Thessalonians Hlɛ Shiinwo
1
Mi Paul, na Silas, na Timothy pan hlɛ ŋga yiri na shie sumifɛɛnlɛ mblɛ pee wa Thessalonica na, mu pe o lɛ Nyiɛkpɔɔ wre, na o Tafun Yesu Kristo wre wolo pre pan.
2 O lɛ Nyiɛkpɔɔ wre, na o Tafun Yesu Kristo wre pe e ŋga dumiɛ na wejinyiŋge.
Kprakuɔn Ŋga Kie Pan Kristo Paan Nu
3 O wolo, o Nyiɛkpɔɔ kaan mboo e ndra na nyjila kro nu. Ki fna mbe o pe ma, ŋgi na hin? E shɔnlie shie yiɛ, a koroo ŋga ni e eyɛ kori kre kpɔɔri na yaa.
4 Kre ki tia o na e teeri na oyɛ kpɔɔri Nyiɛkpɔɔ sumifɛɛnlɛ pre nu kre. Na o le imi na pe e fiŋge, a e na kala nyaa, mu ja mu frɔ mu shɔ mu li kre, ki fna o e tɛɛ mbe oyɛ kpɔɔ.
5 Yire kee nyjɛ krɛrɛ o nyina na Nyiɛkpɔɔ kprakuɔn fraka, a ki tia o chin na e fna u ŋunumu ŋga na e fnai kre nu.
6 Nyiɛkpɔɔ we kpra li, mblɛ pe tia e na kala nyaa kre, we ti mbe pe kala nya.
7 A yire mblɛ e kala nyaa kre, we ti mbe e wuu, a pan chɔɔ we ti mbe o wuu na. Na o Tafun Yesu wre na u nyjeeri bitumblɔ faŋgafɛɛnlɛ pre waa yiri nyjeeri na paan,
8 pie pan kanhun ŋga ki nyini ni, mbe paan mblɛ pe n Nyiɛkpɔɔ chin, a pe n li o Tafun Yesu Kristo ketaan kre na kre ndie tini.
9 Pie kanyana ŋga ki n nyukɔɔrɔ ni nya. Nyiɛkpɔɔ we pe ni mbe yili o Tafun wre, na u faŋga yɛnyiŋge kre yiɛ.
10 Ŋga ble o Tafun wre we pan, mbe u leele pre kro u ŋga yɛnyiŋge na buuro kre, ee chaa pe nu, ŋgi na hin? Kee ŋga o yo e pan kre, e ki shɔ mu li.
11 Kre ki tia o na nyiɛtali na e kaan nyjila kro nu kre. O o Nyiɛkpɔɔ wre tali mbe u ti e jaa tni tnimu ŋga nu u e yeeri kre nu. Nyiɛkpɔɔ u yire u jaŋga kre na mbe ti e jaa kee chiriri ŋga e chaa mbe pe kre pe, mbe ti e jaa shɔnlie tnumu ŋga e tuni kre tun mbe sɛ kɔ.
12 Na e pe ma kre, kie ti mbe e o Tafun Yesu wre yɛnyiŋge ta e pan, mbe yire ka ta u pan. O Nyiɛkpɔɔ wre na o Tafun Yesu Kristo wre dumiɛ ki ti mbe ki pe ma yɛŋgɛ.