Mbra Ndee Shɔnlie
3
Yire Galatians jijiele, ndro ŋmbi u e wa mu fun ma hin? E yiɛ na mna ni e nyina kumu ŋga Yesu na ku kanyana kumu kaan na kre kee kro.
2 E ni kee nunu ŋga nyu wɔ. Kee nyjɛ Moses mbra yire yo yire na e na li mna Nyiɛkpɔɔ ŋumu wre ta ree? Ndee ketaan ŋga e loo mu shɔ mu li kre na yi hin?
3 Kena yira ŋgi ki tia a e daŋga ma hin? Nyiɛkpɔɔ ŋumu ni e nɔɔ hle, na chaa mbe sɛ e ŋmaa kre nyu le na yire titi jaŋga ni.
4 Kena kaalɛɛ nyjɛ e nya yire kro sɛ pe finfin ree? Ni n shɔ mu li na yie pe finfin ma.
5 Kena ŋga e na li Moses mbra yire na kre, kre na Nyiɛkpɔɔ na yila mna e ŋga u ŋumu wre, mna kawako kee pe e nu ree? ndee ŋga e na ketaan kre loo mu shɔ mu li kre na yi hin?
6 Pan pe Abraham kee nyunɔ Nyiɛkpɔɔ hlɛ kre nu mu tɛɛ mbo, “Abraham na Nyiɛkpɔɔ shɔ mu li, a u shɔnlie na Nyiɛkpɔɔ na u shɔ na u fraka.”a
7 Kena ki fna mbe e chin na mblɛ pe Nyiɛkpɔɔ shɔ mu li kre, pre lɛ Abraham nanae.
8 Nyiɛkpɔɔ kee kre pe nyunɔ mu tɛɛ kre, kra klu mu nyina na Nyiɛkpɔɔ we yire shɔnlie na, mbe leele mblɛ pe n pe Judae pre fraka. Ki tia Nyiɛkpɔɔ kee kre na klu mu ketaan kre yo Abraham pan mbo, “Kie yire mu na, mbe Nyiɛkpɔɔ waŋgra ŋga leele kro dwan.”b
9 Abraham na shɔ mu li, a Nyiɛkpɔɔ na u dwan, kena ki tia mblɛ pe shɔ mu li kro, pie dwamu ta na wre wi.
10 Mblɛ pe peyɛ wru mu taa Moses mbra yire na, na lii yi kee na, mbe Nyiɛkpɔɔ pe shɔ kre, pe atɛ. Ŋgi na hin? Pe ki nyunɔ mu tɛɛ Nyiɛkpɔɔ kee kre nu mbo, “Ŋmba u n li kee nyjɛ pe nyunɔ Moses mbra yire kro na nyjila kro nu kre, pe ufun sun.”c
11 Kena fuŋga o kro ki chin chasi na ndro wa jaa yire Moses mbra yire na mbe fraka Nyiɛkpɔɔ yiɛ, ŋgi na hin? Pe ki nyunɔ Nyiɛkpɔɔ hlɛ kre nu mu tɛɛ mbo, “Ŋmba we yire shɔnlie na mbe fraka Nyiɛkpɔɔ yiɛ wre we ŋmaa ta.”d
12 La, na lewo li Moses mbra yire na, ki koloo wa kiyɛ na Nyiɛkpɔɔ shɔnlie ni. A imi na pe ki nyunɔ Nyiɛkpɔɔ hlɛ kre nu mu tɛɛ mbo, “Lewo ŋmba we li nyjɛ Moses mbra yire yo na kro kre, we yire yi na mbe ŋmaa ta.”e
13 La, pe Kristo sun mu o ŋga, a ki tia u o shɔ mu yili suŋgɔ kɛɛ, ŋga o Moses mbra yire taanla kre na. Ŋgi na hin? Pe ki nyunɔ Nyiɛkpɔɔ hlɛ kre nu mu tɛɛ mbo, “Lewo ŋmba pie kan kaan na kpan, Nyiɛkpɔɔ u sun.”f
14 Pra Kristo pe ma, mbe ki ti mbe Nyiɛkpɔɔ dwamu ŋga wra yo we Abraham ŋga kre, mbe leele mblɛ pe n pe Judae pre yire Yesu Kristo na mbe ka ta, mbe o yire shɔnlie na mbe Kpra Ŋumu ŋmba kee Nyiɛkpɔɔ na yo wre ta.
