Paul Na Kafinɛ Bitumblɔ
11
Ni jawa na, na ni jijiere kee yo kuraa kre, ee eyɛ yii, imi na e eyɛ yiri kre.
2 Ni yenyjam wii e na, imi na Nyiɛkpɔɔ yenyjam wii e na kre. Pan e nyi na bichable ŋmba u n blɔ chin wi, a ndaa u chaa mbe Kristo ŋga mbe u leŋge.
3 La, ni fiɛ na imi na wɔɔ wre na u kachindɛ tɛɛ mu Eve jawala kna kre, na aada plɛ we e jawala kna mbe laa Kristo sumiɛ cheche kre na.
4 Na wa pan mu Yesu fɔŋgɔ wa kee yo e pan, a ki n pe ŋmba kee o yo e pan ŋga kre, ndee na e ŋumu wa sembremu ta, a u n pe ŋmba e na klu mu ta wre, ndee na e ketaan ka nyini loo, na ki n pe ketaan ŋga e na loo o pan kre, e yire shio na lii.
5 Ni shɔnli na mblɛ pe peyɛ yeeri Nyiɛkpɔɔ bitumblɔ e pan pre n wɛ ni na kee ka na.
6 Hali na ni n paara mu chin kuraa kre, ni chin yira ŋga kee ni yuu. O yire kolo kro na mu e nyina yira kro chasi leele yiɛ na.
7 Ŋga ndaa Nyiɛkpɔɔ ketaan kre kpali e pan kre, ni nsra kɔbɔ yira shɔ e pan. Ndaa niyɛ nyjii imi kie pe mbe yire kpɔɔ, kena sisaa ndaa pe ree?
8 Nyjila ŋga ni ndaa tnumu tuni e nu kre, na sumifɛɛnlɛ plɛ pe ni le. Pre pan ndaa shio na yaa e na.
9 A nyjila ŋga ni ndaa wa e jaara kre, na shian ni yii kuraa, ni nsraa e wie swa. O wolo sumifɛɛnlɛ mblɛ pee wa Macedonia na kre naa paan na ni kaan yirɛ nyjɛ yi ni shian kro. Ni n yaka shɔ e pan tun, a mbaa yaka shɔ e pan na.
10 Ŋga Kristo kpra kree wa ni nu ŋga, ndro n wa Achaia tra nu, mbe yo ni pan na mbaa niyɛ kpɔɔ.
11 Ŋgi ki tia ndaa yuu ma hin? Ni n e kori ree? Nyiɛkpɔɔ chin na ni e kori.
12 Kepele ŋga ni pini kre, pan mbe na pini suwi, mbe ki ti ni jaa mblɛ pe kaan na o ni, na peyɛ kpɔɔri kre nyu gbo.
13 Pre leele pre, kpra bitumblɔ ma, kafinɛ bitumblɔ lɛ, pra kpra yo, pe peyɛ pe na Kristo bitumblɔ lɛ.
14 Ki n ni pe kawako, ŋgi na hin? Sutna kuraa ja na uyɛ kna na nyjeeri bituŋu wi.
15 Kena ki n pe kekpɔɔ u sumifɛɛnlɛ pan na pie peyɛ kna na kpra sumifɛɛnlɛ pre lɛ, imi na pe kepele nyi, pan pe kɔlɔ we pe.
Paul Kanyana
16 Ni ki yuu e pan shiin wo na, wa waa shia jawa na jijuo wi mi, hali na e ni jawa ma, e ni yii na jijuo wi, mbe ni ja mbe niyɛ kpɔɔ fiɛn na.
17 Kpɔɔmu kee ŋga ni yuu fuŋgaami ŋga, ni n na paara na o Tafun wre wi, ni paara na jijuo wi.
18 La, ŋga plɛ waŋgra yirɛ teeri na peyɛ kpɔɔri ŋga, mbe jaa niyɛ kpɔɔ na.
19 E jawa na e kala chin, nde e jijiele pre kee ndru mbe e yiɛshɔ.
20 Mblɛ pe e pini tinlɛ, na lii e ndra na, na e frɛ na e yirɛ shio, na peyɛ kpɔɔri e na, na e yiɛ juari kre, pre kee e chaa.
21 Nyifɛɛrɛ mi kuu na wre pɔlɛfɛɛnlɛ mblɛ we e pe yire kee nyjɛ.
La, kee ŋga ni lewo we jaa uyɛ kpɔɔ kpan, ni paara na jijuo wi na, ni yuu e pan na mbe jaa ki tɛɛ mbe niyɛ kpɔɔ na.
22 Hebrew leele lɛ ree? Pan ni pe Hebrew ndro. Israel leele lɛ ree? Pan ni pe Israel ndro na. Abraham nanae lɛ ra? Pan ni pe Abraham nana na.
23 Kristo sumifɛɛnlɛ lɛ ree? La, mi Kristo sumi mu wɛ pe na, na ni yo ma, ni paara na tɔɔlɔfun wi ra? Ni tnumu tun kpɔɔ mu wɛ pe na, a pe ni yii mu le nyuŋgo gbee tataara, mu ni frɔ gbee tataara, a yi n nyu ni, a nyjila kro nu ni kumu nyaa.
24 Judae ni yii mu ni gbun fotro ni gbee nununu fulo na kɛmbɔkɔɔnanyjirɛ ma gbee kunɔ.
25 Roman ni yii mu ni gbun gbee kunɔ, a pe ni waari na dnɛ ni gbee nunu. Epo krɔ badɛnyi yire yɛ juari na ni ni lɔɔ gbee taarɛ. Ni kro lɔɔ yiɛ na gbee nunu, lafo na ble.
26 Ni kolo kuun tataara nu, lɔɔ na chaa ni li yɛ nu, kokɔɔnlɔ na chaa ni gbo yɛ nu, ndaa kumu nya mi titi leele Judae na leele mblɛ pe n pe Judae kɛɛ, ni kumu nya kakpɔɛ na, mu kumu nya tablɔ lawee yire nu, epo kan na ni ni, a ni kumu nya kafinɛ Kristo sumifɛɛnlɛ kɛɛ.
27 Ni tnumu tun a fnaa ni da, mu tni ma a nyiŋge ni se, klo ni gbo, a gbɔɔ ni gbo, a ni blefun nyjila tataara nu. Ni da mu tni waara a weere ni gbo.
28 Nyjɛ yi ya yire kro yi tni mbɛɛ na, blenyini ŋga, sumifɛɛnlɛ pre kee ni shian.
29 Na wa punu, mbe ki ti ni yiɛ je, na wa tia u ŋmbrɔ to sisam ka nu kre, mbe ni gbun na ni fiiri.
30 Na mbe niyɛ kpɔɔ kre, kee nyjɛ yi tia leele na ni le fiɛn yire ni mbe niyɛ kpɔɔ.
31 Nyiɛkpɔɔ na o Tafun Yesu Lɛ ŋmba u fna o na kaan mboo nyjila kro nu kre, u chin na kala ma ni fnɛ.
32 Ŋga ndaa wa Damascus na kre, abani lopom ŋmba wraa wa ŋunu Aretas jaara kre na tia pra sojae tɛɛ chia kre jlonwee na, mbe ni yii.
33 La, Pra ni le kakɛɛ nu, mna ni wɔ vromboo nu, a ndaa fɛ mu shɔ.