Galatians Hlɛ
Shaaraa
1
Mi Paul pan hlɛ ŋga yiri. Lewo na nyjuro ma u ni yeeri, ndee mu ni tun na ni paan pe bituŋu, la, ni yeeree kre yiri Yesu Kristo, na o Lɛ Nyiɛkpɔɔ ŋmba wra u nyi mu yili kuulo nu wre pan.
2 Shɔnlifɛɛnlɛ mblɛ mi na pree wa mna kre, o yire mblɛ ee wa Galatia na kre kro shaari.
3 O Lɛ Nyiɛkpɔɔ na o Tafun Yesu Kristo pe e dumi mbe e ŋga wejinyiŋge.
4 Imi kie pe mbe Kristo o shɔ mbe yili waŋgra sisam nu kre ndra na, wra li o Lɛ Nyiɛkpɔɔ wre nyu kee na, mna yila o sisam na mna pan mu ku mu o ŋga.
5 Nyiɛkpɔɔ wo yi yɛnyiŋge nyjila kro nu. Ami.
Ketaan Kree Nunu
6 Ki ni pe kawako na ki n mu kuraa, a e na feni na laari ŋmba u yire Yesu Kristo dumiɛ na mu e yeeri wre kro, mu sɛ na taari kefɔŋgɔ kro.
7 E ti ni yo mbe e loo, ketaan ka n wa haka na, la, leele plɛ pe e jawala klai, na chaa mbe Kristo ketaan kre kna.
8 La, na mi na ni wolo pre, ndee nyjeeri bituŋu wa waa pan mu ketaan ka kpali e pan, a ki yili kiyɛ na ŋga o na klu mu kpali e pan kre ni kre, kena u fun atɛ, Nyiɛkpɔɔ we u ndie tini.
9 O klu mu kre kee ŋga yo e pan, a fuŋgaami ni ndru na ki yuu na. Na ndro waa pan mu ketaan ka kpali e pan, a ki yili ki yɛ na ŋga e na klu mu loo o pan kre ni kre, Nyiɛkpɔɔ we ufun ndie tini.
10 Kena kee nyjɛ ni yuu ŋga, chaa ni chaa mbe leele yiɛshɔ ni na ree? Pan ma ki nyi. La, ni chaa mbe Nyiɛkpɔɔ yiɛshɔ ni na. Na chaa ni chaa mbe leele yiɛshɔ ni na kre, kena Kristo sumifun ma mi.
Paul Yeeree
11 Ni wolo, e ti ni yo e pan mbe loo, ketaan ŋga ni kpali kre, lewo pan ma ki yiri.
12 Ni nsra ki loo mu yiri lewo pan, a lewo ma wra ni nyina ki yi. La, Yesu Kristo wre titi wra ki wɔ mu ni nyina.
13 Yire titi e ni tnimu ŋga nu ndaa nyi fa kre kee loo, imi ndaa Judae sumiɛ kre kolo yii kɛ shiin, mnaa Nyiɛkpɔɔ sumifɛɛnlɛ pre fiŋge imi na kra fna, mna gbeŋmba na mbe pe kla.
14 Ŋga ndaa Judae sumiɛ kolo kre yii kɛ shiin kre na, ndaa yiɛ klu ni ndra ŋmbilɛ Judae pre pan, mna li o tolɛɛlɛ paala yire na imi na ki fna.
15 La, nyjila ŋga pe nsra ta mu ni se kre, na Nyiɛkpɔɔ klu mu yire u dumiɛ na mu ni wɔ na ni paan u sumi. A ŋga Nyiɛkpɔɔ na
16 u Biblɔ wre wɔ mu ni nyina, mbe ni yire u na mbe u ketaan kre kpali mbe mblɛ pe n pe Judae pre nyina kre, ni nsra sɛ ndro wie kee ka,
17 a ni nsra sɛ Jerusalem na mna sɛ bitumblɔ mblɛ pe yiɛ klu kre wa wie yaka. Ndaa yire wa to, mna sɛ Arabia na, mna ndru mu pan Damascus na.
18 Ni yɛlɛ taarɛ, a ndaa chin mu sɛ Jerusalem na, mna sɛ Peter nya, a mi na wre na paara, a ndaa tni u jaara kranu shiin.
19 Ni nsra bitumblɔ pre wa nya na, fɔna James, o Tafun chunu wre bɔkɔ.
20 Kee nyjɛ ni e nyunɔi ŋga pe kpra, Nyiɛkpɔɔ chin na kala ma ni fnɛ.
21 Kre kɔkro ni ndaa sɛ Syria, na Cilicia lawee yɛ nu.
22 Kre nyjila kre na Kristo sumifɛɛnlɛ mblɛ praa wa Judea na kre n ni chin.
23 Ni kee nyjɛ plɛ na yo pe pan yire chiin pra chin na yuu mbo, “Blɔ ŋmba wraa o fiŋge fa kre, fuŋga wre titi kee ŋga shɔnlie na wra yila na leele yiri, na pe klai kre kpali.”
24 Ki tia kee ŋga ndaa pini kre ndra na, praa Nyiɛkpɔɔ kaan mɛɛ.