E Eyɛ Kna E Na O Tafun Wre Paan Sri
5
O wolo, ki n shian na oo e nyunɔ mbe e nyina nyjila ŋga nu yire kee nyjɛ krɛrɛ we pe.
2 Ŋgi na, yire titi chin na o Tafun wre pan ble kre, we pan imi na juo paan juhaa blee kre.
3 Nyjila ŋga ni leele we na yuu na waŋgra nyjii, ki tia fiɛrɛ n wa fuŋga kre, kre nyjila kre nu Nyiɛkpɔɔ we yirɛ kro kla mbe ki o fo. Pan kie pe imi selɛɛ foni na chlɔ yaa kre. Kolo ka n wa mbe lewo jaa tro ki na mbe shɔ kre kanyana kre nu.
4 La, o wolo, yire n wa wɔmu nu, kena ble kre n fna mbe yire fo na juo wi.
5 Yire krɛrɛ kania kre biile lɛ yire, a e pe nyisee kre biile. Blee, ndee wɔmu biile ma wre.
6 Kena yaa ti mbe o pe na leele mblɛ pe sni lɛ. E ti mbe o tni mbe shie, mbe o yiɛto.
7 Blee ki woo mbe mblɛ pie ŋunu kre ŋunu, mbe mblɛ pie gbɔ mbe to kre gbɔ.
8 La, nyisee kre biile lɛ wre, kena ki fna mbe o yiɛto. Ki fna mbe o shɔnlie na koroo yii na o ŋunɔ wiyira ŋga ki o tɔ yi, mbe o o dankna ŋga o ta o ŋmaashɔmu nu kre pe o ŋunɔ wi juulee.
9 Nyiɛkpɔɔ nsra o wɔ na o paan to u krɔkuɔn kre nu, la, wra o wɔ na o paan yire o Tafun Yesu Kristo wre na mbe ŋmaashɔmu ta.
10 Wre wra ku mu o ŋga, mbe o yire ki na, na waa pan na o le o, na o ku o, mbe wre na wre ŋmaa li.
11 Kre kee ŋga ndra na, e eyɛ le gbeŋmbaa, e na yaa eyɛ na, imi na e pini kre.
Paara Nyinaa Haŋa Na Shaaraa
12 O wolo, o e tali, mbe e mblɛ pra tnumu tun e nu kre ŋga buuro ŋga ki fna. Leele mblɛ pe e le, na e nyina Kristo tnimu kre,
13 e pe kori, e pe ŋga buuro kpɔɔ, tnumu ŋga pe tuni kre ndra na, e ti mbe wejinyiŋge pe e lalaa.
14 O wolo, o e tali, e paara e mblɛ pe kila na tro finfin kre nyina. E mblɛ pe fiɛ kre le gbun. E ya mblɛ pe pɔlɛ pre na, e na frɔ.
15 E le na wa wa sisaa tɛɛ mbe sisaa fɔlɔ tɔ, la, nyjila kro nu e na chichie pini e na eyɛ kaan, e na pini ma e na ndro kro kaan.
16 E ti mbe e yiɛ na shio nyjila kro nu.
17 E na nyiɛtali nyjila kro nu.
18 E na Nyiɛkpɔɔ kaan mboo kee kro na. Ŋga yire na Yesu pe nunu ŋga, pan Nyiɛkpɔɔ chaa mbe e na pini.
19 Yaa shia Kpra Ŋumu wre tɔ kolo.
20 A yaa shia Nyiɛkpɔɔ kee nyanyoo le kewaa.
21 E na kee kro le chiriri, ŋga ki nyu kre, mbe e kre yii kɛ shiin.
22 E eyɛ wɔ e yili sisam kro nu.
23 Nyiɛkpɔɔ ŋmba u o kaan wejinyiŋge kre, u e pe cheche kolo kro na, mbe u e ŋumu, na e wejinyi, na e nyiɛ wɔ mbe yili nɛɛrɛ kro nu, mbe sɛ su o Tafun Yesu Kristo wre pan ble.
24 Nyiɛkpɔɔ ŋmba u e yeeri kre we ki pe, ŋgi na hin? U pe kprafun.
25 O wolo, e nyiɛtali e o ŋga.
26 E o wolo pre kro shaari o pan.
27 Ni o Tafun wre jaŋga tɛɛ na e tali na, e hlɛ ŋga tɔɔnri e e wolo sumifɛɛnlɛ pre kro nyina.
28 Yire na o Tafun Yesu Kristo dumiɛ e tni.