4
Tafɛɛnlɛ, e na ŋga ki fraka, mu nyu pini e na e tinlɛ kaan. E sɔɔnri na yire chɔɔ ee wa na Tafun ni nyjeeri.
Paaranyinaa
2 E nyiɛtalaa yii kɛ shiin, e na sri, e na Nyiɛkpɔɔ kaan mboo.
3 Na e nyiɛtali, e na tali e na wre kaan na, mbe Nyiɛkpɔɔ o ŋga kolo mbe o jaa u kee kre kpali, mbe jaa Kristo kee ŋga ki ndra kre kee yo. Ŋgi na hin? Kre ndra na pe ni yii mu le nyuŋgo kre.
4 Kena e nyiɛtali mbe ni jaa paara chasi imi na ki fna.
5 Leele mblɛ pe n Kristo shɔ mu li kre, yire na pre e tni kachindɛ kolo na, kolo chiɛri ŋga ee ta kre, e e shɔnlie kre kee yo pe pan.
6 Nyjila kro nu ki fna mbe e paara pe pan yɛshɔɔrɔ ni, mbe ki tna ndie, ki fna mbe e chin imi ki fna e kee nyu wɔ ndro pan chiriri.
Shaaraa Haŋa
7 O ŋmbrɔ Tychicus ŋmba o kori, a wra tnumu tuni kpra ni, a wre na wre kro pe o Tafun wre sumifun, na u tnumu tuni kre, we paan ni kee kro yo e pan mbe e loo.
8 Kre na ni yila na u tuni e pan, mbe u paan imi na o nyi mna kro kee yo e pan, mbe ki ti e yiɛshɔ.
9 Wre na Onesimus, o ŋmbrɔ sumifun ŋmba e kori, a u pe kprafun, a u chaa e nu kre pie pan. Kee nyjɛ yi pini mna kro pie paan yi yo e pan.
10 Aristarchus, ŋmba pe mi na wre yii mu le nyuŋgo kre, u e shaari kro. Pan chɔɔ Mark, Barnabas sele ndro wre e shaari na. E klu mu loo na, na waa pan e pan wa, ki fna e u yii chichie.
11 Joshua ŋmba pe yeeri Justus wre e shaari na. Pre leele taarɛ mblɛ lɛ Judae mblɛ pe Kristo shɔ mu li mna, a mi na pre na Nyiɛkpɔɔ ŋunumu kre tnumu tuni, pe ya ni na kolo tataara na.
12 Epaphras e shaari, wre chɔɔ u yiri e nu wa, a u pe Yesu Kristo sumifun. Nyjila kro nu u nyiɛtali lɛɛ nunu ni na e kaan, na tali na Nyiɛkpɔɔ u ti mbe e jaa yire gbiŋmbi, mbe lɛ Nyiɛkpɔɔ nu, mbe Kristo shɔ mbe li na loloŋgo kro ni, mbe jaa ŋga Nyiɛkpɔɔ chaa kro chin.
13 Mi titi we jaa u tnumu kpɔɔ ŋga u tun mu yire na Laodicea, na Hierapolis leele ŋga kre dansiɛrɛ li.
14 Luke, o dɔkita ŋmba o kori wre, na Demas e shaari.
15 E o wolo mblɛ pee wa Laodicea na kre shaari o pan, pre na Nympha, na sumifɛɛnlɛ mblɛ pe fni u katoo kre kro.
16 Na e hlɛ ŋga tɔɔnri mu kɔ kre, e gbeŋmba na ee ki tɔɔnri mbe Laodicea sumifɛɛnlɛ pre loo na. Na pe e hlɛ kre kee loo mu kɔ kre, hlɛ ŋga pre we e ŋga kre, mbe e ki tɔɔnri mbe ki kee loo na.
17 E yo Archippus pan na u le na o Tafun tnumu ŋga pe le u kɛɛ kre, na we ki tun mbe kɔ.
18 Mi titi kɛ nyunɔmu yi ŋga. Mi Paul, ni e shaari. Yaa shia ni tɔɔnrɔ mɛnyi nyjɛ pe le ni na ŋga kee fɛɛ.
Yire na o Tafun wre dumiɛ e tni.