2 O Lɛ Nyiɛkpɔɔ na o Tafun Yesu Kristo wre u e ŋga dumiɛ na wejinyiŋge.

3-4 Na ni nyiɛtali kpan, ni ni Nyiɛkpɔɔ kaan mboo nyjila ŋga mu mbe e kee jawa na yɛshɔɔrɔ ni.

5 Ŋgi na hin? Mi na yire nyu nunu ta na yaa oyɛ na, mu yire nyjila ŋga ni e ketaan kre loo mu pan mu su aŋga na.

6 A ni shɔnli na Nyiɛkpɔɔ ŋmba u kepele chichie kre nɔɔ hle e nu kre, we ki tun mbe sɛ su Yesu Kristo paan shiin wo kre nu.

7 Ki fna na mbe kee nyjɛ krɛrɛ jawa na e ni. Ŋgi na hin? Nyjila kro nu, e kee wa ni loloŋgo nu, a mi na yire kro wo yi Nyiɛkpɔɔ dumiɛ ŋga u o ŋga kre, ŋgi na hin? Nyjila ŋga ni pra ni yii mna sɛ le nyuŋgo, na ŋga ndaa ni nyu woni na yuu na ketaan kre pe kpra kee kre, na mi na yire lɛ.

8 Nyiɛkpɔɔ wre titi chin imi na ni e kori Yesu Kristo ndra na.

9 A ŋga nyiɛ ni tali na e kaan yi na e koroo we sɛ yiɛ tataara kachindɛ na nɔɔloo nu,

10 imi na kie pe mbe e ja mbe ŋga ki nyu chiriri chin mbe wɔ, mbe pe cheche mbe pia wa kee sisaa taa yo, mbe sɛ su nyjila ŋga nu Kristo pan ble kre we da.

11 Kena pe e nya na mu yire Yesu Kristo na kre, e fraka, mbe ki Nyiɛkpɔɔ ŋga yɛnyiŋge, mbe leele Nyiɛkpɔɔ ŋga mɛɛ e kepele ndra na.

12 Ni wolo, ni chaa mbe e chin na kee nyjɛ yi ni da, na ŋga pra ni le nyuŋgo kre, ki tia Nyiɛkpɔɔ ketaan kre na kpali na shie yiɛ,

13 a sojae ŋunu katoo shiefɛɛnlɛ pre, na mblɛ pe mbra wa kre kro chin na Kristo ndra na pe ni le nyuŋgo.

14 A ki tia ni wolo pre tataara shɔnlie ta kpɔɔ o Tafun wre nu, mu jaŋga badaaŋga ta na Nyiɛkpɔɔ kee kre yuu, a pe n na fiɛ.

15 Plɛ yenyjam, na kakra tɛɛ na Kristo wre kee yuu, a plɛɛ wa mu yiɛ sin na ki yuu.

16 Mblɛ pe yiɛ sin kre pe koroo tɛɛ na ki yuu, mu chin na ketaan kre dansiɛrɛ lie na pe ni yii mu le nyuŋgo ŋga nu.

17 A leele mblɛ pe yenyjam, na kakra tɛɛ na kee kre yuu kre n na Kristo kee kre yuu kolo chichie na, la, chaa pe chaa mbe peyɛ kpɔɔ, na jawa na, na pe pe ma kre, kie ti mbe ni fooro kpɔɔ li nyuŋgo mna.

18 Kolo kro na kre, na kpra pe lii oo, na kpra ma pe lii oo, ni yiɛ shɔ na pe Kristo ketaan kre yuu.

19 A mbe ti ni yiɛ na shio. Ŋgi na hin? Ni chin na e nyiɛtalaa, na Yesu Kristo Ŋumu wre saara na pie ni wa.

20 A ni shɔnli, mu na chaa na mba kee ka na ki nyini pe, mbe nyifɛɛrɛ ni gbo. Kena na pe ni gbo, ndee na pe ni wa kre, mbe gbuntitirem ta, mbe leele yire ni na mbe Kristo wre ŋga mɛɛ.

21 A mi pan kre, na ni tni waŋgra nu mna, kena Kristo ni tni mu ŋga. A na ni ku kre, kii tnu ni ni pan.

22 La, na mbe tnu ta ni tnimu nu tra mna mbe Kristo ŋga kre, kena ni n chin ŋga mbe wɔ kee shiin nyjɛ nu.

23 Ki tia ni nyjira yire kee shiin nyjɛ lalaa. Ni jawala yi na mbe yiri tra ŋga na, mbe mi na Kristo wre sɛ tni. Ŋgi na hin? Kre kee ŋga nyu ni pan mu wɛ.

24 La, e ndra na, kaa ki nyu na mbe tni tra mna.

25 Kre jawala ŋga tia ni shɔnli na mi na yire we tni, imi kie pe mbe e shɔnlie sɛ yiɛ na yɛshɔɔrɔ ni.

26 Kena, na ndaa ndru mu pan e tni haa wa kre, ee Kristo Yesu wre ŋga mɛɛ chichie, mbe jɛŋgi ni ndra na.

27 Ŋga ki shian titi yi na, ee ti mbe e kepele kro pe na Kristo ketaan kre chinfɛɛnlɛ lɛ. Kena na ni pan mu e nya o, na ni n e nya o, mbe ndaa e kee ndru na e yire gbiŋmbi lɛɛ nunu ni, na jawala nunu ni, na wii na yaa eyɛ na, mbe ki ti leele ketaan kre shɔ mbe li.

28 A yaa ti mbe fiɛrɛ e yii e loŋgoolo haa. E gbun ta, kre kie nyina pe pan na Nyiɛkpɔɔ we pe kla, mbe e ŋga ŋmaa.

29 Ŋgi na hin? Nyiɛkpɔɔ e ŋga kolo, na e Yesu shɔ mbe li. Ki n pe shɔnlie chiin yi e tnumu, la, u ndra na, ee kala nya.

30 A fuŋgaami ŋga, wiire nunu kre mi na yire wii. Wiire ŋga e na nya fa na ni wii kre, kre chɔɔ e loo na ni wii tɛ kre.