3 E ti mbe o Nyiɛkpɔɔ, o Tafun Yesu Kristo Lɛ wre ŋga mboo, Ŋgi na hin? Ŋga wre na Kristo pe nunu kre na, u o dwan na Kpra Ŋumu wre yirɛ nyjɛ yii wa nyjeeri wa yire kro ni.

4 Nyjila ŋga ni Nyiɛkpɔɔ nsra ta mu waŋgra wa kre, na u o wɔ, mbe o yire Yesu Kristo na mbe pe u wolo, mbe ki ti mbe o pe cheche u yiɛ, mbe nɛɛrɛ ka wa pe o na.

5 Nyiɛkpɔɔ na o kori, ki tia wra klu mu u jawala pe na we yire Yesu Kristo na mbe pan na o ni u jaara, mbe o paan pe u biile. U chaara na u chichie na yi.

6 E ti mbe o Nyiɛkpɔɔ ŋga mɛɛ u yɛnyiŋge dumiɛ ŋga u o ŋga mu yire u koroo Biblɔ wre na kre na.

7 Ŋgi na hin? O yire Yesu Kristo kumu kre na mu oyɛ ta, ki nyina na o sisam tinkɛɛ ta. Nyiɛkpɔɔ dumiɛ kpɔɔ mu tro.

8 U o dumi mu o ŋga kachindɛ, na jawala.

9 Nyiɛkpɔɔ kee ŋga u jawa mu tɛɛ fa, mu ki ndra kre, u yire Yesu Kristo na mu ki wɔ mu o nyina.

10 Nyiɛkpɔɔ jawala ŋga u pe yi na, nyjila ka paan, na kia da kre, yira ŋga wre Nyiɛkpɔɔ gbeele nyjeeri, na tra na kro, we yi le Kristo jaara.

11 Nyiɛkpɔɔ u yirɛ kro gbeele imi na u chaa, mu yire u chaara kre na mu o wɔ, mbe o pe u wolo, mbe wre na Kristo pe nunu, u chaara kre na wra nyjɛ kro jawa mna chin mu yirɛ kro nɔɔhle.

12 E ti mbe wre mblɛ o klu mu Kristo shɔ mu li kre Nyiɛkpɔɔ ŋga mɛɛ, na yɛnyiŋge.

13 Pan yire chɔɔ na pe na, ŋga e na kpra kee kre, ndee ketaan ŋga ki e ŋga ŋmaashɔmu kre loo kre, e na Kristo wre shɔ mu li na. A Nyiɛkpɔɔ e tnɔ na Kpra Ŋumu wre ni imi na wra ki yo mu tɛɛ kre, na u wolo lɛ yire.

14 Kpra Ŋumu wre u tia o chin na, yirɛ nyjɛ Nyiɛkpɔɔ wɔ mu tɛɛ na we u leele ŋga kre, na oo yi ta yɛŋgɛ. Mu tia o chin yɛŋgɛ na we ti mbe u leele peyɛ ta. Kena e ti mbe o u ŋga mɛɛ na yɛnyiŋge.

15 Kre kee ŋga ndra na, mu yire ŋga ble ni e shɔnlie ŋga e ta o Tafun Yesu Kristo wre nu loo, mu imi na e Nyiɛkpɔɔ leele kori mu da kre kee loo na kre,

16 ki tia ndaa Nyiɛkpɔɔ kaan mboo e ndra na. Na ni nyiɛtali kpan, ni e sɔɔnri ni nyiɛtalaa nu.

17 Ni tali na o Tafun Yesu Kristo Nyiɛkpɔɔ wre, o lɛ yɛnyiŋgefun wre u e ŋga Kpra Ŋumu wre. Wre we ti e kala chin, mbe Nyiɛkpɔɔ wre wɔ mbe e nyina, mbe e u chin.

18 Ni tali na Kpra Ŋumu wre u e lolonyi nyaa, mbe e u kania kre nya. Mbe ki ti e yira ŋga na u e yeeri, a e na kaan ki na kre nya. Mbe nya imi na u dwamu ŋga kee u yo mu tɛɛ, na we u leele ŋga kre nya imi na ki kpɔɔ, mu pe kawako ni mu da.

19 Na imi na u jaŋga ŋga ni u tnumu tuni shɔnlifɛɛnlɛ nu kre kpɔɔ mu da. Kre jaŋga kre ki tnumu tuni o nu kre chɔɔ.

20 Kre jaŋga kre ni Nyiɛkpɔɔ na tɛɛ mu Kristo nyi mu yili kuulo nu, a uu wa mu tni nyjeeri Nyiɛkpɔɔ kalie wa.

21 Kristoo wa nyjeeri wa na ŋunumu lii ŋulo, na jaŋgafɛɛnlɛ, na faŋgafɛɛnlɛ, na tafɛɛnlɛ kro na. Mɛɛ ŋga ki kpɔɔ waŋgra ŋga nu, na mbakɔ waŋgra kre nu kro, Yesu mɛɛ kre kpɔɔ mu wɛ yi na kro.

22 Nyiɛkpɔɔ yirɛ kro le Kristo jaŋga jaara, mu u pe sumifɛɛnlɛ pre, na yirɛ kro ndra.

23 Sumifɛɛnlɛ pre, Kristo wejiŋge lɛ, wre uu wa pe nu, a pe pe wejiŋge nunu. Kolo kro na, Kristo u yirɛ kro pe, a yi pe nunu.