɛɛnlɛ tro na ŋunɔ wii kre na ma wre tro na wii.
4 Ŋunɔ wiyirɛ nyjɛ ni o wii yire n pe waŋgra ŋga ŋunɔ wiyirɛ, la, yi pe Nyiɛkpɔɔ jaŋga wiyirɛ nyjɛ ni o Sutna jaŋga klai.
5 O kakra kee, na kee ŋga ki kiyɛ kpɔɔri na Nyiɛkpɔɔ kee kre toni, mbe pia u nya kre klai, na jawala kro yiri, mbe ki ndie tɛɛ Kristo pan.
6 O oyɛ kna, na e waa ndie tɛɛ mu kɔ kre, mbe o pan mbe mblɛ ndie ki kan pre ndie tini.
7 Imi na e yira nyaa to, pan e ki le fimi na. E eyɛ le, waa wa e nu mu chin na Kristo wo wi ra? Ufun u uyɛ jawa chichie, ŋgi na, Kristo wolo lɛ wre na, imi na ufun nyi kre chɔɔ.
8 Na ni o Tafun jaŋga ŋga u o ŋga kre teeri na niyɛ kpɔɔri mu tro kuraa kre, ni n na nyifɛɛrɛ pini, ŋgi na hin? Kre jaŋga kre ki faŋga leni e nu, ki n na e klai.
9 Ni n na chaa mbe ki sɛ pe na piɛri ni e piɛri na ni hlɛ yire ni.
10 Wa we yo na, “Na Paul hlɛ nyunɔ, kekpɔɛ pini ki nu titi, a na wre titii wa e jaara mbe wra fiɛ, wa jaa paara chiriri.”
11 Ŋmba u yuu ma kre u jawa u chin na, na oo wa lee, hlɛ nyjɛ o nyunɔi yire, na kee nyjɛ oo pe e jaara yiree nunu.
Tnumu Ŋga Paul Tun Corinth Na
12 O n oyɛ wru na gbuun na mblɛ pe peyɛ kaan mɛɛ kre ni. Pre leele pre jijiele lɛ, peyɛ ni pe kaan, na peyɛ wru na gbuun peyɛ ni.
13 A wre rɛ, waa oyɛ kpɔɔ mbe wɛ imi ki fna na. Tnumu ŋga Nyiɛkpɔɔ le o kɛɛ, a o ki tun e nu na kre, kre nu oo oyɛ kpɔɔ.
14 Ŋga wre o na klu mu da na Kristo ketaan kre ni e na, a ki pe tnumu ŋga Nyiɛkpɔɔ na o ŋga na o pe kre, kre na o oyɛ kpɔɔri.
15 Kena tnumu nyjɛ plɛ pan mu tun e nu kre, o n na oyɛ kpɔɔri na yi ni. La, o kaan na e shɔnlie we na kpɔɔri, mbe ki ti o jaa tnumu kpɔɔ tun e nu mbe sɛ su mna Nyiɛkpɔɔ o ŋga na o sɛ su.
16 Kena na ki pan ma, oo jaa ketaan kre kpali lawee fɔnyi nu na, mbe waa sɛ wa tnumu ŋga u tun tra ka nu tɛɛ mbe oyɛ kpɔɔ.
17 La, imi na pe ki nyunɔ mu tɛɛ Nyiɛkpɔɔ hlɛ kre nu kre mbo, “Ŋmba u chaa mbe uyɛ kpɔɔ kre, u uyɛ kpɔɔ kee ŋga o Tafun pe nu.”
18 Ŋgi na hin? Lewo ŋmba u uyɛ kaan mɛɛ kre ma Nyiɛkpɔɔ pni, la, ŋmba o Tafun wre kaan mɛɛ wre Nyiɛkpɔɔ pni.