E Yiɛ Taa Nyjeeri Yirɛ Na
3
Nyiɛkpɔɔ yire na Kristo chaa mu nyi, mu e ŋga ŋmaa. Kena e e jawala taa yirɛ nyjɛ yii wa nyjeeri wa yire na. Bawa Kristo nyi mu tni u ŋujɔɔn na Nyiɛkpɔɔ kalie.
2 E ti mbe e jawala pe yirɛ nyjɛ yii wa wa yire na. Yaa ti mbe e jawala pe tra mna yirɛ na.
3 Ŋgi na hin? E ku, a e ŋmaa ŋga ee ta kree wa Kristo kɛɛ, a u ki ndra Nyiɛkpɔɔ nu.
4 Kristo wi ŋmaa titi ŋga ee ta kre, kena ŋga ble we uyɛ wɔ kre, bawa yire na wre we chaa mbe yili, mbe e u yɛnyiŋge kre ka ta.
Ŋmaa Lɛɛ Na Ŋmaa Fɔŋgɔ
5 Kena waŋgra ŋga kee nyjɛ yi tnumu tuni e nu kre, e yi gbo. Yire yi, tiɛrɛɛ, nɛɛrɛ kepele, na chachaara, na niŋge sisaa, na jajaara. Pan jajaara nyi na sɛɛn sumiɛ yi.
6 Yire kee nyjɛ ndra na, Nyiɛkpɔɔ krɔkuɔn kre we pan mblɛ pe n na lii u kee na kre na.
7 A yire chɔɔ, yire kooloe nyjɛ na e naa tro fa. Kolo kro na, pan e tnimu na nyi.
8 La, ŋga nu e nyi ŋga, ki fna mbe e yire kee nyjɛ krɛrɛ ti, krɔkuɔn, gbun sisaa, na prara, na kroyoo, a yaa ti mbe tɛɛlɛɛ na kefuɛn na yili e wa nyuu.
9 Yaa na kalafnɛ eyɛ pan, ŋgi na hin? Kepele fuɛn nyjɛ e naa pini fa kre, e yi wa,
10 mu kepele chiriri wru. Ki tia e kaari lefumblɔ, a Nyiɛkpɔɔ ŋmba u e gbeele fɔŋgɔ wree wa na e kna nyjila kro nu, mbe e pe na wre wi, mbe chin imi na u nyi.
11 Kre kee ŋga na, Judae, na mblɛ pe n pe Judae pre pan mu pe nunu, a mblɛ fɛnyi pe knumu, na mblɛ fɛnyi pe n knumu pre pe leele nunu. Fuŋu n wa, ŋmba yiɛ ki nyaa n wa, tnu ndee lepɔɔ n wa, la, Kristo wi yira kro, a uu wa e nu kro.
12 Nyiɛkpɔɔ leele lɛ yire, u e kori, mu e wɔ na u wolo lɛ yire. Kena e pe fooro chinfɛɛnlɛ, e na chichie pini, yaa na eyɛ kpɔɔri, e eyɛ nyjii, e na frɔ.
13 Kakrɔ ŋga kii wa, wa na u ŋmbrɔ lalaa kpan, e frɔ, e eyɛ sisam ti e eyɛ ŋga. Ki fna e eyɛ sisam ti mbe kɛ, imi na o Tafun wre e sisam ti mu e kɛ kre.
14 Nyjɛ kɔkro ni, e eyɛ kori, koroo ki yirɛ kro yiri na mbra mbe yi pe nunu.
15 Wejinyiŋge ŋga Kristo kaan kre, e ti mbe ki tni e lolonyi nu, ŋgi na hin? Nyiɛkpɔɔ e yeeri mbe e paan yire kre wejinyiŋge ŋga na mbe pe wejiŋge nunu, mbra Nyiɛkpɔɔ kaan mboo.
16 E ti Kristo kee kre kro tni e lolonyi nu kpɔɔ. E na eyɛ nyina, e na paara e na eyɛ nyina kachindɛ ni. E na mɛɛ nyjɛ yi tna koni e na Nyiɛkpɔɔ kaan, mbra u kaan mboo e lolonyi nu.
17 Kena ŋga ee pe, ndee ŋga ee yo kpan, e na ki pini o Tafun Yesu wre mɛɛ nu, e na yire u na e na o Lɛ Nyiɛkpɔɔ wre kaan mboo.
Kristo Leele Mbra
18 Chiɛlɛ leŋgefɛɛnlɛ, e eyɛ nyjii e e pilɛ ŋga, ŋgi na hin? Ŋga e pe Kristo leele ŋga, pan ki fna mbe e pe.
19 Bilɛ leŋgefɛɛnlɛ, e e chiɛlɛ kori, yaa na pe fiŋge.
20 Biile, ŋga e pe Kristo leele ŋga, e tnumu yi na ee ndie tɛɛ e loolo, na e lɛɛlɛ pan nyjila kro nu, ŋgi na hin? Kre kepele kre na Nyiɛkpɔɔ yiɛshɔ.
21 Loolo, na lɛɛlɛ, yaa ti mbe e biile krɔ na kuun, mbe ki ti mbe pe yiɛ na jee.
22 Tinlɛ, e na e tafɛɛnlɛ mblɛ pee wa tra mna kre kee ndru kolo kro na, na pee wa e jaara na e le chiin ma ki fna e tnumu tun, mbe pe e pni. La, e o Tafun wre fiɛrɛ tɛɛ e na tnumu tuni kpra ni.
23 Yira ŋga ee pe kpan, e lɛɛ wɔ e ki pe, e pe na o Tafun wre e tnumu tuni na kaan, yaa na ki jawa na lewo e pini na kaan.
24 E sɔɔnri na o Tafun wre we e ŋga fɔtɔɔrɔ ŋga ki fna. Yira ŋga u tɛɛ u leele pan kre, ee ki ta, ŋgi na hin? Kristo wi o Tafun titi, a wre e sumi.
25 A sisam pefun, imi na u nyi kpan, Nyiɛkpɔɔ we u ŋga u sisam kre fɔtɔɔrɔ. Ŋgi na hin? Na Nyiɛkpɔɔ kpra kuun, wra yoori.