Moses Mbra Yire Na Nya Ŋga Nyiɛkpɔɔ Yo
15 Ni wolo, ni chaa mbe kee ŋga leele pini tɛɛ mbe kee ŋga nyina. Na leele fni, mu nyu nunu pe kee ka na kre, ndro wa jaa pan mbe kre nyu nunu kre kla, ndee mbe ka ya kre nyu nunu kre na.
16 Nyiɛkpɔɔ na nyu yo Abraham, na u nana pan gbee tataara. Nyiɛkpɔɔ kee kre pe nyunɔ mu tɛɛ kre, ki n na nyina na Abraham na u nanae pan u ki yo. Kra nyina na, Abraham na u nana pan Nyiɛkpɔɔ na u nyu yo, a wre wi Kristo wre.g
17 Kee ŋga ni yuu yi na, Nyiɛkpɔɔ na nyu nunu pe na Abraham ni, mna u nyu yo na we li ki na. Kena Moses mbra nyjɛ yira kɔ mu pan yɛlɛ lafɛɛ jijirɛ na fulo na kɛ kɔkro kre, yia jaa Nyiɛkpɔɔ nyu nunu kre wra pe kre kla, mbe u nyu ŋga wra yo kre kun.
18 Kena yirɛ nyjɛ Nyiɛkpɔɔ kaan yire, na Moses mbra na yi yire na paan waa, kena nyu ŋga u yo kre na ma hin? La, nyu ŋga Nyiɛkpɔɔ na yo Abraham pan kre na wra le mna u ŋga yira ŋga wra yo we u ŋga kre.
19 Kena Moses mbra yire tnumu na yi ŋgi hin? Nyiɛkpɔɔ na mbra yire ŋga mu ya, mbe yi lewo nyina u sisam ŋga u pini. Mbra yire na pan mbe lewo nyina u sisam, mbe sɛ su na Abraham nana ŋmba pan Nyiɛkpɔɔ na nyu yo wre we pan. Nyjeeri bitumblɔ na Nyiɛkpɔɔ na yire mna Moses mbra yire ŋga, a Moses na leele pre ŋga mbra yire.
20 La, ŋga Nyiɛkpɔɔ na u nyu yo Abraham pan kre, wre nunu chom wra ki pe, u nsra yire nyjeeri bituŋu na, ndee mna yire ndro wa na.
Moses Mbra Yire Tnumu
21 Kena ki nyina na Moses mbra yire, yira pan mu Nyiɛkpɔɔ nyu ŋga u yo kre taan ree? Pan ma ki nyi. Na mbra ka naa wa mbra jaa lewo ŋga ŋmaa kre, lewo wra yire mbra na mbra fraka Nyiɛkpɔɔ yiɛ.
22 La, Nyiɛkpɔɔ kee kre pe nyunɔ mu tɛɛ kre nyina na, waŋgra leele kro sisaa pe, ki tia Nyiɛkpɔɔ nyu ŋga u yo kre, u yire Yesu Kristo shɔnlie na mu ki ŋga.
23 Nyjila ŋga ni Yesu Kristo nsra ta mu pan kre, na Moses mbra yire o pe na nyuŋgo pe o yii mu le, mbe sɛ su na Nyiɛkpɔɔ we Yesu Kristo shɔnlie kre wɔ mbe o nyina.
24 Ki tia Moses mbra yire na pe na lewo wi, mu na o le, a Kristo na chin mu pan, mbe ki ti o yire Kristo shɔnlie na mbe fraka Nyiɛkpɔɔ yiɛ.
25 La, ŋga Yesu Kristo shɔnlie nyjila kre pan ŋga, Moses mbra yire jaŋga n wa o na na.
26 Yesu Kristo shɔnlie ki tia e kro pan mu pe Nyiɛkpɔɔ biile, a yire na Kristo wre pe nunu.
27 Pra e ndrɛ je, mbe yire na Kristo wre pe nunu, ki tia e Kristo kepele kro wru.
28 Ki tia Judae, na leele mblɛ pe n pe Judae kre pe nunu, a tinlɛ na mblɛ pe n pe tinlɛ kro pe nunu, a bilɛ na chiɛlɛ kro pe nunu, a e kro na Yesu Kristo kro pan mu pe nunu.
29 Ŋga yire na Kristo pe nunu ŋga, Abraham nanae lɛ yire, a ee yira ŋga nyu Nyiɛkpɔɔ na yo Abraham pan kre ta.