Kee Nyjɛ Paul Na Nya Nyiɛlɛ Na
12
Ki fna mbe ni niyɛ kpɔɔ, nde ni chin na mba tnu ka ta ki nu. La, fuŋga mbe yirɛ nyjɛ o Tafun wre tia ni nya nyiɛlɛ na, na nyjɛ u wɔ mu ni nyina chasi yire kee yo.
2 Ni blɔ wa chin, a u pe Kristo ndro, kie pe yɛlɛ kɛmbɔjijirɛ yi ŋga, pra u tio mu sɛ nyjeeri, ni n chin ya, na yɛŋgɛ kra pe o, na yirɛ wra nya nyiɛlɛ na o, Nyiɛkpɔɔ chiin u ki chin.
3 A ni chin na Paradise pra sɛ na u ni, la, na yɛŋgɛ kra pe o, na yirɛ wra nya nyiɛlɛ na o, ni n chin ya, Nyiɛkpɔɔ chiin u ki chin.
4 Bawa blɔ wre na loo na yirɛ tini, lewo wa jaa yi kee paara, ndee mbe yi nyini nyina.
5 Kena mbe wre blɔ wre tɛɛ mbe niyɛ kpɔɔ, la, ŋga mi titi pe ni ma mbe niyɛ kpɔɔ. La, yirɛ nyjɛ yi nyina na ni pɔlɛ kre, yire ni mbe niyɛ kpɔɔ.
6 Na ni yo mbe niyɛ kpɔɔ kre, leele chin na jijuo ma mi, ŋgi na hin? Kpra kee mbe yo, a mba niyɛ kpɔɔ, ŋgi na hin? Ni n na chaa mbe wa ni jawa lewo kpɔɔ mbe wɛ imi nyini u ni nya a ni pe mu da, na imi na u loo na ni yo mu da.
7 La, imi kie pe mbe mba kekpɔɛ nyjɛ ni nya yire tɛɛ mbe niyɛ kpɔɔ mbe tro kre na, Nyiɛkpɔɔ na yira ka le ni wejikaara nu na wuuro yi, Sutna wre bituŋu, na ki pe mbe ki ni su, mbe ki ti mbe mba jaa niyɛ kpɔɔ mbe tro.
8 Ndaa o Tafun wre tali gbee taarɛ na u kre yira ŋga wɔ ni nu.
9 Kee ŋga wra kna mu yo ni pan yi na, “Ni dumiɛ chiin mu shian, ŋgi na hin? Na mu pɔlɛ kre, kena ni jaŋga ki faŋga nyina.” Kena ni yiɛshɔ na mbe ni pɔlɛm tɛɛ mbe niyɛ kpɔɔ, mbe ki ti Kristo jaŋga paan tni ni nu.
10 Ni yiɛshɔ ni pɔlɛm, na ni tɛɛlɛɛ, na ni fiŋgee, na ni prara, na kanyana nyjɛ ni nyaa Kristo ndra na yire na. Ŋgi na hin? Ni pɔlɛm nyjila Nyiɛkpɔɔ ni kaa faŋga.
Corinth Leele Kee Paul Shian
11 Ni pini na jijuo wi, la, yire e tia ndaa pini ma. Yire e fna mbra ni mɛɛ yile. Ŋgi na hin? hali na ni n da ndro wa kuraa kre, mblɛ pe peyɛ yeeri bitumblɔ e pan kre n wɛ ni na kee ka na.
12 Kee nyjɛ yi nyina na bituŋu wi mi yire krɛrɛ, ni niyɛ yii mu yi pe e nu, ni kawako kee nyjɛ yi Nyiɛkpɔɔ jaŋga nyina pe, a e nya.
13 E ni sisaa ti e ni kɛ na ni nsra tia e na ni le imi na sumifɛɛnlɛ hamblɛ pre na ni le mna dwamu ta kre.
14 Ni gbee taarɛ wo ni niyɛ kna mbe paan e shaari kre, a mba yaka shɔ e pan, yire titi ni chaa, ki n pe e swa. Ŋgi na hin? Biile ma pe fna mbra sefɛɛnlɛ le, la, sefɛɛnlɛ pe fna mbe cha mbe pe biile ŋga.
15 Ni yiɛshɔ na mbe ŋga kii wa ni pan kro tɛɛ mbe e le, mbe niyɛ gbo mbe e ŋga, imi kie pe mbe ni jaa ya e na. Kena na ni e kori kpɔɔ, ee ni kori fiɛn ree?
16 Yire titi we ni dansiɛrɛ li na, ni nsra e gbun fɔlɔ ka ni. La, e yuu na, mi Paul kala chin titi, mu ni kachindɛ tɛɛ mu e fana.
17 Kolo ŋgi na ni e dnumu hin? Ndee ni leele mblɛ ni tun e pan kre wa e dnumu rɔ?
18 Ndaa Titus, na o ŋmbrɔ wa tali mu tun e pan, ŋga pra pan kre, pra e dnumu ree? Kpra Ŋumu nunu wre kolo na ma o kro na tro mna ŋga oo pe pe ra?
19 Aada e jawa na nyjɛ o yuu ŋga, oyɛ o gbeele e pan. Pan ma ki nyi, Nyiɛkpɔɔ yiɛ o yire na paara kre, ŋga wre na Kristo pe nunu ŋga. Ni wolo, kee nyjɛ o pini ŋga krɛrɛ, e nyumu na o yi pini.
20 Ni lɛɛlɛ na aada na ndaa pan, mba pan mbe e da imi na ni chaa, a aada yaa ni nya imi na e chaa. Ni lɛɛlɛ na aada mbe paan kakrɔ, na keyira sisaa, na krɔ sisaa, na jajaara, na kabaara, na kayooro, na kpɔɔmu kee, na kesakraɛ da e nu.
21 Ni shɔ mu li na, na mbaa pan e nu na, Nyiɛkpɔɔ we ni gbun nyiŋge, na kre ma mbe nyɛni mblɛ pe nɛɛrɛ, na tiɛrɛɛ, na niŋge sisaa kee pini, a pe n pe jawala chinɛ pre tlo.