2
Tnumu shelee ŋga ni tun, yire na Laodicea leele, na leele mblɛ pe n da mu ni nya na nyini ni tun pan kre, e ti mbe ni e nyina ki yi.
2 Imi kie pe mbe tnumu ŋga ni tun kre pe le gbeŋmbaa, mbe ki ti pe nɔɔloo ta, mbe pe peyɛ yii na koroo ni, mbe Kristo chin pe jawala nu kpiki. A kie ti mbe pe Nyiɛkpɔɔ kee ŋga ki ndra kre chin, kee kre yi Kristo wre titi.
3 Nyiɛkpɔɔ jawala, na u kachindɛ krɔyirɛ nyjɛ yi ndra kre, wre wi safwa ŋga ki yi nyaari.
4 Kena ni yuu e pan, yaa shia ti mbe ndro e fana na kewɛɛ ni, imi pe nyu we tna mbe da kpan.
5 Kii wa na mi titi n wa e jaara, nde nii wa e jaara ŋumu nu. Ni yiɛshɔ na ni nya na e yire chiriri, mu yire e shɔnlie ŋga e ta Kristo nu kre na, mu chaa mu yire gbiŋmbi.
Kristo Tnimu
6 Ŋga e ta mu Yesu Kristo wru mu pe e Tafun ŋga, yire na wre e pe nunu.
7 E didinyi kan u nu, e lɛ u kee kre nu, e sheli u shɔnlie nu. A imi na pra e nyina kre, e ti mbe e mboo ŋgaa nɛɛ.
8 A e dɔɔta, mbe ndro waa shia kachindɛ kewɛɛ tɛɛ mbe e fana mbe e pe tinlɛ. Leele jawala kee nyjɛ pe leele nyina, a yi yiri waŋgra ŋga ŋumufuɛn pan kre, yire kee yire, Kristo pan ma yi yiri.
9 Nyjila ŋga ni Kristo naa wa tra kre, Nyiɛkpɔɔ kepele kro naa wa u nu.
10 A ŋga yire na wre pe nunu kre ndra na, Nyiɛkpɔɔ e ŋga ŋmaa kpra ni. Kristo ŋunumu lie, na u jaŋga wɛ ŋumufuɛn mblɛ pe jaŋga, na ŋunumu lii kro na.
11 Ŋga yire na wre pan mu pe nunu kre na, pan ki pe na e fɛnyi pe knumu, a e fɛkɔɔnrɔ kre n pe kolo ŋga na leele yire na pe fɛnyi knumu kre kolo na. La, fɛkɔɔnrɔ ŋga rɛ, pan ki nyi na Kristo u e kun mu laa wejikaara sisam na.
12 Ŋgi na hin? Ŋga pra e ndrɛ je kre, ki nyina na pe yire na Kristo chaa mu le, mu yire na wre chaa mu nyi. Yi krɛrɛ yire e shɔnlie ŋga e ta Nyiɛkpɔɔ faŋga tnumu ŋga u tun e nu kre na, Wre wra Kristo wre nyi mu yili kuulo nu.
13 Nyjila ka nu, e sisam na tia e na pe na e ku Nyiɛkpɔɔ haa, ŋgi na hin? Judae ma yire, ki tia e nsra Moses mbra yire chin. La, Nyiɛkpɔɔ yire Kristo na mu pan na e ni ŋmaa nu. Nyiɛkpɔɔ o sisam kro ti mu o kɛ.
14 O fɔlɔ nyjɛ o li a yi o taan yire krɛrɛ, u yi kun mu yili wa, yire na yi mbra nyjɛ yira o pɔ yire kro, u yi jaŋga kan mu mbra kanyana kumu kaan kre na.
15 Kanyana kumu kaan kre na Kristo yire mu ŋumufuɛn mblɛ pe jaŋga, na ŋunumu lii pre jaŋga nyu gbo, mu tia nyifɛɛrɛ pe gbo leele yiɛ na.
16 Kena ŋga ee li, ndee ŋga ee gbɔ kre, yaa ti mbe ndro mbra le ki na e pan, ndee mbe yo e pan na ki fna e ble yɛ wɔ mbe yire pe ble cheche, ndee mbe yo e pan na nyiɛpɔ ŋga kie yili kpan, ki fna e ki ble li, ndee mbe taa Judae blenyini kee yire na.
17 Yire kee nyjɛ krɛrɛ mbakɔ yirɛ chichiele yire sɛmbɛɛrɛ yi, a yire yi Kristo wre.
18 Kena yaa ti mbe ndro e gbun na pimi ni. Mblɛ pe yila kee nyjɛ pe nyaa nyini ni, na yuu na pre nyu mu wɛ leele kro na kre, pe peyɛ nyjii kafinɛ kolo na, na nyjeeri bitumblɔ sumi. Pre leele mblɛ nyini, lewo jawala pe wru mu tɛɛ na peyɛ kpɔɔri, a pe n kolo chiriri ka ni.
19 Pre leele pre, pe Kristo ŋmba wi sumifɛɛnlɛ pre ndra wre je. Wre u u wejiŋge kre le, na ki kaan sro, u wejiŋge kre yi sumifɛɛnlɛ pre. Wre u wejiŋge kre yii ki sooloe na, mu yi mbra a ki pe nunu, a kra lee imi na Nyiɛkpɔɔ wre chaa mbe ki pe.
Imi Lewo Kuu Mbe Nyi Kristo Nu
20 Yire na Kristo chaa mu ku, ki tia e n wa ŋumufuɛn mblɛ pe ŋunumu lii tra ŋga na kre jaara na. Kena ŋgi ki tia a e na chaa mbe e tnimu pe na waŋgra ŋga wolo lɛ yire ŋga hin? Ŋgi ki tia e na lii mbra nyjɛ leele le na ŋga hin?
21 Mbra nyjɛ pe le na, “Maa shia kɛ taa ŋga na! Maa shia ŋga le nyuu! A maa shia kɛ taa ŋga wa na!”
22 Yire yirɛ nyjɛ krɛrɛ tnu ka n wa yi nu. Yire mbra nyjɛ krɛrɛ leele pe yi le, na yi nyina.
23 Kpra na, leele plɛ jawa na mblɛ pe yire mbra nyjɛ le, na yuu na ki fna mbe lewo nyjeeri bitumblɔ sumi kre, na kachimblɛ lɛ. Pre pe peyɛ nyjii, na pe wejinyi fiŋge, kolo ŋga ki n pe Nyiɛkpɔɔ kolo na. Nde yire mbra nyjɛ krɛrɛ tnu chiriri ka n wa yi nu, a yia jaa ti mbe lewo laa u niŋge sisam na.