Colossians Hlɛ
Shaaraa
1
Mi Paul ŋmba ki yire Nyiɛkpɔɔ chaara na, mu pan mu pe Yesu Kristo bituŋu wre, na o ŋmbrɔ Timothy, wre pan hlɛ ŋga yiri,
2 na shie Nyiɛkpɔɔ leele mblɛ pee wa Colosse na pre pan, o wolo Kristo leele kprafɛɛnlɛ mblɛ pre na Kristo pe nunu kre.
O lɛ Nyiɛkpɔɔ wre u e dumi mbe e ŋga wejinyiŋge.
Nyiɛtalaa Na Mboo Ŋgaa
3 Nyjila kro nu na o nyiɛtali na e kaan kre, o o Tafun Yesu Kristo lɛ Nyiɛkpɔɔ wre kaan mboo.
4 Ŋgi na hin? O e shɔnlie ŋga e Yesu Kristo shɔ mu li kre loo, mu imi e Nyiɛkpɔɔ leele kro kori kre loo.
5 Ŋga kpra ketaan kre na klu mu da e na kre, e na dankna ŋga ketaan kre kaan kre kee loo. Kena e shɔnlie na e koroo ŋga e ta kre, dankna ŋga e ta kre na ki yire, a fɔtɔɔrɔ ŋga na e kaan kre, Nyiɛkpɔɔ ki tɛɛ nyjeeri wa na e sri.
6 Ketaan kre paan na dwamu ni, mu na kpali na shie waŋgra kro nu, imi na ki pini e nu, mu yire ŋga ble e na Nyiɛkpɔɔ dumiɛ kee kre loo, mna pan mu imi sembremu ki nyi nya kre.
7 O ŋmbrɔ sumifun Epaphras, ŋmba o kori, a u yire o jeelee na, na tnumu tuni Kristo pan kpra ni kre, wre wra e nyina Nyiɛkpɔɔ dumiɛ kee kre.
8 U pan mu e koroo ŋga Kpra ŋumu wre e ŋga kre, kee yo o pan.
9 Kre kee ŋga ndra na, mu yire ŋga ble o na e kee loo kre, o nyiɛtali na e kaan nyjila kro nu. O Nyiɛkpɔɔ tali na u ti mbe e jawala ta imi na u chaa, mbe ti mbe e kachindɛ, na nɔɔloo ŋga Kpra ŋumu kaan kre tni e nu.
10 Kre e jaa tni imi na o Tafun wre chaa, mbe jaa ŋga ki tna u pan pe nyjila kro nu. E tnimu kre we kepele chiriri sɛŋgɛ sɛ kolo kro na, a kie ti e Nyiɛkpɔɔ chin kpɔɔ mbe ya.
11 Ni tali na Nyiɛkpɔɔ u yire u yɛnyiŋge jaŋga kre na mbe e ŋga faŋga, mbe ki ti mbe e jaa frɔ, mbe eyɛ yii kee kro nu.
12 E na Nyiɛkpɔɔ kaan mboo, na yɛshɔɔrɔ ni. Wre u tia e pe leele mblɛ ee jaa paan yira ŋga u tɛɛ u biile pan u kania ŋunumu nu kre ka ta.
13 Wre u o shɔ mu yili wɔmu jaŋga kɛɛ, mu pan o ni U Biblɔ ŋmba u kori wre ŋunumu nu.
14 U Biblɔ wre na o yire mu o yɛ ta, ŋgi na hin? U o sisam kro ti mu o kɛ.
Kristo Tnumu Ŋga U Pan Mu Tun
15 Pan Kristo nyi na Nyiɛkpɔɔ wi.
Lewo wa jaa Nyiɛkpɔɔ nya,
la, lewo Kristo nya.
Wre wi yirɛ nyjɛ Nyiɛkpɔɔ gbeele yire kro ndra.
16 Wre na wra yire,
mna yirɛ nyjɛ yii wa nyjeeri,
na tra kro gbeele,
yirɛ nyjɛ o nyaa,
na nyjɛ n na nyaa kro.
