Paul Na Bitumblɔ Hamblɛ Pre
2
Kie pe yɛlɛ kɛmbɔjijirɛ kɔkro kre, mi na Barnabas na ndru mu sɛ Jerusalem na, ŋga o naa shie, o na sɛ na Titus ni.
2 Nyiɛkpɔɔ wra ki wɔ mu ni nyina na ki fna ni kre kolo kre sɛ. Ŋga o na sɛ le wa kre, wre na sumifɛɛnlɛ pre loplombo pre chiin na fni, a ndaa pe nyina ketaan ŋga kee ni kpali leele mblɛ pe n pe Judae pre pan kre. Ni nsra chaa mbe ni tnumu ŋga ni tun, na ŋga ndaa paan mbe tun kre pe waara.
3 Greek wo na wi ni ŋmbrɔ Titus wre, a nde ni nsra tia wra u fɛŋgɛ kun.
4 La, leele plɛ na ju mu pan mu chaa o nu, mna peyɛ pe na o plɛ lɛ, pre praa chaa mbe Titus u fɛŋgɛ kun. A ki tia praa o prɛri, ŋga wre na Yesu Kristo pe nunu, a o oyɛ ta kre na. Praa chaa mbe o li pre Judae mbra yire na, mbe pe na tinlɛ lɛ.
5 Imi kie pe mbe kpra ŋga kii wa ketaan kre nu kre tni e nu kre ndra na, o nsra pe ŋga kolo fiɛn kuraa.
6 La, mblɛ pra pe na pre lɛ sumifɛɛnlɛ pre loplombo pre nsra kee ka ta mu yo ni pan. Ŋga ki tia ndaa yuu ma yi na, mɛɛ ŋga ni pre loplombo pre na nyi kpan, mi nsra ki wru mu pe yaka, ŋgi na hin? Nyiɛkpɔɔ na lewo le to, mbe u kpra kun, pe kee nyjɛ praa pini kre nsra ka ya ni ketaan ŋga ndaa yuu kre na.
7 La, pre titi na chin na Nyiɛkpɔɔ na ni ŋga tnumu na ni ketaan kre kpali mblɛ pe n pe Judae pre pan, imi na wra Peter ŋga ketaan kre mbe u ki kpali Judae nu kre chɔɔ.
8 Nyiɛkpɔɔ jaŋga saara na, wra ni pe bituŋu leele mblɛ pe n pe Judae pre nu, imi na wra Peter pe bituŋu Judah leele nu kre chɔɔ.
9 James, na Peter, na John, pre pra pe na pre lɛ sumifɛɛnlɛ pre loplombo, pra nya na Nyiɛkpɔɔ wra ni ŋga kre tnumu ŋga, ki tia pra kɛ shɔ mi na Barnabas pan. Ŋga kra pan na o kro pe tnumu nunu tunfɛɛnlɛ kre, o na paara mu fni, a wre na yo na oo na tnumu tuni leele mblɛ pe n pe Judae pre nu, mbe pre na tnumu tuni Judah leele pre nu.
10 Kee ŋga pra ta mu yo o pan yi na, o na shianfɛɛnlɛ mblɛ pee wa sumifɛɛnlɛ pre nu kre sɔɔnri, a na kre kee ŋga na ni yiɛ nyina kpɔɔ.
Paul Peter Yiɛ Kee Yo U Pan
11 Ŋga Peter na pan Antioch na kre, ndaa u yiɛ kee yo u pan leele yiɛ na, ŋgi na hin? Na u punu.
12 James na leele plɛ tun Antioch na wa. Nyjila ŋga ni pre leele mblɛ nsra ta mu pan wa kre, na Peter na shɔnlifɛɛnlɛ mblɛ pe n pe Judae pre chaa na lii. La, ŋga leele pre na le mu kɔ kre, a wra uyɛ kun pe na. Wre na pre nsraa chaa na lii na, ŋgi na hin? Wraa fiɛ Judae mblɛ praa chaa mbe mblɛ pe n pe Judae pre na fɛnyi knumu pre na.
13 Ŋga kra pan ma kre, Judae mblɛ praa wa wa kre naa pini imi Peter na pe kre, hali Barnabas na pe ma na.
14 Ŋga ndaa nya na kolo chiriri na ma pe tro, a kee ŋga praa pini kre nsra kpra kolo ŋga kii wa ketaan kre nu kre wru kre, ndaa paara Peter pan pe kro yiɛ na, na “Ŋu Peter, Judae wo wi ŋu. A ŋu na mblɛ pe n pe Judae pre chaa, mna muyɛ pini na Judae wo ma ŋu. Kena yira ŋgi ki tia mna chaa mbe leele mblɛ pe n pe Judae kre, mbe pe kaari Judae jaŋga na hin?”
Shɔnlie Na Pe Judah, Na Mblɛ Pe N Pe Judah Kro Shɔ
15 “Kpra na, Judae pe o se, ki tia o n pe leele mblɛ pe n pe Judae sisam pefɛɛnlɛ pre plɛ.
16 Nde o chin na Yesu Kristo shɔnlie ki tii mbe lewo fraka Nyiɛkpɔɔ yiɛ, ki n pe ŋga lewo we li nyjɛ Moses mbra yire yo na yi. Wre chɔɔ, o Yesu Kristo shɔ mu li, a ki yire o shɔnlie ŋga o ta u nu kre ndra na, mbe o fraka Nyiɛkpɔɔ yiɛ. Ki n pe ŋga oo li nyjɛ Moses mbra yire yo na yi. Ŋgi na hin? Ndro n wa mbe jaa li nyjɛ mbra yire yo na, mbe fraka Nyiɛkpɔɔ yiɛ.
17 Kena ŋga wre na Kristo pe nunu, mbe ki ti mbe o fraka Nyiɛkpɔɔ yiɛ ŋga, ki nyina na, o pe sisam pefɛɛnlɛ na leele mblɛ pe n Nyiɛkpɔɔ chin lɛ ree? Kena ki nyina na Kristo u o gbeŋmba, a o na sisam pini ree? Pan ma ki nyi.
18 Kena yira ŋga ni yo ki n nyu mu ki kla kre, na ndaa ndru na ki gbeele, kena ki nyina na ni mbra taan.
19 Mi Paul, pan ki nyi na Moses mbra yire ni gbo, a ni ku mu yili yi kɛɛ, imi kie pe mbe ni tni mbe pe Nyiɛkpɔɔ wo. Mi na Yesu ku u kanyana kumu kaan kre na.
20 Kena ki tia mi titi ma nii wa kre tnimu ŋga nu na, la, Kristo uu wa mu tni ni nu. Kre ŋmaa ŋga nu ni nyi fuŋgaami ŋga, Nyiɛkpɔɔ Biblɔ wre shɔnlie ni ni tni ki nu. Wre u ni kori, mu yila ni na mu u ŋmaa wa mu fun.
21 Nyiɛkpɔɔ dumiɛ ŋga u ni ŋga kre, ni n ki je. Kena na kie jaa yire Moses mbra na, mbe lewo jaa fraka Nyiɛkpɔɔ yiɛ na kre, kena Yesu kumu kre pe waara.”