Jaaraa Na Shaaraa
13
Ni gbee taarɛwo ni paan mbe e shaari wa kre. Kee ŋga na dansiɛfɛɛnlɛ shiin, ndee taarɛ nyi kpan we yirehaa ta, imi na pe ki nyunɔ Nyiɛkpɔɔ hlɛ kre nu mu tɛɛ kre.
2 Yire mblɛ e na sisaa pe fa, na e hamblɛ pre kro, ni chaa mbe e jaari, kee ŋga mbe yo ŋga, ndaa ki yo e pan ni paan shiin wo kre nu, a ŋga ni n wa e jaara ŋga, mbe ndruu ki yo na. Na mbaa ndru mu pan na kre, wa n wa mbe shɔ ndie tiniɛ kɛɛ.
3 Yaka e chaa mbe nya, mbe chin na Kristo u yire ni na na paara. Yire titi chin na Kristo n pe pɔlɛfun e nu, u u jaŋga nyina e lalaa.
4 U pɔlɛm nu pra u kan kanyana kumu kaan kre na, a u yire Nyiɛkpɔɔ jaŋga na mu ŋmaa ta. Kena ŋga wre na wre pe nunu ŋga, o pɔlɛ na, nde Nyiɛkpɔɔ saara na, wre na yire we tni mbe o ya e na.
5 E eyɛ le, na ee wa mu taa shɔnlie kre na rɛ. Ni shɔ mu li na e chin na Yesu Kristo wree wa e nu. Fɔna aada e to ya.
6 Ni shɔ mu li na ee chin na o n to.
7 O Nyiɛkpɔɔ tali na e kaan mbe yaa sisaa ka pe. Ki n pe na nyiɛ o tali mbe ki nyina na o nyu leele yiɛ na, la, imi kie pe mbe e na kee ŋga ki fraka pini, hali na leele o le na o n nyu.
8 Ŋgi na hin? Waa jaa kee ka pe mbe kekpra kre taan, la, chichie o pini na ki kaan,
9 a o yiɛshio na o pɔlɛ, a yire na faŋga taa, ŋga o tali Nyiɛkpɔɔ pan yi na, ee sɛ yiɛ.
10 Kre ki tia ŋga ni n wa e jaara kre, a ndaa e nyunɔi hlɛ ŋga. Kena na mbaa pan e nu kre, mbe mba pan na krɔ ni, ŋgi na hin? O Tafun wre jaŋga ŋga u ni ŋga kre ni ni paan mbe e le gbeŋmbaa. E kla haa ma ni paan.
11 Ni wolo, ŋga ki kro tɔ yi na, e ti mbe e yiɛshɔ, e ti mbe e yiɛ nyina kee ŋga ki nyu na. E ndie tɛɛ ni kee yire na, e ti mbe e nyu pe nunu, e tni wejinyiŋge nu. A yire na Nyiɛkpɔɔ koroo, na u wejinyiŋge e tni.
14 Yire na o Tafun Yesu Kristo wre dumiɛ, na Nyiɛkpɔɔ koroo, na Kpra Ŋumu wre e tni.