Wre na Nyiɛkpɔɔ na yire mna ŋumu mblɛ nu jaŋga nyi,
pra ŋunumu lii,
mu peyɛ pe tafɛɛnlɛ,
na faŋgafɛɛnlɛ pre kro gbeele.
Wre na Nyiɛkpɔɔ na yire,
mna yirɛ kro gbeele,
wre wra yi gbeele mu ŋga.
17 Wraa wa a Nyiɛkpɔɔ na chin mu yirɛ kro gbeele
wre u yirɛ kro yii mu mbra,
a yi yirehaa ta.
Kristo Wi Sumifɛɛnlɛ Pre Ndra
18 Wre wi u wejiŋge kre ndra,
a u wejiŋge kre yi sumifɛɛnlɛ pre.
Wre na sumifɛɛnlɛ pre yire mu pan,
a wre wra klu mu nyi mu yili kuulo nu,
a ki tia u yiɛ klu yira kro pan.
19 Nyiɛkpɔɔ wre chaara na ki yire,
a u Biblɔ wre pe na wre Nyiɛkpɔɔ titi wi.
20 A mu yire u Biblɔ wre na kre,
Nyiɛkpɔɔ wre titi,
u jawala pe na we ndru mbe yirɛ kro wru,
mbe le u jaara.
Nyiɛkpɔɔ yire u Biblɔ wre,
kumu ŋga u ku,
kanyana kumu kaan na kre na,
mu pan na wejinyiŋge ni,
mu yire ki na mu ndru,
mu yirɛ nyjɛ yii wa nyjeeri,
na tra kro wru mu le u jaara.
21 Nyjila ka nu yire na Nyiɛkpɔɔ haa na le, a e na u yii loŋgo, ŋgi na hin? Sisam kee e naa jawa na pini.
22 La, fuŋga rɛ, Nyiɛkpɔɔ yire u Biblɔ wre kumu kre na mu e wru mu pe u nɔɔlɔ, mbe yire ki na mbe e pe cheche. A nɛɛrɛ kee ka wa pe e na, a ndro wa e kee ka ta mbe yo, mbe ki ti e jaa yire u yiɛ.
23 Kena ki fna e pe kprafɛɛnlɛ nyjila kro nu, mbe yire gbiŋmbi na nyuŋgo nɔɔ yi, mbe yaa shia ti mbe pe e mɔŋɔ mbe laa e dankna ŋga e na ta nyjila ŋga nu e na ketaan kre loo kre kro. Kre ketaan ŋga, ki kpali waŋgra kro nu, a kre na mi Paul yire mu pe sumifun.
Paul Tnumu Ŋga U Tun Sumifɛɛnlɛ Pre Nu
24 Fuŋga ni yiɛshɔ ni kanyana ŋga ni nya ŋu Nyiɛkpɔɔ ndra na kre na. A ki tna ni pan na ni Kristo kanyana ŋga wra nya u sumifɛɛnlɛ mblɛ lɛ u wejiŋge kre, ka nya.
25 A Nyiɛkpɔɔ ni pe u sumifɛɛnlɛ pre sumifun, na ni paan u kee kre kro kpali e pan.
26 Ki pe kee ŋga wra ndra lewo na fuŋga ma, la, fuŋga u ki wɔ mu u leele nyina.
27 Nyiɛkpɔɔ kre kee ŋga pe. Ŋgi na hin? U chaa mbe yire mblɛ e n pe Judae pre u kawako na u ndra ndra kee kre nɔɔ loo. A u ndra ndra kee kre yi na, Kristoo wa mu tni e lolonyi nu. A wre nu e dankna nyi na ee yire u na mbe wre Nyiɛkpɔɔ yɛnyiŋge kre ka ta.
28 O o kachindɛ kro tɛɛ na ndro kro jaari na pe nyina kee kre, imi kie pe mbe ndro kro lɛ Kristo nu.
29 Kre ki tia ni ni faŋga ŋga Kristo wre ni ŋga kro tɛɛ na tnumu tuni.