4
Kee ŋga ni yuu yi na, pɔ ŋmba we u lɛ krɔ li kre, na uu fiɛn kre, we pe na tnu wi katoo, nde wre wi krɔlifun chɔ.
2 Nyjila ŋga ni uu fiɛn kre, leele pie na u le mbra krɔ nyjɛ we kɔɔ ta yire le mbe sɛ su nyjila ŋga u lɛ wre we tɛɛ nu.
3 Pan ki nyi, wre chɔɔ, waŋgra ŋga, na yirɛ nyjɛ yii wa ki nu tinlɛ na lɛ wre, a o chin mu lɛ, mu kpra kre chin.
4 La, ŋga nyjila ŋga ki fna na da kre, Nyiɛkpɔɔ na wre titi Biblɔ tun. Wra pan a lewo chlɔ na u se, a wra li Moses mbra yire na,
5 imi kie pe mbe u jaa mblɛ pee wa Moses mbra yire jaara pre shɔ, mbe o jaa pe Nyiɛkpɔɔ wre biile.
6 Ŋga o pe Nyiɛkpɔɔ biile kre ndra na, u u Biblɔ wre Ŋumu wre tun, a u pan mu tni o lolonyi nu. Wre Ŋumu wre u Nyiɛkpɔɔ yeeri, “Abba!” Ki nyina ndoo.
7 Kena fuŋgaami ŋga, tinlɛ ma yire na, la, Nyiɛkpɔɔ biile lɛ yire, a ŋga e ta mu pe Nyiɛkpɔɔ wre biile ŋga, we e ŋga yirɛ nyjɛ u tɛɛ u biile pan yire yɛ.
Galatia Kee Paul Shian
8 Jle kre na e n Nyiɛkpɔɔ chin, ki tia ŋumu nyjɛ yi nsra pe ŋumu chiriri pre tinlɛ na lɛ yire.
9 La, fuŋga e Nyiɛkpɔɔ chin, a Nyiɛkpɔɔ wre e chin. Mni a e na chaa mbe ndruu sɛ waŋgra ŋumufuɛn nyjɛ nu tnu ka n wa yire sumi hin? Mni a e na chaa mbe yi e pe tinlɛ na hin?
10 E ble yɛ, na nyiɛpɔ yɛ, na nyjila yɛ, na yɛlɛ yɛ le, na yire wɛ yɛ na.
11 E kee ni pe fooro ni, ni fiɛ na ni tnumu ŋga ni pan mu tun e nu kre pe waara.
12 Ni wolo, ni e tali, e pe na mi wi, ŋgi na hin? Pan ni nyi na yire lɛ. E n ni pe sisaa ka.
13 Yire titi e chin yira ŋga na kra yire, a ndaa ketaan kre kpali e pan jle, e chin na ni wejiwrɛm na kra yire.
14 La, e nsra ni le fiɛn, a e nsra ni je, nde ni wejiwrɛm kre na tia a e na fna kolo kro na, nde e na je mna ni yii imi na ee Nyiɛkpɔɔ nyjeeri bituŋu yii mbe da. Imi ee na Yesu Kristo yii to, pan e na ni yii kre.
15 A e yɛshɔɔrɔ ŋga e na ta kre, sena ki nyi hin? Mi titi we jaa e yɛshɔɔrɔ kre dansiɛrɛ li. Kre nyjila kre na ee na ja kre, ee na e nyiɛlɛ foli mbra ni ŋga.
16 Kena ŋga ni kpra yo e pan kre ki tia ni kaari e loŋgo ree?
17 Pre leele mblɛ pe kpra kre knai kre, pe gbeŋmba e na, la, kolo ŋga na pe tro na e ni kre, ki n pe kolo chichie. Ŋga pe chaa mbe pe kro yi na, pie e laa ni na. Mbe ki ti e ndie tɛɛ pe pan.
18 Ki nyu na mu lewo ta mbe u nyu mu na nyjila kro nu na jawala chichie ni, la, ki n pe nyjila ŋga nu nii wa e jaara chiin nu, la nyjila kro nu.
19 Ni biile mblɛ ni kori, imi chlɔ sii mbe kra u yaa kre, pan e kee ni yaa mbe hɛ su na mbe e nya na e kepele pe na Kristo wi.
20 Ni chaa mbe kra pe imi, na nii wa e jaara, mbe naa paara mbe e na chin imi ni e jawa mu da. Ni kawa na e kee ni kpa.
Hagar Na Sarah Kee
21 Yire mblɛ e chaa mbra lii Moses mbra yire na kre, e ti ni e wie kee ŋga. E n loo kee ŋga Moses mbra yire yo ree?
22 Yi nyina na Abraham biile naa shiin, tnu pɔ na wi nunu, shiin wo wre lo n sra pe tnu.
23 Tnichlɔ wre pɔ wre, imi na chlɔ siire taa, mbe se ŋga, pan pra wre se, la, ŋmba u n pe tnu pɔ wre rɛ, Nyiɛkpɔɔ na u kee yo Abraham pan, na we wre pɔ wre se, a pra chin mu u se.
24 Pre chiɛlɛ shiin mblɛ kee ni yo ŋga, yire mu kpra kaalɛɛ shiin ŋga. Chiɛlɛ shiin pre yire mu nyu nunu pee nyini shiin ŋga. Nunu yire mu Nyua Sinai kre nyu nunu pee ŋga, wre wi Hagar, tinlɛ lɛ u biile.
25 Hagar yire mu Sinai Nyua ŋga kii wa Arabia na kre ŋga. A u yire mu aŋga Jerusalem chia kre ŋga, Jerusalem na ki leele kro pe tinlɛ.
26 La, nyjeeri Jerusalem kre n pe tnu, kre Jerusalem kre yi o lo.
27 Imi na Nyiɛkpɔɔ kee kre pe nyunɔ mu tɛɛ kre yo kre mbo,
“Ŋu chlɔ gbende,
ti mbe mu yiɛshɔ,
gblee le kpɔɔ na yɛshɔɔrɔ ni,
siire n da mu mu yaa tun.
Ŋu chlɔ ŋmba plɔ u laa mu na kre,
mu se tataara,
mbe wɛ chlɔ ŋmba plɔ uu wa u jaara wre na.”a
28 Ni wolo, fuŋgaami Nyiɛkpɔɔ biile lɛ yire, mu yire u nyu ŋga wra yo kre na. Imi na Isaac na nyi kre, pan e nyi.
29 Imi na pɔ ŋmba kee Nyiɛkpɔɔ nsra yo, a pra chin mu u se wre, na ŋmba pra yire Kpra Ŋumu wre jaŋga na mu se wre pra kre, pan ki nyi aŋga nyjila ŋga nu.
30 La, mni Nyiɛkpɔɔ kee ŋga pe nyunɔ mu tɛɛ kre nyina hin? Mbo, “Ti mbe tnichlɔ wre na u pɔ wre sɛ, ŋgi na hin? Tnichlɔ wre pɔ wre, na chlɔ ŋmba u n pe tnu wre pɔ wa chaa mbe pe lɛ krɔ li.”b
31 Kena ni wolo, o n pe tnichlɔ biile, la, chlɔ ŋmba u n pe tnu wre biile lɛ wre.