2 E loo, mi Paul ni paara e pan kre. Na e waa tia pe e fɛnyi knumu, na jawa na kre na ee yire mbe ŋmaashɔmu ta kre, kena ki nyina na Kristo kee n tnu ni e pan.

3 Ni e jaari shiin wo na, ndro ŋmba we ti mbe pe u fɛŋgɛ kun kpan, kena ki fna u li Moses mbra yire kro na.

4 Yire mblɛ e chaa mbe li Moses mbra yire na, mbe yire yi na mbe fraka Nyiɛkpɔɔ yiɛ kre, e eyɛ kun Kristo wre na, mu fɛ mu yili Nyiɛkpɔɔ wre dumiɛn nu.

5 Wre rɛ, o dankna na Nyiɛkpɔɔ we o fraka u yiɛ, ŋgi na hin? Kpra Ŋumu saara na, o shɔnlie tɛɛ na sri.

6 Na wre na Kristo ta mu pe nunu mu kɔ, na o fɛnyi knumu o, na o n fɛnyi knumu o, ka n pe keshian yira. Ŋga ki shian yi na, oo Kristo shɔ mbe li, mbe leele kori.

7 E naa gbeŋmba, kena ŋmbi wra tia e na laa kpra kre kro hin? A kolo ŋgi na wra tro mu e laa hin?

8 Nyiɛkpɔɔ ŋmba wra e yeeri wre ma wra ki pe.

9 Pe yuu na, “Yiisi fiɛn ja mbe mimi bɔtɔ poŋgo tin.”

10 La, nii wa na kaan e na. Ŋga wre na o Tafun wre pe nunu ŋga, ni dankna na yaa kee fɔŋgɔ ka yii. A ŋmba u e jawala klai kre, ndro ŋmba nyini wi kpan, Nyiɛkpɔɔ we u ndie tini.

11 Ni wolo, kena na nii wa na kpali na fɛkɔɔnrɔ nyu, kena kaa yira ŋgi ki tia a pe ni pra ŋga hin? Na kra pe na yɛŋgɛ yi na pan ni yuu kre, kaa Kristo kanyana kumu kaan kre kee ni kpali kre, kia na pe kee ka Judae pan.

12 Na ki kro mi na, e ti mbe mblɛ pe e jawala klai kre na peyɛ sani.

13 Ni wolo, yire rɛ, Nyiɛkpɔɔ e yeeri mu tia a e eyɛ ta, la, yaa eyɛ taara kre wru, mbe taa wejiniŋge yirɛ kro. La, e ti mbe e koroo ti mbe e na yaa e yɛ na.

14 Ŋgi na hin? Moses mbra yire kro, yii wa mbra nunu nu mbo, “Mu Ŋmbrɔ kori, na mu wejikaara yi.”^a

15 La, na e pini na yurɛ mblɛ pe nyaai lɛ yire, na eyɛ niɔ na knumu kre, e dɔɔta, na kre ma, ee eyɛ kla peii.

16 Kee ŋga ni yuu yi na, e ti mbe Kpra Ŋumu wre yiɛ klu e pan. Mbe yaa taa lewo niŋge yirɛ na.

17 Ŋgi na hin? Yira ŋga niŋge kii wa lewo na kre, Nyiɛkpɔɔ Ŋumu n na ki chaa, a yira ŋga Nyiɛkpɔɔ Ŋumu chaa kre niŋge ma kii wa lewo na. Yi kro shiin yire na fni, ki tia chichie ŋga mu na chaa mbe pe kre, ma jaa ki pe.

18 Na Kpra Ŋumu wre yiɛ klu mu pan kre, kena mu n wa Moses mbra jaara.

19 Kee nyjɛ lewo niŋge pini yire pe kee nyjɛ yi nyaa chasi. Yire yi, tiɛrɛɛ, na nɛɛrɛ kee, na kepele fuɛn,

20 na sɛɛn sumiɛ, na tuwe waa, na prara, na loŋgooro, na keyira, na krɔ sisaa, na yirɛ chaara, na yɔɔlɛɛ.

21 Yɛnyiɛ sisaa, simi gbɔntoo, na pnaa fuɛn, na nyjɛ yi ya na kre. Ki tia ni e jaari na jle kre yi, mblɛ pe nyjɛ pini kre wa Nyiɛkpɔɔ ŋunumu kre ta mbe li.

22 La, Kpra Ŋumu wre yirɛ nyjɛ wre kaan yi, koroo, yɛshɔɔrɔ, wejinyiŋge, frɔ, latam pee, chichie pee, shɔnlie,

23 nyjiimu, na imi lewo u yɛ yire kee na. Mbra ka n wa, mbe jaa yire kee nyjɛ tɔ kolo.

24 Leele mblɛ pe pe Yesu Kristo wolo pre, pe wejiniŋge yirɛ, na yi kepele kro gbo.

25 Kpra Ŋumu wre o ŋga ŋmaa, kena Kpra Ŋumu wre ki fna u yiɛ klu o pan.

26 O n fna mbe oyɛ kpɔɔ, ndee mbra oyɛ pini krɔ kee, ndee mbe oyɛ pra.