E Ti O Na Yaa Oyɛ Na
6
Ni wolo, na e e wa nya, a wra sisaa ka pini kre, yire mblɛ nu Kpra Ŋumu wre nyi kre fna mbe ufun wre fraka. La, ki fna mbe e ki pe na koroo ni. Mbe yire titi na eyɛ dɔɔtaa, mbe wa waa shia sɛ kre penlee kre nu.
2 Kena na kala ka waa e wa da kre, e ya eyɛ na, na e pe ma kre, kena e li Kristo mbra na.
3 Na wa uyɛ le, maa uyɛ jawa ndro wa nyini, a u n da ma kre, mu chin na uyɛ u fana.
4 Ndro kro u le imi na u kepele nyi, u uyɛ kpra kun. Na ŋufun kepele nyu kre, kre mu jaa kee chiriri ŋga mu pe tɛɛ mbe muyɛ kpɔɔ, mbe ma kee ŋga wa piin le, mbe mu wo pe.
5 Ŋgi na hin? Ndro kro we u sisaa ŋga u pe mapini tio.
6 Lewo ŋmba pe nyina Kristo ketaan kre, u ti mbe u nyinafun chin yira ŋga u ta.
7 Yaa ti mbe pe e fana, ndro n wa mbe jaa Nyiɛkpɔɔ pe fana yira, ŋga lewo we luu, kre we kun.
8 Pan ki nyi na falifun yirɛ ndru, na lewo waa tia wejiniŋge yirɛ yiɛklu u pan kre, kena pan ki nyi na yirɛ u luu, na yi kun nyjila waa da, kuu we yi kun. Pan ki nyi chɔɔ, na lewo wa tia Kpra Ŋumu wre yiɛklu u pan u kepele nu kre, pan ki nyi na yirɛ u luu, na waa yo we yi kun, blenyini ŋmaa we kun.
9 Kena yaa ti mbe chichie pee pe o pan fnaa ni. Ŋgi na hin? Na o n pra chichie pee na wala. Nyjila ka we da mbe o ki tnu ta.
10 Kena nyjila ŋga oo ta kpan, ki fna o chichie pe o ŋmbilɛ na, mblɛ na ki fna o chichie pe kpɔɔ lɛ o ŋmbilɛ Kristo shɔnlifɛɛnlɛ.
Jaaraa Haŋa Na Shaaraa
11 E le, mi titi kɛ nyunɔmu yi nyjɛ, e n nya imi na yi kpɔɔ kpɔɔ ra.
12 Leele mblɛ pe chaa mbe peyɛ kpɔɔ na lewo wejiniŋge yirɛ ni kre, pre pe chaa mbe e e fɛnyi knumu jaŋga na. Pe yire kee nyjɛ pini, ŋgi na hin? Pe n na chaa mbe leele yire Kristo kumu kre kee na, mbe pe pra.
13 Pre mblɛ pe tia pe pe fɛnyi knumu pre kuraa, pe n na lii Moses mbra yire na. Chaa pe chaa mbe e e fɛnyi knumu, mbe pe e ta mbra peyɛ kpɔɔri, na pe e ta mu e fɛnyi knumu.
14 La, mi rɛ, mba yaka tɛɛ mbe niyɛ kpɔɔ fio, fɔna o Tafun Yesu Kristo kanyana kumu kaan kre bɔkɔ. Ŋga Kristo na ku kanyana kumu kaan na kre ndra na, na ni yiɛ wa mu waŋgra ŋga le kre, ki pe na waŋgra pe kan kanyana kumu kaan na, a ki pe na pe mi titi kan kanyana kumu kaan na na.
15 Na pe mu fɛŋgɛ kun o, na pe n ki kun o, ki n shian. Ŋga ki shian yi na, Nyiɛkpɔɔ we mu chinɛ, mbe mu pe lewo fɔŋgɔ.
16 Leele mblɛ pie taa kre kolo ŋga ni nyina ŋga na kre, Nyiɛkpɔɔ we pre na u leele kro ŋga wejinyiŋge, a we pe fooro chin.
17 Ni kee haŋa yi kre, wa waa shia ni le kanyana kee ka nu na, ŋgi na hin? Klɛ tloe nyjɛ yii wa ni na kre nyina na Kristo tnu wi mi.
18 Ni wolo, yire na o Tafun Yesu Kristo wre dumiɛ e tni. Ami.