Thessalonians Hlɛ Jle
1
Mi Paul, na Silas, na Timothy pan hlɛ ŋga yiri, na shie sumifɛɛnlɛ mblɛ pee wa Thessalonica na, mu pe o lɛ Nyiɛkpɔɔ, na O Tafun Yesu Kristo wolo pre pan.
Yire na dumiɛ, na wejinyiŋge e tni.
Thessalonica Leele Tnimu Na Pe Shɔnlie
2 Nyjila kro nu o Nyiɛkpɔɔ kaan mboo e kro ndra na, na e sɔɔnri nyiɛtalaa nu.
3 Ŋgi na hin? Na o o lɛ Nyiɛkpɔɔ wre tali kre, tnumu ŋga e shɔnlie na tia e na tun, na tnumu kpɔɔ ŋga e koroo na tia e na tun kre, o yi sɔɔnri, mu na e dankna kpɔɔ ŋga e ta o Tafun Yesu Kristo wre nu kre sɔɔnri na.
4 O wolo, o chin na Nyiɛkpɔɔ e kori, mu e wɔ na e pe u wolo.
5 Ŋgi na hin? Ŋga o na pan mu ketaan kre kpali e pan kre, paaraa chiin ma o na pan mu paara. O na e nyina Kpra Ŋumu wre jaŋga, mna e nyina na ketaan kre pe kpra. Ŋga o naa wa e jaara kre, e na chin tnimu ŋga nu o na nyi, yi krɛrɛ, e chichie ndra na yi.
6 E na tia e tnimu na pe na wre na o Tafun wi, ŋgi na hin? E na kala nya, a nde e na ketaan kre yii na yɛshɔɔrɔ ŋga ki yiri Kpra Ŋumu wre pan ni.
7 Ki tia e na pe leele mblɛ Macedonia, na Achaia sumifɛɛnlɛ pre we le mbe tuan.
8 Macedonia na Achaia leele pre chiin ma pra yire e tnimu kre na, mna o Tafun wre kee kre loo, la, imi e na Nyiɛkpɔɔ shɔ mu li kre, leele ki loo lawee kro nu. E kee ka n wa mbe o ta mbe yo leele pan na.
9 Ŋga o na pan mu e shaari, a e na o yii chichie kre, leele pre kroo wa na ki kee yuu. A ŋga e na laa sɛɛnlɛ kro, mu pan na Nyiɛkpɔɔ kprafun ŋmba u le wre sumi,
10 na u Biblɔ wre sri mbe u yiri nyjeeri mbe pan, u Biblɔ Yesu Kristo ŋmba wra nyi mu yili kuulo nu kre, wre u o wɔ mu yili Nyiɛkpɔɔ krɔkuɔn ŋga ki paan kre nu.